Ğıroni prizmaku jimoni məhorəton
Ğıroni prizmaku jimoni məhorəton
Inson de mıxtəlifə emosiyaon iyən sıfəon ıştə jimonədə dim bə dim bedə iyən çoko ki,ım sıfəton çok-çoki mudiriyyətko,qıləy solimə fərdi iyən iştimayi jimoni bə dast vardey bəzıne.ehanə əmə bızınəmon ki, çokonə mısbətə sıfəton ıştədə ziyodkəmon iyən mənfi və boəmə hiç qıləy foydəş nıbə sıfəton bə kamkəmon,ım ıştən qılə hınəy.umumən fərdon əksəriyyət ıştə mənfiyə sıfaton kontrol kardey koyədə de problemon dim bə dim omeydən və de ın sıfəton ozavziye əsliyə muşkilaton buruz pəydu kardedə.çın mənfiyə sıfətonku qıləyni həm hərisətiye.
Əxloği elm istiloh iyən terminədə omə:”hərisəti qıləy nəfsoniyə sıfət iyən holəte ki,insoni bəçəy ehtiyoc nıbə çiyon qıləy mıəyynə hədd- mığdori iktifo nıkardə holədə cəm kardey vadar kardedə.
Camaati veyni deməkə ki,çokə asayişışon heste,əmmo bəştə hərisəti xoto oroməti hiss kardedənin və hejo ruhi cəhəto əzobədən.təmə iyən əndozəku vey tələb kardey iyən hərisəti boyis bedə ki,əvon ıştə dastə bıə çiyonku ləzzət vindedənin iyən hejo ğeyri-mumkinə çiyon bə dast vardey koyədə bihudə cəhd kardedən və çəvon dastədə bıə çiyonku çokə bəhrə bardedənin.jıləvoniye ki,inson xarəti iyən zılləti ğəbul kardedə iyən izzət və kəromətiku bə diyəron.
Təmə` iyən hərisəti Kərimə-Ğıronədə de “hulı” təbir bedə.ım sıfət Ğıroni prizmaku harçənd çı insoni zotiyə sıfətonkuye,əmmo hiçvaxti fitriyə noğisəti unavnədə hisob bedəni.zira hərisəti sıftənə mərhəldə bə kəmoli tərəf hərəkət karde vositəy iyən bə insoni zu və ğıvvə baxş kardedə ta əv ıştə koonədə dastpoçə bıbu və çı ko iyən məşğuliyyətiku nımando və hejo bə kəmoli aliyə dərəcəon rəsey koyədə tiki həm vey təşnə bıbu.əgər inson ım xısləti boştə elm iyən zıney kəsb kardey royədə xarcko,bəvədə inson çı elmi aşığ iyən həris bəbe və çı kəmoli əbzoron pəydu bəkay.əmmo əgər qıləy insoni sə de dınyo maddiyati iyən moli cəm kardey ğal bıbu,ım bəçəy bədbəxtəti boyis bəbe.ım sıfət bənə qıləy ğudrətiye ki, Xıdovənde-Aləmi əvış ətomi ğıvvədə ğərolış doə.ehanə bəşər ım ğıvvə bo sənaye iyən ixtisodi ehtiyocon təmin kardero çəyku oko bıdo,hukmən əv foydənin iyən xeyrış bəbe.əmmo əgər haxafti çəyku bo vironəkə bombəon soxtero istifodə bıbu,ım bə bəşəri şər iyən fəsodi boyis bəbe və dınyo əmniyyət de təhlukə iyən xəto dimbədim kardedə.bəçəyro təmə` bə faxti məzmum iyən bə xoş omeydəni ki,əv çı maddiyə hədəfon dumo bıbu və bın zəmon bənə pəxıləti və sayirə bə xoş nıomə xısləton bə əməl vardedə.
Xıdovənde-Xalığ “Adiyat”-i surə 8-ə ayədə hamyedə:yəni və həyğətən əv bə moli qıləy şiddətinə rəğbətış heste.bə ın ayə əsos, çı insoni xısusiyyətonku qıləyni bə mol-devləti zumandə məhəbbət və rəğbəte.de ım xısləti ruşd iyən ozavziye hərisəti qıləy bə xoşnıomə rəftor iyən sıfəti surətədə cilvə pəydu kardedə. həlbəttə,bənə mılki soyb bıey iyən rifohinə jimoni sırfən bə maddiyəti dığət kardey hərisəti hisob bedəni və hətto ım ko tarıif həm kardə bıə. əmmo qahi faxti sosyal,ixtisodi iyən fərhənqi amilon qıləy zəminə hozzı kardedə ki,hərisəti iyən təmə` ziyod kardedə.
