Haftə nəzə
Haftə nəzə
Əzizə Tolışon səlom, şımə ruj bə xəyr bıbu, Rəməzanə mıborəkə manqədə, dıvo kardəm Xıdovənde Xalıği lutf, rəhmət iyən baxşış bə şımə ğesmət bıbu. ım bərnomədə pidəmone İroni dəvardə haftə muhimmə hadisəonku bə şımə xıdmət məlumat bədamon, dəvət kardəm bə ım bərnomə quş doe xoto, dəmə bə ico bımandən.
Mehribonon, dəvardə haftədə bə Ğuds beynəl xalğə ruji mınosibəti xoto, İslamiyə inğilobi yolə Rəhbər, Həzrəte Ayətullah Xamenei, qıləy televiziya nıtğədə, Fələstini milləti umid əbaxşə vəoməyku sıhbət kardə ki muğaviməti məydoni hevujəti, sionist rejim iyən çəy himoyə əkə Amerkə zəifəti çəy nışonəonin. Ə Həzrət ijən hamiyəşe: “fəğət de hərbi muğaviməti karde bəznemon islami dınyo məsələon xususi Fələstini məsələ həl bıkəmon. İjən hamiyəşe: Şərifə Ğuds, Fələstini ğəlb bə hisob omeydə,və həmmə işğal bıə Fələstin, Şərifə Ğudsi idoməy.”
Ə Həzrət bə Fələstini milləti mislış nıbıə muğavimət və ciqəmandəti işorəş karde iyən hamiyəşe: “ımruj Fələstin və Asiya ğərbədə (məğlub nıbıə irodə) de sionisti (məğlub nıbıə ərtış) əvəz bıə, və cinoyətkorə ərtış məcbur bıə ki ıştə hucuməkə nizomi bə mudafiə nizomi əvəz ko.”
Həzrəte Ayətullah Xamenei həmçınin hamiyəşe: Fələstini həmmə baxşon bə muğavimti meydon əvəz bıə və Fələstini millət etığadışon heste ki bəpe cihod idomə peydo bıkə. Im muhimmə məsələon nışo doydə ki sionist rejimi mığubilədə Fələstinıjon vey hozzoin, və bə cihodəkə təşkilaton icozə dodə ki har zəmon ki pidəşone bə meydon varid bıbun.”
Ə Həzrət dəvardə soronədə Fələstini vey muhimmə hadisəon ki icod bıə, sionist rejimi vədə sazış planon botil bey zıneydə be və hamiyəşe: “ Fələstini barədə hiç qılə plan ki Fələstinıjon nıbey ya çəvon nəzə əkəs bıbu, icra nibəbe, və ım yəni çımiku bənav həmmə sazışoni, bənə Oslo, ya 2 qılə dıvlətış bıə ərəbi plan ya əsri mıomilə ya tojədən əloğəon normal kardey təhğiromizə planon botil bıən”
Seşənbə əsrədə həm Həzrəte Ayətullah Xamenei de universiti tələbəon vindemonədə, Fələstini mıvzo barədə, islami dıvləton funqsiyaku vey şiddtin tənğidış kardə iyən hamiyəşe: “de təəsufi islami dıvləton vey bıvəc surəti əməl kardən, iyən hətto pidəşon ni ki Fələstini mıvzo barədə sıxən voteyku imtino kardən, kali çəvonku təsəvvur kardən ki bə Fələstini komək kardey yeqanə roy, de sioniston rabitə bərğəror kardeye, qıləy holədə ki ım qıləy yolə xətoe.”
əmmo əzizə əməson, İronədə Ğuds beynəl xalğə ruji aksiyaədə, iştirokəkəyon zinə Ğətnomə ğolibədə, Şərifə Ğudi ozodəti, sionist rejimi sultəku Fələstini məzlum və be mudafiə milləti nicot doe iyən bo ım xərçənqə vəzi məhv karde, çı islami dınyo barzə hədəfi elan kardeşone. Im ğətnomədə beynəl xalğ iyən məntəğə təşkilatonku tələb bıə ki de əməli və zumandə ğərolon əncom doe vositə, Fələstini məsələ həl kardey yeqanə royku himoyə kon. Dınyo həmmə məntəğəonku Fələstini avarən oqardey, bo ım kişvəri vəomeyro ozodə səçın bərpo kardey və Fələstini strateqiya yəni “ فی البحر الی النهر” –iku himoyədorəti kardey ım hələkə roonin.
Xosə Tolışon ım haftədə co qılə xəbə, Fars dıyo barədəy, jəqo ki zıneydəmon ımruj Miladi 2022 minnə sori Aprelə manqi 30 ya Şəmsi 1401 minnə sori Urdibeheştə manqi 10 minnə ruje ki bənə Fars dıyo milliyə ruji nom noə bıə. ımruj, Miladi 1622 minnə sori, İroni cənubi ovonədə portuqaliya istemorəkəyon ixroc bey sorəqardışe.
həminə mınosibəti barədə, İron İslam Respublika xarıci vəzarətxonə qıləy bətoniyədə elanış kardə ki: İron de hamsuyəti siyosəti vositə, umidış heste ki Fars dıyo, məntəğə əmniyət və stabiləti cəhəto, əmnə vırə bıbu, və məntəğə milləton miyono dustiyəti, sulh iyən ittihodi nışonə bıbu.
Im haftədə co qılə xəbə dışənbə ruji Ayətullah Seyed İbrahim Rəisi nıtği barədəy ki votışe: Əfğanıstonədə Amerkə və Nato iştirok ğərəz vironə və ğətliam co nəticəş ni. Rəisi bə ım nuktə işorəş karde ki İron de har hərəkəti ki dınyo bə i ğotbi səmti hərəkət bıdə muxalife, əv əlovəş do: Ukraynaədə canq və dave muhimme əmmo bəpe bə Əfğanıstoni bıhron iyən çəvon milləti muşkilaton həl kardey həm vey diğğət bıbu.
co qılə xəbə həm ım ki, Fərvərdinə manq İroni ticari təraz mısbət be həminə barədə İroni qomruk moavin votışe: Fərvərdinə manqədə, İroni ğəyre nat ixracat bə 7 milyono 324 həzo ton rəsə ki çəy erj 3 milyardo 699 miyon dollare. Im miğdor dəvardə sori muğaisədə 25 faiz əlovə bey nışo doydə.
Əsqəri ijən votışe: həminə manqədə İroni idxol 2 milyono 252 həzo ton be ki çəy erj 2 milyardo 824 həzo be.
Imi həm işorə kəmon ki, pencşənbə rujədə Niyuyorkədə bə inkişof rəsə moliyə təmin nomo iclosədə, İ bıə milləton Təşkilatədə İroni daimə nımoyəndə və səfir, Məcid Təxte Rəvançi votışe: qıləy holədə ki beynəl xalğə ictima, muxtəlifə cəhəto çand tərəfiyə həmkarion zumand kardey zərrurəti barədə ıştə təəhudi elanış kardə, əmmo de ım vıcudi vey kamə kişvəronin ki bə məğlub bıə roy iyən unilateralizmi səmti şeydən, hətto dınyo ım bevəcə və mislış nıbıə şəroyetədə.
xosə Tolışon bə ım bərnomə quş doe xoto şıməku təşəkkur kardəm, dəvət kardəm de Tolışi Rədio bə ico bımandən.
