Əllamə Məhəmməd Bağır Məclisi

Əllamə Məhəmməd Bağır Məclisi

Həmonə şəvi osmono bıə ovşumi qıləy co cilvəş hestebe.Məhəmməd Təğı Məclisi qıləy təğvaninə alim be ki,bo ibodət kardero ıştə vırəku əyştəbe.çəy kə çı ovşumi reçinə ruşnə jiyədə ğərolış qətəbe. Məhəmməd Təğı bə bəş oj bıə otağədə bıə hırdəni qofoş diyə karde.çı ovşumi nur bə qofo iyən hırdəni səpe bənə qıləy bə dılnıştə nəvazeşi dətevedəbe.Məhəmməd Təğı bə so evoe iyən bə osmoni erəxe.əv həmonə şəv qıləy əcibə holış hestebe.bə hovzi kəno şe iyən bə Muhəmməd və Ali Muhəmmədi salavat vığandə holdə dastnımojış qəte.peşo bə otağ oqarde və de nımoj  iyən de Xıdo razo-niyozi məşğul be.əv həmonə şəvi qıləy mənəviyə holış pəydu kardəbe.əv ıştə həmonə şəvi bıə holi arədə jıqo voteydə:

”Az həmonə şəvi qıləy holətədə vindeme ki,harçi Xıdoku bıpyime,əv inoyət bəkay.fik kardeme çiç tələbkəm ki,bəçımı dınyo iyən axırəti koon qıləy foydəş bıbu.naqahan Məhəmməd Bağıri sədo çı qofoku bəçımı quş rəse.bə holədə ərzım karde:”Xıdolim ha! tıni bəştı pəyğombər(s) iyən bəçəy xıyzoni ğəssəm doydəm ki, bə ım tifli-məsumi ovandəti bıdə ta bıdə əv çı seyyidil-mursəlini(həzrət Muhəmməd s) dini murəvviconku bıbu və bəy qıləy oxoş nıbə tovfiğ(ovandəti) mərhəmətkə.”

Jıləvoni be ki,Əllamə Məhəmməd Bağır Məclisi deştə pı xolisonə dıvo vositə ıştə hırdənətiku bə İlahi maarif iyən Əhli-Beyt(ə)-i elmon kəsb kardeyədə bıə barzə istedodi nayil be.joqo ki,əv haruj boştə elmi kəsb kardey xoto bıə təşnəti sirab kardeyro,islomi yolə alimonku elmiyə bəhrəonış barde.

Əllamə Məhəmməd Bağır Məclisi Hicri-Ğəməri 1037-ə sori çı ironi  tarıxi iyən fərhənqi şəhr yəni İsfahanədə bə dınyo çəşış oj karde.əv çı Molla Məhəmməd Təğı Məclisi zoəy ki,çı ruziqari yolə alimonku bə hisob omeydəbe.Məhəmməd Təğı Məclisi çı şiyə fəxr bə hisob omeydəbe ki,elm,təğva iyən fəzilətədə qıləy məxsusə məğamış hestebe.Əllamə Məhəmməd Bağır Məclisi sıftədə ıştə pıku təlim-tərbiyəş vinde və bə dini elmon qıləy həvəsış nışon doe.əv ıştən jıqo nıvışteydə:

“Çımı bə ne bə nevə dini elmon həvəsım hestebe iyən çəvon aşığ bim.de Xıdo fəzli bə elmi bostanon ro pəydu kardedəbim.peşo bə həmonə elmi dırıst ya nodırıst bıey vağif bedəbim ta inki,çəy mıxtəlifə ləlqılonku iyən rənaqəranqə vılonku boştə hozzı kardeme.mı çı elmi har vırəku i qortım peşome və har xəməniku iqlə huşəm peqəte.”

İsfahani şəhrədə Əllamə Məclisi aylə tarıx həzo sorisə vey be.har cəhəto rovnəğış pəydu kardə İsfahani şəhr,bə zəmon bə ironi hakim bıə Səfəviyon hukuməti paytəxt be.Məhəmməd Bağır məclisi qıləy xıyzonədə ozavziye ki,de elm iyən mərıfəti pur be.çın xıyzoni şəxson veyni Hicri da iyən yonzəminə ğərnədə ıştə zəmoni  yolə alimonku bə hisob omeydəbin.Əllamə Məclisi xıyzon sırə diyən iyən mehmon nəvoz bin.çəvon har qıləyni çı muminon məclisədə bənə durri vavriski doydəbin iyən çəvon vucud çı məclison ziynət be...

Əllamə Məclisi ço sinniku ıştə pıə palu dini elmon umuteyış bino karde və ıştə alimə pı mxəsusə dığğəti sayədə de Xıdo doə huşi vositə isfahani şəhrədə ıştə pı iyən isfahani co məşhurə alimonku de dini elmon umutey məşğul be.əv qıləy kırtə zəmonədə çandə qılə elmış dumo yənde umuteşe.joqo ki,həmonə nevcıvonəti vaxtonədə istedod nur çəy simadə oşko be və hakəs ki,çəy dəvəşə sima vindedəbe,çəy vəomədə qıləy yolə şəxsiyyət bıey xəbə doydəbin.mərhum Əllamə Məhəmməd Bağır Məclisi ıştə hırədnəti vaxtonədə bıə elmon həxədə jıqo voteydə:

Əlhəmdu lillahi rəbbil aləmin ki,bandə ço sorədə Xıdo,nımoj,vəhışt iyən cəhəndımi məfhum iyən məno zıneydəbim.şəvi nımoji handedəbim,Səfa məçitədə sıbhi nımoji de camaati bə ico votedəbim və de ayəon vositə iyən ıştə mərhumə pıku təlim vində hədison vositə bə hırdənon nəsyət kardedəbim.

Əllamə Məclisi əxtə istedodış zumand be ki,çordə sinnədə çı islomi dınyo yolə filosof bıə Molla Sədraku rəvoyət votey icozəş se.ə həzrət bənə Molla Saleh Mazandarani,Molla Həsənəli Şuştəri,Molla Muhsin Feyz Kaşani,Seyyid Nuruddin Amili,şəhid sani nəvə şeyx Əli Amili bıə alimon palu,elmi xəməniku bəhrəş barde.Əllamə Məclisi har qıləy vırədə ki, alim,muhəddis iyən fəğih vindedəbe,de təvazukorəti çəy palu nışteydəbe və dini elmon təlim vindedəbe və çəvon elmonku bəhrə bardedəbe.  

Əllamə Məclisi zəmonədə həmməkəsi bə fəlsəfə iyən irfani elmon əloğəşon pəydu kardəbe.Əhli-Beyt(ə)-i rəvoyəton de çı miyoniku şıey təhdidi dimbədim oməbe.həmçinin çı ironədə səfəviyyə bənav bıə hukuməton sınni bıey iyən şiyə əmandə əsliyə ktobon kanə bıey xoto,Əllamə Məclisi bə ın fik dəşe ki,ım hədison həmmə cəmko bə ivırə və qıləy ensklopedik ktobi surətədə hozzıko.Əve Əllamə “Biharul-Ənvar”(çı nuroon dıyoon) kitoblış təlif karde ki,110 cıldıku iborəte.