Əsədullah Əsədi bə Tehron varid bıə

İroni diplomatiya, Əsədullah Əsədi bə Tehroni İmom Xomeyni(r) aeroport varid bıə.

Bə İran Peres aqentiyəti raporti əsos, Vyanədə ko kardə İroni diplomatiya Əsədullah Əsədi ki çımiku bənav bə mınofiğon qədə qrupon həmlə kardey cəhət plan kəşey pesoxtə bıə ittihomi bəhonə Almaniyaədə dastqir bıə be İron və Belçika təvafuği bəpeşt və de Omani vositəçiyəti, zinə ozod və de Devləti sıxənəvot Əli Bəhadori Cəhromi və Bəşər həxon ğərorqoh sərkatib, Kazım Ğəribabadi xoş omey bə Tehron varid bıə.

Zinə Omani xarıci vəzorətxonə de qıləy bəyoniyə muntəşir kardey vositə elanış kardə ki Oman muvəffəğ bıə İron və Belçika miyono vositəçiyəti icod bıko və ım diplomatiya ozod kardey bois bıbu, Tehron və Broccel səmtiku həmonə şəxson ki ozod bıən, zinə bə Maskat ovoştoniyə bıən.

Bə Omani aqentiyəti raporti əsos, İron və Belçika təbəə məsələ həlli komək kardeyro, 2 qılə kişvəri veyə tələbon cəvobədə, Oman ım məsələdə vositəçiyəti əncomış do ki çəy cəhdon bə nəticə rəsə.

Həmçınin İroni xarıci vəzir, Huseyn Əmirəbdullahiyan həm qıləy Tıvitterədə nıvıştəşe: çəmə be qınohə diplomatiya, Ağaye Əsədollah Əsədi ki beynəlxalği əks və de ğeyri ğanuni surət, 5 soriku vey, Almaniya və Belçikaədə dastqir be, ısət bəştə vətəni oqardey royədəy və vey rə bə çəmə əzizə İron varid bəbe. Im royədə, Omani hukuməti mısbətə cəhdonku ğədrdonəti kardedəm.