Bə Miyonə Şərği hodisəon qıləy nəzə
Bə Miyonə Şərği hodisəon qıləy nəzə
De Səudiyyə Ərəbıstoni rəhbərəti bə Yəməni ələyh koalisiyə həmləon dəvardə haftədə həm dəvomış hestebe. dəvardə haftə həmləon muhimmə baxşon bə Yəməni Hudeydə porti be.bə Hudeydə ələyh həmləon İyuni 13-ə ruji qıləy holədə bino be ki,bə İbıə Milləton Təşkiloti hesabati əsos de tobə canqi seminə sori oxo,hiç nıbu 10 həzo mulki şəxs mıstəğimə surətədə bın canqədə kıştey bıə və 40 həzosə vey zəxmin və yarəjə bıə.eyni holədə İbıə Milləton Onemoni humanitar koon ofisi həm elonış kardə ki,3 milyonisə vey Yəmənıjə insonon çın kişvəri daxilədə və 280 həzo nəfərisə vey həm bənə Cibuti iyən Somali məmləkəton dərbədər bıən və əvon ısət de kamə hardemon iyən peşomoni problemi dimbədimin.həmçinin sanitarik cəhəto həm əvon vey yavə şərayitədən.jıqo qıləy şərayitədə de İbıə Ərəbə Əmirətiyon sərkərdəti bə Əlhudəydə bəndəri ələyh hərbi əməliyyaton binoş karde.fransavıjə jurnal “Lufiqaro”dəvardə haftə çı Fransavıjə xısusi ğıvvon bə bə Yəməni ələyh canqədə bə İbıə Əmirətiyon hərbi ğıvvon komək kardeyku xəbəş doe.çın canqi əsliyə hədəf Yəməni mıhosirə ziyod kardey iyən bə Ənsarullah ğıvvon təzyiği ziyod kardeye.əmmo çın canqi əsliyə ğıbonon ğeyri-hərbi şəxsonin.zira bə Yəməni humanitarə koməkon 70 fayiz de ın bəndər iyən porti vositə bə vırə rosney bedə..
Bə Əlhudeydə ələyh canq,Yəmənədə insoni vəzyəti yavə şərayit tiki həm ziydod bıə.bın cəhətədə İbıə Milləton Onemoni yoli sıxanəvot Stefan Ducarik bə Səudiyyə Ərəbıston iyən Əmirətiyon hərbi ğıvvon həmləon nəticədə 26 həzo nəfəri Əlhudəydə məntəğəku fərol kardey və ıştə kə-bəku avara bıey barədə jıqo voteşe:bə canqon dəvom pəydu kardey xoto,intizor bedə çıvon mığdor ziyod bəbe.İbıə Milləton Təşkiloti Yəmənədə humanitarə koon koordinator Liza Qrand elonış kardə ki,bə Əlhudeydə ələyh bıə həmləon de 250 həzo nəfəri coni ğeyməti bə oxo bərəse.
Qıləy holədə ki,Ərəbıston iyən Əməritəyion bə Yəməni canqədə de bəştə ehdə peqətə muzdurə əskəron canqışon tiki həm şiddətin kardə.İbıə Milləton Onemoni Yəməni koonədə nımoyəndə Martin Qrifts işanbə ruji bə Yəməni paytaxt Səna şəhr varid be və de Yəməni milli nicot devləti rəsmi şəxson vindemonış və votemonış karde.çı Martin Qriftsi çın səfəku məğsəd bo Əlhudəydə məntəğə bə İbıə Milləton Təşkiloti hərbiçiyon aspardeyro de Yəmnənıjon mızokirə bardeye.......
