Rəhbəriyyəti nəzə

Rəhbəriyyəti nəzə

Xosə həmzıvonon, səlom. Şımə vaxt bəxəyr bıbu.Umidımone şımə hol-əhvol çok bıbu.

Əzizon Hicri Şəmsi 1356 minnə sori, Bəhmənə manqi 29 minnə rujədə, Təbrizi şahrvandon ğiyom kardəşone, bə həminə ğiyomi sorəqardışi mınosibəti xoto, de virtual surəti, İroni İslamiyə inğilobi yolə Rəhbər de Şərği Azərbaycan milləti vindemon kardə və ım vindemonədə Həzrəte Ayətullah Xamenei, Bəhmənə manqi 29 minnə ruji, çı İnğilobi tarixədə, Təbrizi milləti dəvəşe iyən şıkr kardə ruj zııneydən.

Imruj və Im bərnomədə bə Həzrəte Ayətullah Xamenei həminə vindemoni erjinə sıxənon ixtisos doəmone, şıməni dəvət kardəm de im bərnomə bə ico bımandən.

Mehribonon, Həzrəte Ayətullah Xamenei ım virtual vindemonədə hamiyəşe: "Təbrizi şahrvandon hərəkət, qıləy navəjə iyən muhimmə hərəkət be ki Ğomi Dey manqi 19 minnə ruji ğiyomi bə həmmə yod iyən nışo dodə, əqə Bəhmənə manqi 29 minnə rujədə, Təbrizi millət ım yolə hərəkəti əncom ədənıbin, bo İroni millət çılım qəte adət iyən mubarizə bardey icod nıəbi. Vaxti ki Təbrizədə iyən de Təbrizi şahrvandon vositə, Ğomi şəhidon çıl minnə ruji yol qəte əncom be, ım hərəkət bənə ulqu bıə. Co şəhronədə həm bənə Yəzd, Kerman, Fars iyən co məntəğəonədə həm ım hərəkət əncom bıə və nəhayətəd İroni İslamiyə inğilobi səbarz bıə".

İroni İslamiyə inğilobi yolə Rəhbər, çı Şərği Azərbaycan və Təbrizi milləti, milliyə vəhdət və muğavimətədə navəjən zıneydə və Şərği Azərbaycani milləti co imtiyazonku qıləyni, bə Əhle Beyt(ə)-i çəvon məhəbbət, zıneydə iyən hamiyəşe: "əqə qıləy hərəkətədə dəvom bıbu, ə hərəkət bə səbarzəti bərəse, və əqə qıləy hərəkət bino bıbu əmmo muvəffəğ bıbu ki dəvom peydo ko, ə hərəkət noğis bəmande və benəticə bəbe. Əmə dınyoədə vey dəqardımonon zıneydəmon ki vey ğədəmon peqətışone əmmo çonki çəvon millət ya rəhbəron səmtiku, çəvon hərəkət dəvom peydo nıkardeşe, bə səbarzəti nırəsin".

Bə Həzrəte Ayətullah Xamenei nəzə əsos, İroni İslamiyə İnğilobi təsisəkə Həzrəte Ayətullah Xomeyni(r), İslamiyə İnğilobi səbarzəti bəpeşt, ım muhimmə nuktəku ğafil nıbıə.Ə Həzrət həminə barədə hamiyəşe: "İmom(r) bo İnğilobiyə millətiro və bo milli və beynəl xalğə etebor və iğtidori soxteyro, canqiku qıləy əbzor icod kardəş be. Deşmənon canqi bəmə icbor kardəşon be ki çəmə inğilobi məhv kon, əmmo İmom(r) inğilobi zumand kardeyro, canqiku istifodə kardəşe. İmom(r), çı universiti tələbəonku, yolə şəxsiyət , yolə fərmondə iyən yolə ulqu icod kardedə be, məsələn Mehdi Bakeri, Ğasım Suleymani, ımon de İmom Xomeyni(r) vositə prosniyə bin. İnğilobi dəvomi hərəkət de ım surəti be, qədə qədə cıvonon bə inğilobi şəxsiyəton, inğilabi mırdon və inğilobi navdəşəyon əvəz kardedə və bənav şeydə".

Və əmmo əzizə duston, "inğilobi hərəkəti dəvom doey" bə çı məenoe? İroni İslamiyə inğilobi yolə Rəhbər ım soali cəvobədə hamiyəşe: " (inğilobi hərəkəti dəvom doey) yəni əmə bə inğilobi hədəfon diğğət kəmon, iyən bə ımruj və maştəvoni ehtiyacon ki bo əmə iyən bə çəmə hədəfon rəse muhimmin, diğğət kəmon, və əvoni təmin kəmon.

Ə Həzrət korona virusi barədə, bo vaksin iyən çəy ehtiyocinə əbzoron istehsoliro, çı cıvonon meydonədə iştiroki və varid bey, həmonə kişvəri ehtiyoci zıneydə ki de huşinəti bə nəticə rəsə iyən əlovəş kardə: "ımsor, bəhmənə manqi 22 minnə ruj, qıləy ğeyre adiyə ruj be, qıləy dovtələbonə hərəkət be ki millət əy əncom doşe və vey bə tərif loyiğ be, , i tərəfiku koronavirus, milləti məişəti muşkilaton co tərəfiku, xarıcion tərəfo ləkə je co tərəfiku, daxılion səmtiku bə həmonə ləkə je komək kardey i tərəfiku, anədə muşkilaton muhasirədə, ım yolə aksiyaədə millət iştirok kardışone, bəmə raport doşone ki ımsor çand qılə ostanədə, dəvardə sori muğaisədə ım aksiya iştirokəkəyon vey be".

Həzrəte Ayətullah Xamenei ıştə sıxənon co baxşədə, bə atomiyə enerji dast peydo kardey lozimə ehtiyaconku qıləyni zıneydə və təkid kardə ki əqə ımruj bə atomi enerji fik nikəmon, maştə vey di bəbe, ijən əlovə kardə: “ şımə diyə kənən ki deşmən zalımonə surəti, bə çəmə atomiyə enerji məsələ təkyə kardə, bə atomiyə enerji xoto sanksiya varid kardey,qıləy holədə ki əvon zıneydən ım ko vey sulhomize. Isət voteydən ki İron tosə bombə soxtey vey fasiləş ni, ımon həmmə be məenoə sıxanin, əvon ıştən zıneydən ki əmə bə ko dumoədə nimon. əvon pidəşon ni İroni millət bə ım elmiyə yol və muhimmə inkişofi dast peydo ko, və bə millət təziğ varid kardedən, boçi ki maştə millət bə ım enerji ehtiyocışe və əvon pidəşone ım hərəkət dəvomış nıbu.

****************************************

Əzizə duston, İroni İslamiyə inğilobi yolə Rəhbər ıştə sıxənon dəvomədə bə İroni milləti, kali yolə fəaliyəton və hərəkəton işorəş kardə və hamiyəşe: “ım məşhurə şer vey səhihe (zumand bəbe, har kəs ki alim bıbu), elm har kişvəriro, zumandəti və iğtidor vardedə. əmə elmi muxtəlifə baxşonədə jəqo bə inkişof rəsəmone ki inğilobi əvvələdə ım məsələ barədə təsəvvurımon nıbe. Hiç vaxt əmə bovə nikardedə bimon ki əmə atomiyə enerji, nanotexnoloqiya və bayotexnoloqiya, vey mırəkkəbə cərrahiyon , besonəti məsələ həl karde, bınəynə huceyrəon iyən co muhimmə baxşonədə karde bəznımon, bə inkişof bırəsəmon”.

Ə Həzrəti nəzəku hətto iğtisod baxşədə de ım vucud ki tənğidon varid bıə əmmo “bə beynəl xalğə məşhurə iğtisodi mərkəzon nəzə əsos, dəvardə muğaisədə və iğtisodi muhimmə amilonədə, İron bə inkişof rəsə, vey yolə ğədəmon peqətəşe və yolə hərəkəton əncom doydə. əlovə bə ım istehsol baxşədə bəştə zumandəti təkyə karde, iyən çəmə istehsoləkəyon bəştə etemo karde həm vey bıə ki həmmə ımon bəpe nışo doə bıbu”.  

Həzrəte Ayətullah Xamenei hamiyəşe: “de həminə inğilobi dəvomiyəti vositə, behəmdellah inğilob həm bəji mande və həm istehsoləkə heste. Im ki şımə vindədən istikbori cəhbə, jıqo inğilob və İroni milləti vədə deşmonəti kardedə, bə ım xote ki inğilob bəjie”.

Ə Həzrət, kişvəri tojə nəslon bə inğilobi hədəfon səmti meyl peydo kardey, inğilobi bəji mandey nışonə zıneydə və hamiyəşe: ımruj millət bə həmonə hədəfon meylışone ki inğilob bəyon kardə, yəni milliyə isteğlol, milliyə izzət, milliyə rifoh, ictimaiyə ədolət, islamiyə ictima icod kardey və nəhayətədə İslamiyə tojə sivilizasiya icod kardey, ım inğilobi yolə hədəfonin. Imruj çəmə millət bə ım hədəfon meylışone”.

İroni İslamiyə inğilobi yolə Rəhbər həmçınin əlovəş kardə: ”İroni millət bəpe ım 2 qılə hərəkəti vədə muğavimət kon, (iğtisodi təziğ) ki de daxıli səyo cəhdi, sanksiyaon məhv kardey və həlbətə diplomasiya səyo cəhdi benəticə bəbe, iyən co qılə həm çı deşmənon mediya hərəkət və ləkə je siyosəti benəticə kardeye”.

Əzizə əməson bə ım bərnomə quş doe xoto şıməku təşəkkur kardm.

Dəvət kardəm bə co bərnoməon həm quş bıdənən.