Rəhbəriyyəti nəzə

Rəhbəriyyəti nəzə

Mehribonə əməson səlom, rujə mo rujonədə şıməro xəy, səadət və tovfiği urzu kardəm, və dıvo kardəm Xıdo dərqohədə şımə nımoj-rujəon ğəbul bıbun. əzizon Imsornə mıburəkə Rəməzanə manqi iminnə rujədə, de İroni Yolə Rəhbər, Həzrəte Ayətullah Xamenei iştiroki, de kərimə Ğıroni unsiyət iclos bərpo bıə ki vey hərorətin be. Dəvət kardəm de ım bərnomə bə ico bımandən ta həminə iclosi barədə bə şımə xıdmət məlumat bıdəmon.

Xosə Tolışon, jəqo ki zıneydəmon Rəməzon əziz və bərəkətinə manq, çı kərimə Ğıroni manq elan bıə iyən ım manq vey çokə zəmone ki həm ıştəni və həm çəmə hırdənon Ğıroni royədə ğəror bıdəmon, boçiki Rəməzanə manq tojədən bəji bey iyən perəce manq bə hisob omeydə. Jəqo ki İmom Bağır(ə) hamiyəşe: “ har çi bəharış heste və mıburəkə Rəməzonə manq Ğıroni Bəhare”.

Bəle əzizon jəqo ki votımone ımsornə Ğıroni iclos İmom Xomeyni(r) huseyniyədə de Kərimə Ğıroni kali hafizon, ustadon, beynəl xalğə mımtozə ğarion qırdə bey vositə bərpo bıə və de kərimə Ğıroniku çandə ayəon təlovəti, bə ım mərosim və bə iştirokəkəyon coni vey səfo doşe.

Əmmo Ayətullah Xamenei, ım mərosimədə, bə Ğıroni nomonku qıləyni yəni “zikr” işorəş kardə iyən İlahiyə kitobi, “mozəkker” yəni yod varde bə hisobış varde və hamiyəşe: “ Ğıron zikre. Həğiğətədə, zikr rabitə əbzore. əqə pidəmone de Xıdo rabitəmon bıbu, de beheşti rabitəmon bıbu, deştə aliyə zoti ki Xıdo bəmə ğəror doəşe, və karde bəznemon bəy bırəsəmon, və bəy əməl kəmon rabitəmon bıbu, bəpe bə Xıdo yod bıbəmon. əqə Ğıron çəmə yodiku bışo, ğəflət hasil bəbe, və ım ğəflət həmonə çiye ki Ğıronədə vey bə çəy vəy qəte iyən çəyku əmonədə mandey nota doə bəy”.

Ə Həzrət ijən hamiyəşe: “har çəxtə ki şımə de Ğıron vey unsiyət bıqətən, zikr vey bəbe, və həlbətə və həğiğətədə “zikr” və “oqəte ya pərhiz” bə i məenoin. Iştəni oqəte ki məno iyən suluk əholi, bəy təkid kardedən iyən votedən, İnsoni uruci piləone, həmonə mığət beye. əqə morağibə be, ə mənəviyə hol həm bo insonm baği bımande. Çən Ğıroni təlovət kardey, ım xusiyəti şomil bıdə.”

İroni islamiyə inğilobi Yolə Rəhbər İslami ictima iyən bəşəriyəti ımrujnə muhim və əsosiyə ehtiyoconku qıləyni Ğıroni məarifi fam və dərk iyən bəy əməl kardey zıneydə iyən bə Ğıroni təkid de kufr, istikbor və tağuti muğabilə kardey işorəş kardə və həmiyəşe: “islami dınyo ımrujnə muşkilatonku qıləyni de Ğıroni məarifon oşno nıbey və bəvon əməl nıkardeye. Ğıroni dərk, muxtəlifə məərefəton bəon oj kardey bə hisob omeydə. Dəvardə 40 sorədə, İroni milləti heyrətomizə inkişof iyən ruj bə rujə izzət, bə muğavimət və Ğıroni əməl kardey xoto be. Və ımruj həm bə şəytonon və kofiron ğələbə kardey yeqanə roy bə hisob omeydə. çən əvoni ki bənə kali kişvəron podşoh və ya prezidenti, milləton sə zikkə jedən və bəvon zılm kardedən, həmonə kəsonin ki Ğıron mıstəğim surəti de əvon mığubilə kardey əmri doəşe və təkid kardəşe ki bə əvon etımo məkənən.”

Kərimə Ğıron qıləy mislış nıbıə hınə əsər bə hisob omeydə, Ayətullah Xamenei bə ım məsələ ki Ğıron bəpe iclosonədə hınə surəti ğeroət bıbu, vey təkidış kardə iyən hamiyəşe: “ cəmədə Ğıroni təlovət kardey qıləy hınə bə hisob omeydə. Qıləy hınə ki vey muğəddəse. Im hınə ki vey çok iyən barzə ğudsi hınəonku bə hisob omeydə, bəpe zikr və dəvəti xıdmətədə bıbu. Ğıron zikre, şımə təlovət bəpe zikr xıdmətədə bıbu, təlovət bəpe jəqo bıbu ki bə əməson imoni əlovə ko. Çən bəpe bə təlovət bənə qıləy adi hınə diyə məbu, və bəpe ə çiyon ki bə zikr və bə Xıdo dəvəti mane bıdə vəy bıqətəmon.Ğıroni de məhorəti ğeraət kardey iyən çəy iborəton səhih handey, bois bəbe çəy fam və təsir bə moxatəbon vey bıbu.”

Həzrəte Ayətullah Xamenei həmçınin hamiyəşe: “ımruj çəmə ğarion, co kişvəronku ki bənə ustad bə çəmə kişvər dəvət bıdən vey mımtoz iyən keyfiyətinin, ım qıləy iftixorinə vağeiyət bə hisob omeydə.”

Ə Həzrət ijən hamiyəşe: “əlovə bə Ğıroni ğeraət icloson, bəpe Ğıroni təfsiri icloson həm bərpo bıbu,ta ictimaədə dini və Ğıroni məarifi səth əlovə bıbu. dınyo və axırəti jimoni məsələon və prinsiponədə, de Ğıroni məarifon, ictima unsiyət ictima ğoyməti bois bəbe. Çən Ğıron bəpe tikror bıbu, az çan kərə ərz kardeme ki bəpe təlovət tikror bıbu, bəpe Ğıroni əvvəliku tosə oxo bıhandəmon və təmom kəmon, və peşo ijən bino kəmon, və jəqo dəvom bıdəmon.”

Xosə əməson bə ım bərnomə quş doe xoto şıməku təşəkkur kardəm, umidımon heste kərimə Ğıroni təlovət və çəy ayəon dərk kardey bəmə tovfiğ bıbu iyən çəy pənohədə bə oroməti və əmniyyəti bırəsəmon, xususi ım əzizə manqədə ki Ğıron və çəy ayəon təlovət kardey manqe.