Həzrəte Məsumə(s)

Həzrəte Məsumə(s)

Hicri-Ğəməri 173-ə sori Zilğəədə manqi sıftənə ruji Mədinə şəhrədə və Xıdo-Rəsul(s)-i pokə əhli-beytiku(ə) nəsliku qılə vılə balə bə dınyo ome ki,çəy nomışon həm Fatmə noşone.ım əzizə banu çı şiəyon haftminə imom həzrəte Mosə ibn Cəfər(ə) kəş bə şoyvonəti iyən sururi ğərğ kardeşe.qıləy kə ki,çəy bə iyən divoədə məhəbbət mevcud be və Nəcmə-Xatun nomo qıləy xanımə inə ım vəhıştiyə hırdənış bə dınyo vardeşe.bə Nəcmə-Xatuni bəçəy pokəti iyən təmizəti xoto,bə həzrəti Tahirə votedəbin və ə həzrət ıştə zəmonə vıjniyə bıə və təğvaninə xanım be. Fatiməye-Məsumə(s) ıştə əzizə pı həzrəte İmom Kazım(ə)  və ıştə əzizə mo iyən ıştə qıramiyə boyli İmom Rıza(ə) elmi iyən dini tərbiyə jiyədə bə elmi iyən dini mərıfəti barzə dərəcəon rəse.ım pokdovnə iyən iffətinə xanımi hırdənətiku çəy kə şəxsonış məxsusən həzrəte İmom Rıza(ə)-ış bəştə aşığış kardəbe və çı İmom Rıza(ə)-i de həzrəte Məsumə(ə)-i miyono qıləy məxsusə mehribonə rabitə mevcud be.

Nəğl bıə ki,qıləy ruj şiəyonku idastə bə Mədinə şəhri varid bin və boştə işkilon həll kardero bə həzrəti Mosə Kazım(ə)-i soyəx şin.kərvoni əhl çoko ki,bə İmomi kəybə nez beyədə,dərəsin ki,ə həzrət bə mısofirət şıə və kədəni.çı İmomi kədə nıbey bə oqıniyə kərvoni odəmon norohətçəti boyis be.bın zəmon naqahan qıləy kamə sinnədə bıə kinə çı İmomi kəku xaric be və çı kərvoni əhli sukutış darışte və hamyeşe:”şımə ıştə sıvolon bıdənən ta mı bəşmə qırd sıvolon cəvob bıdom”.əvon həm jıqoşon karde.həzrəte Fatmə-Məsumə(ə)  de dığğəti qırd sıvolon cəvobonışon nıvışte və bə kərvoni əhli oqordınışe.kərvoni əhl de çoçinəti bə nıvıştə bıə cəvobon nəzəşon karde və sıvık bıə holədə bəştə vətən iyən sərzəmini tərəf oqardin.kərvoni əhl roysə de İmom Kazım(ə)-i dimbədim omin və çı həzrəte Fatimə-Məsumə(ə)-i bəçəvon sıvolon cəvob doey dastoni işorəşon karde və çə həzrəti bəvon doə cəvobışon bə həzrəti nışonışon doe.həzrəte İmom Kazım(ə) bə həmonə cəvobon erəxey bəpeştə çə həzrəti dim sıriye və hamyeşe:”fədaha əbuha! Yəni çəy pı bəçəy ğıbon”.

In vağiyə çı həzrəte Fatimə-Məsumə(ə) hırdənəti vaxti barz iyən ziyodə elminə məğamiku hikoyət kardedə və çə həzrəti zəkovətin iyən huşin bıey nışon doydəbe.

Həzrəte Fatimə-Məsumə(ə) bənə ıştə xanımə nənə bo əhli-beyti(ə) xıyzoni ulqu bıə Fatimə-Zəhro(s) qıləy zolımə şərayitədə və bə əhli-beyt(ə)-i təzyiği şərayitədə vey reçinə şikilədə çı səbr iyən istiğaməti roş qəte.ım fəzilətinə banu ibodət,təğva,rostəvıjəti iyən səbrədə bo həmmə kəsi qıləy ulqu be.

Həzrəte Məsumə(ə) fərdi iyən rufi kəmolati şəxsiyyəti cəhəto,çı həzrəte Mosə ibn Cəfər(ə)-i fərzəndon miyono ıştə əzizə bo İmom Əli ibn Mosər-Rıza(ə)-i bəpeştə,həmməysə barzə dərəcəş heste.ım qıləy holədəy ki,bə sənədon əsos İmom Kazım(ə)-i kinə fərzəndon mığdor həjdə ya nonzə nəfər bıən ki,həzrəte Fatimə-Məsumə(s) çəvon həmməysə bəpe və barz bıə.