Tacikistoni bə İroni ələyh bıə ittihomi siyosət de kon hədəfiye?
Tacikistoni bə İroni ələyh bıə ittihomi siyosət de kon hədəfiye?
Tacikistoni televiziya çandə ruj çımi bənav(Avqusti 8-ədə) de qıləy şubhəninə filmi bə efir doey,ironış çı tacikistoni daxili canqi devronədə bə kutləvi ğətlon xoto mıttəhəmış karde.ım sənədinə film zohirən çı tacikistoni 1990-ə miladi sor bıə daxili canqon həxədə kəşə bıə.bə ın şubhəninə hərəkəti iqlə mıştərəkə tarıx iyən mədəniyyətışon bıə İroni iyən Tacikistoni piyəkəson tərəfiyo mıxtəlifə reaksiya nışon doey bıə.
İron İslom Respublikə Duşənbədə bıə səfərotxonə bilafosilə çın filmi doey bədiqə de qıləy bəyoniyyə vositə bə ironi ələyh bıə puçə ittihomış təkzib kardə və nıvışteşe:
...bın filmədə çı məhbuson tərəfiku bıə etırofon nə şəxsonku nəğl kardedən ki,əvon ısət çı dınyoku şıən və təbiiye ki,çımi hiç qıləy etıborış ni.
İroni tacikistonədə bıə səfərotxonə təkidış karde:Tacikistoni şərifə milləti hafizə çok bə yod vardedə iyən çı yodo nibebəkarde ki,İron İslom Respublikə Tacikistonədə sulh iyən aşişəti əsliyə bani iyən təzmin kardə kəsonku be və Miladi 90-ə soron çın kişvəri daxili canqi bə oxo rosneyro çı dave kardə dı tərəfon miyono konstruktivə mızokirəon icod kardeyədə çı rolış hestebe.
İroni de mərkəzi Asiyə sektorədə bıə məmləkəton rabitəon nizomnomədə,İroni de tacikistoni miyono rabitə ziyodə əhəmiyyət kəsb kardedə.ım əhəmiyyət dıqlə həyğətiku nəşət seydə:
-əvvəla ironıjon de tacikon miyon qıləy kanə dini,zıvoni iyən fərnəhqiyə əloğə movcude və ım rabitəon hiç vaxti bə məntəğə geopolitik vəzyəti xoto çı miyoniku şıəni.
2-əmmo dıminə həyğət siyosi ərsədə oşkoye.İron çə kişvəronkuye ki,iminə kərə çı tacikistoni mustəğilətiş bə rəsmiyyət zıne və çəy bəpeştə həm tacikistoni daxili canqi zəmonədə yəni 1992-ku de tosə 1997-i bo ım daxili canqi bə oxo rosney koyədə veyə cəhdonış karde.
Şək ni çım iddioku bəhs kardey iyən ironi bə tacikistoni daxili canqon vaxti bıə mudoxilə qılə vavunəsə co çi ni. Kali adyirəon de ın ro çı dıqlə dust iyən həmzıvonə məmləkəti miyono qıləy rıxnə eğandey dumon.əmmo çı ironi de tacikistoni miyono əloğəon sard kardey dumo blıə kəson kon şəxsonin?
Bəzi eksperton bə ın məsələ işorə kardedən ki,bın mevzuyədə bəbe bə ironi de tacikistoni rabitəon xərob kardə regional iyən məntəğku bə kəno bıə ğıvvon roli işorə kardey bıbu.
Bə Sputnik aqentəti məlumati əsos,urusə siyosi ekspert Aleksandr Knyazov Bişkekədə bə Fars aqentəti məlumat doəşe ki,de taciksitoni qıləy televizya vositə bo ironi de tacikistoni rabitəon bəyənde jıeyro bıə pevolo kardə bıə ım oxonə cəncolinə film de Səudiyyə Ərəbıstoni vositə soxtə bıə.
Im atmosfera təğribən dı sor çımi bənav çı tacikistoni islom inğilobi partiyə fəaliyyəton ətrofədə bə əməl ome.qıləy holədə ki,çın mevzu rəğ-rişə bəbe co vırədə bınəvo.Murtəza Səfari Nətənzi İroni islomi Şura Məclisi milli əmniyyət komissiya iyən xarici siyosəti uzv etığodış heste ki,bın ğəziyyədə çı Ərəbıstoni lınqi riz bəçəş çiyedə.əv bın zəminədə de Əlaləm kanali mısohibədə votəşe:Ərriyad,de bə tacikistoni kali rəsmi şəxson rışvə doey,ıştə bə İron İslom Respublikə ələyh bıə hərkəton cənubi hamsuyəti sahəku bə ironi şərği iyən şimoli hamsuyəti tərəf kəşəşe.Ərriyad cəhd kardedə bə tacikistoni zəyifə ixtisodi maliyyə koməq kardey bəhonə,çın kişvəri de ironi miyono bıə rabitəon xərobko və ıştə məntəğədə bıə hədəfon bə vırə bırosno.analoji mevzu əfğanıstonədə həm bə əməl omə.
