Bo ehson və xeyrxahətiro xısusi ruj

Bo ehson və xeyrxahətiro xısusi ruj

Xəsə əməson səlom, şımə ruj bə xəyr bıbu. In şanqonə Həzrəte İmom Huseyn(ə)-i milad ruji sorəqardışi bə şımə xıdmət təbrik ərz kardedəm.

Əzizon, Xıdovəne xalığ Bəğərə surə 195 minnə ayədə hamiyəşe:

Xıdo bə har kəs ki pidəşbu be hisob-kitob çoki kardedə və Xıdo çokəti kardə kəsonış pidə.

Əzizə duston, ısət təğribən 30 sor bəbe ki İroni islamiyə inğilobi təsisəkə, İmom Xomeyni(r), "İmdod kumitə" binovrəş noə, və İroni təğvimədə ım idorə bə istesmor rəsə ruj, yəni Esfəndə manqi 14 minnə ruj, "dast qəte və çokəti" ruj nom noə bıə. Əlbətə ki dast qətey və çokəti xususi zəmonədə məhdud ni əmmo ım ruj çokəti və dast qəteyro, qıləy ulqu heste.

De diğğət bə ım ki ımruj həm Esfəndə manqi 14 minnə ruje, ım bərnomə həminə mıvzo barədəy, dəvət kardəm dəmə bə ico bımandən.

Mehribonon, ictimaədə ədolət bərpo kardey, osmoniyə dinon muhimmə hədəfonku qıləyni bə hisob omeydə. Əmmo bə ictimai ədoləti rəsey xoto, infoğ və komək kardey, İslam dini vey muhimmə roonku qıləynie.

Rəhmonə Xıdo vaxti deştə mehribonə Rəsoli sıxən voteydə, infoği çı muminon nışonəonku qıləyni elan kardə və əmrış doə ki Ğıroni iminnə ayəonədə, yəni Bəğərə surə, i minnə ayəondə, ğeyd bıbu ki Xıdo bəndə bey roy, çiçe? Xıdo ım ayəondə hamiyəşe:
“Ə əzəmətinə kitobki , bəvədə hiç qılə şəkko- tərdid ni iyən bə pokon və pərhizkaron ro nışo doydə. muttəğion və pokon, ə şəxsonin ki , bə ğeyb aləmi bovəşon heste, nımoji bərpo kardən və bəvon doə bıə ruziyo, infağ ( baxş ) kardedən.”

Xıdo həminə surə vəoməy ayəonədə bə əvoni ki ıştə ruzi infoğ kardedən bənə bərəkətinə donəon zıneydə ki məhsuldorə zəminədə ğəror qətəşone, har qılə ım donəonku, haft huşə və har huşədə sa qılə donə doydə və həlbətə Xıdo əqə dılış bıbu, bə har kəsi çımiku həm vey bədoy.

İslom insoni imtıvoniro, ım modiyə dınyo bənə, qıləy mıvəğğətə vırə zıneydə.

Fəğr, ım imtıvononku qıləynie, və co qılə ki fəğri beyku həm vey saxte, sərvəti soy beye. modi fəğr yəni dınyoədə saxtəti, ki qıləy ruj ım saxti bə oxo bərəse, əmmo qıləy sərvət soyb bıə şəxs ki ictima və ehtiyocinə şəxson miyono ıştə məsuliyət əncom nıdo, əbədiyə saxtəti çəy intizorədəy.

De təəssufi kofr və fəğır bə yande vey nezin, vaxti fəğr qıləy bəku daxıl bıbu, İmon co qılə bəku xarıc bəbe, Həzrəte Əli(ə) həm fəğrırəti, çı insoni dini nağisəkə, və çəy fik və əğıli məhvəkə zıneydə. Ə Həzrət(ə) ıştə həmmə mol-sərvəton bə ehtiyocinə şəxson komək karde royədə vəğf kardəş be və ıştən həmişə bənə vey fəğırə odəmon jimon əki. Həmişə bə Xıdo dərqoh dıvoş be ki Pərvərdıqoro çıme abro de mıhtoc nebey vositə oqət, və çıme şəxsiyəti de fəğırəti vositə məhv məkə. Peşo əmə həm karde bəznemon bənə Həzrəte Əli(ə) sərvətmand bıbəmon, əmmo sodə jimon bıkəmon.karde bəznemon sərvət qırd kardey əvəzi bə ehtiyocinə şəxson ehtiyoci miyoniku barde fikədə bıbəmon və ım royədə ictimaiyəti bə ədoləti nez bıkəmon.

Əzizon, Həmçınin İmom Əli(ə) tovsiyə kardəşe ki mıhtoc bey faxti de infoğ və sədəğə doey vositə de Xıdo mıomilə kənən. Ə Həzrət(ə) etığadış heste ki infoğ və əbaxşəti bois bəbe ki insoni ruzi vey bıbu və ilahiyə bərəkəton nozil bıbun. Har kəs Xıdo rizoyətiro, har miğdor ki bıbu qıləy mol-sərvəti infoğ ko, Xıdo çəy mokafati bədoy, bənə qıləy bərəkətinə donə ki çəyku haft huşə, və har huşəku sa donə icod bəbe. Im çı Xıdo vəedəy ki beşək əncom bəbe.

Co tərəfiku Xıdo Ğıronədə hamiyəşe ki şımə mol-sərvətonədə ehtiyocinə şəxsonro qıləy həx heste, və əvon ki ım həxi bıdon, beşək muminon və perəxə bıə kəsonin. Həzrəte Əli(ə) ım barədə hamiyəşe: "xıdovənd sərvət soyb bıə şəxson mol-sərvətonədə, ehtiyocinə şəxson xorək və ehtiyocon təyin kardə, peşo hiç fəğirə şəxs ni ki vəşi bımando, illa ım ki qıləy sərvət soyb bıə şəxs çəy həxiku istifodəş kardə və Xıdo əvon bə ım ko əncom doe xoto, mızəmmət bəkay".

Həmçınin Xıdo Rəsul(s) qıləy rəvoyətədə hamiyəşe:"har kəs bəştə mısılmonə bıvə vanqi quş bıdə və əy norohəti və ehtiyociku nicot bıdə, Xıdo bəyro da qılə çokəti və mokafati bənıvışti və çəy məğom və vırə da dərəcə barz bəkay, da qılə bəndə ozod kardey mokafat bədoy və da qılə yolə mısibəti çəyku diyəro bəkarde və çəvonku həmmə vey muhimm ıme ki ğiyomət rujədə, bəyro da qılə şəfoəti hozzo bəkarde".

Əmmo Əeme Məsomin(ə) nə ınki həmmə kəson bə infoğ və əbaxşəti tovsiyə əkin bəlkəm çokəti royədə, ıştən vey çokə ulqu bin. Qıləy rəvoyət heste ki qıləy ruj İmmom Həsən(ə) və İmom Husein(ə) noxəş bin və Həzrəte Əli(ə) və Həzrəte Fatimə(s) çəvonro nəzr kardeşone ki əqə çəmə hırdənon çok bıbun, 3 qılə ruji mıddətədə, rujə bıqətemon, vey rə çəvon hırdənon səlomət bıən və nəzri əncom doey zəmon be. İ minnə rujədə və iftor zəmonədə Həzrəte əli(ə) və Həzrəte Zəhra(s) kəy bə qıləy ehtiyocinə şəxs omə, və Əhle Beyt(ə) ıştə xorəki bə əvon doşone, 2 minnə rujədə ıştə xorəki bə qıləy yətim doşone və ıştən de ovi iftor kardışone və 3 minnə rujədə qıləy əsir bə çəvon kəy bə omə və ıştə xorəki bəy doəşone. Xıdo ım infoğ iyən əbaxşətiku vey şo və rozi bıə və Xıdo Rəsul(s)-i xandani məğomədə, İnsoni Surə nozil kardeşe.

Mehribonə əməson, Ğıroni mədəniyətədə "ruzi" əlovə bə modi çiyon, bə mənəvi çiyon həm şomil bıdə. Bə çəy xotoe ki Əeme Məsomin(ə) nə ınki ıştə mol-sərvəton bəlkəm bo İslam və mısılmononro ıştə həmmə umri ləzzəonədə, infoğ kardəşone və vey çəvonku bənə İmom Huseyn(ə) bo islom dini muhafiə kardeyro, hətto ıştə con və abru həm fido kardeşone.

Muminon, zıneydən har çi ki soybin, qıləy əmonəte ki bə Xıdovəndi çokəti xoto bə əvon rəsə, əvon ım əmonəti de infoğ və əbaxşəti vositə, tojədən bəştə əsliyə soyb yəni Xıdo obəqardonen.

Əmmo infoğ kardey çand qılə rəsm və adət heste:

• İ minnə ıme ki bəpe bə ehtiyocinə şəxson komək kardeyədə navəjən bıbəmon, yəni bəpe əmə bə çəvon səmti bışəmon, nə ımki əvon ıştə dasti bə çəmə səmti dıroz kon.
• Dı minnə ğaidə ıme ki çokə çionku bə mıhtocon infoğ bıdəmon, nı ə həmonə çion ki bəmə çok ni, ya kanə və ğeyre istifodə kardəninin.
• Se minnə ko ıme ki bə ehtiyocinə şəxsi abru oqətey həmçınin dı dimətiku diyəro mandey xoto, infoğ bəpe niyon və məxfi surəti əncom bıbu.
• Ço minnə məsələ həm ıme ki infoğ de minnət ya əzyət və əzobi bə ico nıbuvə de xoşə əxloği de ehtiyocinə şəxson dim bə dim bəbəmon.

Mehribonon bə ım bərnomə quş doe xoto şıməku təşəkkur kardedəm. Dəvət kardəm bə co bərnoməon quş bıdənən ki koy həmron bə şımə xıdmət təğdim kardedən.