Ğərbədə İslomofobiya
Ğərbədə İslomofobiya
Qrit Vildzer qıləy Holəndıyəvıjə məşhurə islomofobe ki,bə islomi ələyh qıly tojə cərəyoni ləpə rost kardey dumoe.Hollandiyə Ozodəti radikal iyən islomofobə partiyə rəhbər se şanbə ruji İyuni 13-ədə ıştə Tvitterədə jıqo nıvışteydə: “anti-terror servis de Muhəmməd(s)-i karikatura mısobiğə bə Ozodi partiyə ayid vırədə Parlamentədə roziyətiş ğəbul karde.binobərin,əmə əy icro bəkar demon”. Vildzer votedə:”Holləndiyə de terrorizmi mıborizə bardə mərkəz bo mısobiğə bərpo kardero havzə çoş nışon doə və ın mısobiğ ehtimolən 2018-ə Miladi sori oxoyədə dəəvordıney bəbe”. Hollandiyə parlamenti ım radikalə şəxs iddio kardedə ki,jıqo qıləy mışobiğəon Hollandiyədə sıxan iyən bəyoni ozodəti nışon doydə.
Ğərole qıləy Amerkəvıjə karikaturist Buş Favstin ki,Amerkə Texas 2015-ə sori bənə ımi bıə mısobiğə hakimətiş bəştə ehdəş peqətəbe,həmçinin çın mısobiğə hakiməti həm bəkarde.Qrit Vildzer Hollandiyədə de islomi zidd iyən bə qıləy islomofob bıey xoto məşhure.əv bə mısılmınon sosyal fəaliyyəton ələyh məhdudiyyəton emol kardey iyən islomi nışonəon,həmçinin Hollandiyədə iyən co Avropə kişvəronədə məçiton çı miyoniku bardey dumoe.Vildzer çımi bənav həm Hollandiyədə Kərimə-Ğıroni ğədəğən kardey tələbış həm kardəbe. Hollandiyə parlamentədə dıminə dıjdə partiyə bıə Ozodi partiyə rəhbər bo islomi mığəddəsaton tohin iyən təhğır kardey bəhonə,bəyon iyən sıxani ozodəti zıneydə.Əv 2008-ə sori de qıləy “Fitnə” nomo bıə təhğıramizə filmi soxtey,dınyoədə məşhur be.ım ponzə dəyğəynə film dılqə baxşiku iborəte ki, bəvədə sıxan və kəlom ni.filmi qırd səhnəonədə cəhd bedə mısılmınon bənə radikal və hoziyə dastə nışon doey bıbu.çın filmi iminə baxşədə Kərimə-Ğıroni ayəonku pevolo bedə və bilofosilə çın ayəon bəpeştə bənə 11 sentyabri təsviron,de Talibani vositə əfğanıjə jeni edom kardey,Madridədə bombə noey,fərdon sə bırniye və sayirə...nımoyiş doey bedə.çın filmi dıminə baxşədə bə Avropədə jiyə mısılmınon jimoni işorə kardedə.
Jıqo filmon soxtey iyən intişor kardey,bə mısılmınon iyən dınyo ozod tələb kardə şəxson etıroz iyən tənğıdon boyis bıə.Harri Vinter qıləy Hollandiyəvıjə yəhudiyə produsser iyən film hozzı kardə kəse ki,bə “Fitnə” filmi etırozədə və ıştə məşhurə “Fulksrant” rujnomə sıftənə səyfədə jıqo nıvışteşe:ehanə Vildzeri bə islom,Ğıron iyən mısılmınon ələyh jıə qəpon,bə yəhudiyon zidd bıəbe və bə Tovrati kitobi zidd votəyşbe,rəyrə de anti-semitizm nomi mıttəhəm əbin və peşo de mıhokimə vositə siyosi səhnəku komilə formədə dəparçıney əbin.əmmo,Holləndiyə və Avropə co ziyodə kişvəronədə islomofobə cərəyanon çı vildzeri bə Kərimə-Ğıron iyən islomi mığəddəsaton bıə tohin iyən təhğıronışon çı bəyon iyən sıxani ozodəti çərçivədə ğeyd kardedən.çımi mığobilədə ozodi və ozodbaxşəti iddio kardə ğərbi devləton hiç qıləy reaksiyə nışon doydənin və bə islom iyən mısılmınon təhğıri reaksiyədə çı mısılmınon etırozi çı islomi hoziyəti tələb kardey zıneydən.əvon ıştə terroistə dastəon hərəkəton mısılmon zıneydən və əvoni bə islom iyən Ğıroni təlimon mahiyyəti nisbət doydə.tosə əvrə ki,Fransəvıjə hınə iyən siyosi məşhurə şəxsiyyətonku idastə çı Kərimə-Ğıroni kali ayəon çın ilahi kitoniku bekardey və şodey tələbışon kardə.ğərbi devləton ıştə kişvəronədə bə islomi zidd bıə cərəyonon mığobilədə hejo çı motədil iyən miyonə roə islomiku sıxan votedən.ehanə motədilə islomiku məğsəd, islomi əxloği,insoni iyən vijdoniyə erjon nəzə nıqətə holədə ,de din iyən məzhəbi nomi de terrori məşğul beıy iyən terror təşkilaton bə əməl vardeyebu,beşək hiç qıləy solimə ağl bə de jıqo cərəyonon mıborizə bardey mıxolifət nibəkardeyn.ğərbi devləton oqohə şikilədə de islom iyən mısılmınon mıborizə bardedən və cəhd kardedən har qıələy terroristə hərəkəti de islomi nomi əloğədor zıneydən və əy qıləy hoziyə din nışon doydən.
