2018 Rusiyə Dınyo Fitbol çempiyonat

2018 Rusiyə Dınyo Fitbol çempiyonat

In rujon har qıləy co zəmonisə həm vey,Dınyo Fitbol çempiyonat və futboliku məsey bedə və ımi çı milləti məxsusən cıvonon miyono qıləy əcibə həyəcon iyən abı-həvoş icod kardə.

FİFA Dınyo Kubok futbol karyera mısobiğəonin ki,1930-ə soriku mırəttəbə şikilədə ha 4 sor ikərə dəvordıney bedə və fəğət 1942 iyən 1946-ə sori bə Dıminə Dınyo Canqi xoto bərpo nıbe.Dınyo Fitbol çempiyonati navkonə mevsumədə çempiyon 2014-ə sori Almaniyə bıə.ın keşon bə imanqi nez və de 32 qılə tim iyən komandə Rusiyədə dəvordıney bedə.Dınyo Çempiyonatədə hozzı bıə komandon se sor çın mısobiğəon bənav ziyodə səy kardedən və opxoyədə de kə soybi bə ico, bın keşonədə huzur pəydu kardedən və qıləy dıjdə varzeşi təşkil doydən.

İroni komandə həm çı Asiyə zumandə timonku bə hisob omeydə və de tobə ısət 1968,1972 iyən 1976-ə sori se dəfə Asiyə milləton çempiyon bıə.Asiyə hənəkonədə həm İroni Milli Umud komandə həm se kərə yəni 1974-ə sori Tehronədə,1990-ə sori Pekinədə,1998-ə sori Bankokədə telı medalışon kəsb kardə.

İroni milli tim de tobə ısət penc kərə bə Dınyo Fitbol çempiyonati vəsiğəş kəsb kardə.1978-ə sori Arqentina,1998 Fransə,2006 Almaniyə,Braziliyə 2014 iyən nəhoyətən,2108-ə sori Rusiyə Dınyo fitbol çempiyonat.İroni milli fitbol komandə 1394-ə Həşi sori Əvəsoriku 2018 Rusiyə Dınyo çempiyonati mığəddimə hənəkonədə iştirokış karde və kardeyış zıne hiç qıləy hənəkədə məğlub nıbə holədə iminə dəfə dı kərə dumo yande bə Dınyo çempiyonati vəsiğəş kəsb karde.

İron İslom Respublika fitbol komandə bə pışk ğandey əsos,çın rəğobəton dıminə qrupədə və de İspaniyə,Potuğaliyə iyən Mərakeşi milli komandəon bə i qrup eqıniye.İron ıştə bın çempiyonatədə əynə ruji Xordad manqi 25-ə ruji(İyuni 15) Sank-Peterburqi Krestofski stadiyonədə de Afrikə çempiyon Məğrib ya Mərakeşi dim bə dim ome və de 1-0 minimal hisobi ın siyuə ğitə çempiyonış barde.İron ıştə dıminə hənəki Xordadi 30 yəni İyuni 20-ədə Kazani Kazan Arena stadionədə bə İspaniyə və bebəşe.nəhoyətən,Tir manqi 4-ədə(İyuni-25) İroni milli fitbol komandə Saransk şəhri Mordoviya stadionədə de Avropə oxonə çempiyoni yəni de Portuğaliyə timi vəbəvə bome.

Imi hım zikr kardey lozıme ki,İron İslom Respublikə milli fitbol komandə çımi bənav hiçvaxti qıləy mıəyyənə simvolış nıbe tain ki,iminə kərə çın cari sori Ordubeheştə manqədə  Yuspələnqe Asiyə və ya Asyə pələnq ki,ısət ironi ıştənədə həm çəy çandə qılə nımunəon mandə,çı İroni Milli fitbol komandə rəsmi məzhər və simvol və de “Yupa”(tijə lınqış bıə pələnq) nomi vıjniye be.