Həşi matəmədə

Həşi matəmədə

Əzizə duston səlom, ımruj de Xordadə manqi 14 minnə ruji bərobəre ki Həzrəte İmom Xomeyni(r)-i rehlətə ruji sorəqardışe, ım matəmə ruji bə şımə mehribonon təsliyət ərz kardəm. əzizon həmçınin Maştə Xordadə manqi 15 minnə ruji xuninə ğiyomi sorəqardışe ki ım mınosibəti həm bə şımə təsliyət ərz kardəm.

“Muminon miyono merdoni hestin ki, bəştə de Xıdovəndi bastə əhd-peymoni bəfo kardeşone. (ıştənışon cihodiro hozzı kardeşone)çəvon kali qıləyni bəştə əhdi bəfo kardeşone(şəhid bin). və bəzi qılon həm(şəhodəti) intizorədən və hiç faxti(ıştə əğidəşon) əvəz nıkarde.”

Bəle əzizon, İmom Xomeyni(r), jəqo ki Xıdo Əhzabi mıburəkə surə 23 minnə ayədə hamiyəşe, de Xıdovənde Xalıği, ıştə əhd-peymoni bə oxo rosniyəşe və ım əhd har çəxtə ğəşənq iyən əbədi be.

Xosə Tolışon ıstə 33 sor bəbe ki ım yolə şəxsiyəti rehlətiku dəvardedə və har sor və həminə rujədə İmom Xomeyni(r)-i aşiğon çəy pokə hərəmədə qırdə bəben iyən tojədən de çəy hədəf və idealon əhd bastedən. Bəle İmom(r) ıştən çəmə cəmədə ni, əmmo çəy yolə hədəfon iyən şivəon həmişə çəy hırdənon dılədə bəji bəmande. əv islami umməti dədə be. Həmonə ummət ki hiç vaxt marzış nıbe.

Mehribonon vaxti qıləy inson bə rəhmət beşo, qədə qədə çəy şikil iyən yod insonon yodiku məhv bəbe ya vey noməlum bəbe, əmmo ım miyonədə bəzi kosonin ki həmişə çəvon yod bəji mandedə. Im şəxson millətonro bənə həyotəbaxş iyən nurin ki bə ictima qaməti baxşedən.

əcumlə ım şəxson İmom Xomeyni(r) be, qıləy holədə ki 33 sor bəbe ki İmom Xomeyni(r)-i rehlətiku dəvardedə əmmo çəy nom, yod, fikon, idealon həmçınan mubariz iyən həxtələbə insononro bənə çiroğ iyən zumandə roy bə hisob omeydə.

İmom Xomeyni(r)-i məktəbi vey muhimmə xusiyətonku qıləyni, zumandə kişvəron iyən xarıci kişvəron mığubilədə, muğavimət kardey be. Həlbətə tule torixədə vey yolə şəxson bin ki zılmi vədə mubarizə kardışone əmmo nəhayətədə ıştən həm zılmi hərəkəton miyonədə qiriftor bin. əmmo İmom Xomeyni(r)-i məktəbədə, zılmi vədə mubarizə bardey de Xıdo və təvazokorəti və nəfsi vədə mubarizə bardey bə ico be. İmom Xomeyni(r) hiç vaxt ım 2 qılə baxşon yandeku co zıneydə nıbe iyən həmişə ictima iyən siyosət meydonədə, istikbori ğudrəton mığubilədə muğavimətış əkardi. Və ıştə nəfsi pok kardeyro de nəfsi həvo mubarizə əkardi. Bə çəy xoto be ki hiç vaxt bə islamiyə ictima Rəhbəriyəti rəsey, əy bə ğudrət iyən dınyo tələbəti səmti hərəkət nıdoşe.

İmom(r) və çəy şoqirdon həmmə şəroyetədə de Xıdo nomi, Xıdoro iyən bə Xıdo səmti hərəkət kardedən. İmom Xomeyni(r)-i məktəbi şoqirdonku qıləyni şəhid ustad Murteza Motəhhəri be ki votəş be: ə çiyon ki İmom(r)-i ruhiyəku dərk kardəm nə fəğət bə çıme təəccubi bəlkəm bə çıme imoni əlovəş kardə”. Bə Ustad Mottəhhəri nəzə əsos, İmom Xomeyni(r) çand qılə məxsusə xusiyətış be, i minnə ım ki İmom bəştə hədəf imonış be, əqə həmmə dınyo cəm bıbun karde zınəşon ni ki İmomi hədəfi əvəz kon. 2 minnə xusiyət ım be ki İmom(r) bəştə hədəfi rəsey roədə, vey ğoym be, və 3 minnə muhimmə xusiyət həm ım be ki İmom(r)-i imon bəştə Pərvərdıqor vey zaumand be, əv həmmə koonədə, Xıdovənde Xalıği dasti oşko surəti vindeydə be.

İmom Xomeyni(r)-i vey yolə urzuonku qıləyni ım be ki nə fəğət İroni millət bəlkəm həmmə mısılmonə milləton bəştə əsoləti iyən şəxsiyəti oqardonon, və ıştə bə inkişof rəsə mədəniyətiku ki islami diniku təsirış be aqah bıbun, və bə co kəson həm yod bıdən və həminə royku bə ğərb vabəstə məbun.

Bəle əzizon, ıştəni bovə kardey nışonəonku qıləyni ıme ki qıləy şəxs bəştə ehtıron bınə iyən bə ıştə zumandətion bovəş bıbu. İmom xomeyni(r) həminə mıvzo barədə hamiyəşe: muhim ıme ki əmə ım cıvonon və hətto piə odəmoni fiki hozzo kəmon ki əmə ıştən odəmimon, və jəqo ni ki həmmə baxşonədə çəmə dasti dıroz kəmon. əqə şımə bovə kənən ki əmə həm insonimon və fiki ğudrəti soybimon, çən muvəffəğ bəberon.”

Imruj İroni islamiyə inğilob nə fəğət mıstəğilə inğilobe, bəlkəm dınyo kişvəron miyonədə de iğtidor surəti zılm iyən beədoləti vədə bənə muğaviməti nışonə bə hisob omeydə. bə çəy xotoe ki həmmə kəson ki pidəşone de sultə nizomi vədə mubarizə kon, ım inğilobiku ulqo qəteydən və həminə məsələ Amerkə, İnqilis iyən çəy mıttəfiğon əsəboniyəti bois bıə.

İmom Xomeyni(r) ıştə vəsiyətnomədə qıləy roy nışo doəşe ki əqə inson ım royədə hərəkət ko, bə hədəf iyən səadət bərəse. Ə Həzrət ıştə vəsiyətnomə əvvələdə bə Səğəleyn hədisi işorəş karde, İmom Xomeyni(r)-i nəzəku ə çi ki milləton bə səadət iyən ozavziyə səmti hərəkət bədoy iyən dınyoədə ədolət bərpo kardedə, Ğıroni təlimonku istisodə kardey iyən hukuməti rəhbəri bə loyiğə odəmon aspardeye.

Əqə Hukumət bə mənəvi və dini erjon əsos bıbu, de zılm, fəsod iyən təcavuzi muxalif və ğudrət tələbə odəmon mənafe təhdid ko, be şək həminə hukumət deşmənon səmtiku vey təhdid bəbe. əmmo əvoni ki Xıdo roy vıjniyəşone və həminə royədə muğavimət kardən, Xıdo həm bə əvon komək bəkarde və beşək səbarz bəben.

Səmimi həmzıvonon bə ım bərnomə quş doe xoto şıməku təşəkkur kardedəm,dəvət kardəm de Tolışi rədio bə ico bımandən və bə co bərnoməon həm quş bıdənən.