Osmoniyə sədo-19
Osmoniyə sədo-19
Bə dini islomi ciddiyə ziyonon varid kardə çi cəholət iyən nodonətiye.Əli(ə) mıborəkə Rujə manqi nonzəminə ruji de xəvaricon şımşi vositə mehrobədə ibodəti zəmonədə zərbətış harde və de ə həzrəti şəhodəti bə islomi dınyo qıləy ğəməngizə faciyə daxil be.
Insoni xılğət jıqoye ki, təbiiyə surətədə deştə həm nevi çı neziku ya diyəroku unsiyyət bərpo kardedə və bəvon dıl dəbastedə.ın əloğə xıyzoni rabitəon cəhətədə vey ranqin iyən nığıl bedə.joqo ki,inson hozzıe boştə iyən boştə xıyzoni rifoh iyən asayişi təmin kardero harcurnə cəhdon bıkon və qahi vaxti həm əxloği iyən insoni həddı-marzon bə nəzə seydəni.fəğət iqlə amil insoni deçəy nezə odəmon miyono rabitəon taraz kardey bəzıne və əv həm bə zəmone ki,məktəbi iyən əğedəvi hədəfon bə miyon biyo.ım nəzə bə emosional rabitəon qıləy cəhət doydə və jimonədə insoni rasional iyən prinsipial dast-xətti nışon doydə..
De qıləy co bəyoni qıləy bə Xıdo bovəş bıə iyən imoninə inson bənə co insonon təbiiyə surətədə fərdi iyən xıyzoniyə mənfəətonış heste və əv ıştə fərzənd iyən jimoni həmroş piyedə.əmmo ım məhəbbəton bə imon iyən hədəfon marzi məhdude.binobərin boəy vey çokə fərdon əkəsonin ki,bo qıləy məzhəb iyən məktəbi hədəfon real bəey zəminədə deəy həmfik iyən həmray bıbon.bə həmonə dəllil xoto,Kərimə-Ğıron,bə dıqlə roysə mandə insoni iyən çəy bəştə xıyzoniyə hissi və sərvəti cazibə təsiri ji dənışero və ıştə məsuliyyəton çı viro benıkardero bəvon jıqo xitob kardedə:”Ha imon vardə kəson ha! şımə mol-əmvol iyən fərzəndon şıməni Xıdo zikriku(məsuliyyətonku) ğafil nıko.çən,hakəs jıqo bıko,yəğınə formədə ziyonkorin. (Munfaiğ-9).
Imkonış heste ım sıvol bo kali şəxson bə əməl boy ki,çıro əvon ziyonkorin?çun əvon de çı qırd aləmonku be ehtiyoc ,hikməti soyb iyən alimə Xıdo muamilə kardey iyən ıştə əbədiyə mənfəəti bə dast vardey əvəzi,əvon fani iyən rə dəvarzdə maddi dınyo mənfəətınışon ıştə nəzədə qəteşone və bəştə fərzəndon dıl dəvasteşone.bo insoni çimisə bəpeyə zərəl nibəbe ki,əv əv qqıləy əbədiyə dınyo bə məhdudə maddiyə dınyo bəhəvato və boçımi xoto həm əv bəpe ilahi ədolətinə məhkəmədə cəvob bıdo və ıştə səhvə əməlon mıdofiyəko.ımi həm votey lozıme ki, məğsəd ım ni ki,ıştə bəromə iyən maddi jimoni fikədə nıbu və boştə mıstəğiləti iyən nəfsi izzəti hiç qlıləy ko nıko və ya bəştə fərzəndon məhəbbət nışon nıdo.bəlkəm,məğsəd ıme ki,insoni mol-əmvol iyən fərzəndon odəmi sə nıtaspono və əy çı Xıdo zikriku ğafil nıko.de qıləy co bəyoni imoninə inson ehanə dıqlə roysə yəni ıştə fərzəndon iyən ilahi məsuliyyəton miyono bımando,bəpe əv çəvonku qıləyni bıvıjno və Xıdo zikri bəsə həmməysə bəpe bıqəto. Və Xıdo rozi bıə royədə hərəkətko.
