Osmoniyə sədo-14
Osmoniyə sədo-14
Imruj çı ədolət iyən ozodəti pərçəmi bə dast qətə,məhrumə insonon mıdofiyəkə iyən çı nodon və zolımon deşmın bıə qıləy komilə inson yəni Əmirəl-Muminin Əli(ə)-i şəhodəti ruje.
Ehanə şımə yodo bıbu,votemone ki,ımrujnə dınyo muşkilat və problemonku qıləyni,iştimaiyyəti təbəğəon miyono fosiləon mevcud bıeye ki,iqlə tərəfədə idastə insonon ziyodə sərvət iyən çokə rifohi dılədən,əmmo coqlə tərəfədə ki,ımrujnə dınyoədə vey bəçəş çiyedə,çı əksər insonon fəğrəti, məhrumiyyət iyən səfilə vəzyətədə jimon kardedən. islom bo ın təbəğəon miyono fosilə işkili çı miyoniku bardero,maliyyə iyən ixtisodi proqramonış nışon doə ki,əmə dəvardə bəhsonədə bəy mıəyyən ğədər işorə kardemone.
Təbəğon miyono fosilə vey umdə səbəbonku qıləyni,isnoni veyə surətədə ıştə sərvət iyən molon cəm kardeye və beşək əgər sərvətinə şəxson bəştə dini iyən insoni məsuliyyəton əməlkon və de Kərimə-Ğıroni təbiri bə beçizə şəxson mali cəhəto koməqkon iyən fəğət bəştə ıştən ,bəştə fərzəndon iyən bəştə xıyzoni mənfəəton fik nımandon və ziyodə molon boştə cəm nıkon iyən ıştə inhisorədə nıhaşton,ın fosiləon de zəmoni dəvarde çı miyoniku bəşe.Kərimə-Ğıron bo sərvəti cəm kardey iyən əy ıştə inhisorədə oqətə şəxson mədəniyyəti məhf kardero de əy şiddətinə formədə mıborizə bardedə və hamyedə:"Ha imon vardəkəson ha!çı alimon iyən rahibon veyni(de ıştə movğıyyətiku sui-istifodə karde) xəlxı molon nohəxədə hardedən iyən əvoni Xıdo royku oqəteydən. və telı-nığə qırdə kardə kəson iyən əy Xıdo royədə infoğ(baxş) nıkardə kəson, çən,bəvon de qıləy dardinə əzobi bəşorət bıdə". Tobə-34.
Bın ayədə bə çandə qılə nuktə dığğət kardey lozıme:iminə nuktə ıme ki,ayədə bə muminon xitob kardedə və çəy dıqlə mesaj heste.qıləyni ım be ki,bəvon çəşnavi doydə ki,dığğətkənən və mol-devlət qırdə kəson royədə ğədəm şomədənən ta bəçəvon dardnokə tale dıço nıbon.bə muminon rosnə bıə ayə dıminə mesaj ıme ki,bə yəhudi iyən məsihiyon zohirədə doə şuaron bovə nıkon ki,əvon nohəx iyən botılə royədə milləti molon hardedəbin və milləti bə Xıdo tərəf şıə roy mane bedəbin- və bənə əvon jıqo məxloği mol-əmvoli noxədə nıhon və bə təsiri ji nıdəşon. həmçinin islomi rəvoyəton mətnonədə omə ki,ehanə mısılmınon həm vindeşone ki, çəvon alimon bə dınyo maddiyat iyən zər-zibon tərəf vəya bə sərvət iyən ğudrəti mərkəzon tərəf meyl nışon doydən,əvoni çı cəmyəti çəşiku eğandon iyən çəvonku bə diyəro bımandon....
Coqləyni nuktə ıme ki,əgər bın dınyoədə sərvət qırdə kəson bo çandə ruj dınyo jimoni xoto ziyodə mol-əmvol cəmkon və ıştə rifoh iyən asayişi fikədə bıbon,ğətiyə formədə əvon axırəti dınyoədə bəştə bın anti-bəşəri və anti-dini əməlon xoto bə saxtə əzəobon dıço bəbeyn.bə həmonə dəlili xoto,ayədə omə:”bə telı-nığə qırdə kardə iyən əy Xıdo royədə infoğ(baxş) nıəkardə kəson qıləy dardnokə əzobi bəşorəti bıdə”.....
