Şəhid Rəcayi iyən Şəhid Bahunər

Şəhid Rəcayi iyən Şəhid Bahunər

Məhəmməd Əli Rəcayi 1312-ə Həşi sori Ğəzvin şəhrədə bə dınyo omə.çəy pı koəkə be və Ğəzvini vıjorədə de hırdavat molon həvatey məşğul be.əv ıştə pı ço sinnədə çı dastoş doe və çəysə da sor yol bıə bo biyədə ko kardedəbe.çəy mo həm sıbi vaxtiku de tosə şəvi pambə ovışkıneydəbe və fındıx,viz iyən badam arıştedəbe.əve çəy daston həmmə təkəbe mandəbe.Şəhid Rəcayi jimoni çəy ıştən zıvoniku bıməsəmon:

13 sinnım hestebe ki,bə Tehron omim.Tehronədə sıftədə adiyə koon kardedəbim.az Tehronədə de dasti çiyon həvatedəbim iyən şoqirdəti kardedəbim.vey şom ki,çı hırdənətiku de Tehroni cənubədə bıə jimoni komilə surətədə oşnom.bə qıləy səbəbi xoto kuçəonədə dastədə həvatey koşon cəmışon karde və mı de ibtidayi şəşminə sinfi sənədi bə Həvo Ğıvvon şim.Həvo Ğıvvəonədə xıdmət kardə holədə bəştə dərsonım dəvom doe iyən attestatım se.bın fosilədə de cənab Taliğani oşno bim və əv bəmı mellim bıeyış məsləhət zıne,və holın ki,az əfsər bıey əzınim.

Şəhid Məhhəməd Cavad Bahunər 1312-ə Həşi sori Kerman şəhrədə vey kanə iyən xərobə vırə bıə qıləy məhəllədə bə dınyo omə.çəy pı həmçinin qıləy bəroməş kam bıə hırdavat həvatə kəs bıə.əv ıştə attestat sıey bəpeştə bə Ğom şəhri tərəf hərkətış karde və əyo Feyziyyə mədrəsədə de hovzəvi dərson umutey məşğul be.əyo yolə alimon dərs doydəbin ki,Məhəmməd Cavad oruzu kardedəbe ki,çəvon palu dərs bəhando.əv fiğhış çı Ayətullah Burucerdi palu iyən usulış çı İmom Xoçmeyni(r) palu umuteşe.əmmo  Məhmməd Cavad de hovzəviyə elmon ğane nıbe.ıştə diplomış Tehroni ilahiyyat universtetdə həm sıəşe və həmçinin tehronədə çın fakultə dokturantura həm oroxnəşe.

Rəcayi iyən Bahunər dıqlə inğılobiyə dust iyən mıborizə şəxs bin ki,ıştə mıştərəkə xatirəşon çı Pəhləvi rejimi həbsxonəonədə binoşon kardəbe iyən de tobə ıştə oxonə nəfəsi həm iyənde kəno mandin.dıqlə dust ki,bo xıdmət kardey piyəkəson vey çokə ulqu bin.inğılob beyədə Məhəmməd Əli Rəcayi şe deştə ixtisasi məşğul be.qıləy mellim ki,peşo çı Bazarqani devləti vaxtədə təhsil vəzərotxonə rəyis be.

Şəhid Rəcayi Milli Məclisi iminə vıjnemonədə çı Tehroni şəhəri nımoyəndə unvanədə vıjniye be.çəy kanə dust Məhəmməd Cavad həm məclisi nımoyəndə bıəbe və jıləvoni çın dıqlə kanə duston koon mıştərəkə formədə bəvə şedəbe.Bəni Sədr İroni prezdendəti iminə devrədə prezdent be.İnğılobi ğıvvon dılışon hestebe ki,qıləy xatırcəmə inson hukuməti bə dast bıqəto.deməkə ki,bın royədə xeyli mıxolifət iyən pojənəti kardey bədiqə,ijən oxoyədə Həşi sori 59-ədə İslomi Şurə Məclisi bə Məhəmməd Əli Rəcayi iminə vəzir bıey rayış doe.

Rəcayi iminə vəzir bıəbe və bəbe zəminisə mandə xeyli koon bə vırə rosnənin be.koon saxtəti hejo həmonə sıftəku bino be.çı Rəcayi kanə dust Muhəmməd Cavad Bahunər həm bəçəy komək ome və təhsil vəzir be.huccətul-islam Bahunər İnğılobi Şurə uzv be və həmən universtetonədə çı Fərhənqi İnğılobi Şurə uzv be və ımon dıjdə koon bin ki,əv de İmom Xomeyni(r) əmri əy bə vırə rosneydəbe.

Rəcayi devlət de ziyodə mısibəton dim bə dim oməbe.canq bino bıəbe.Rəcayi bo ironi  məxloği məzlumiyyəti sədo bə co məmləkəton quşi rosney xoto,İMT Əmniyyət Şurə Sammitış qıləy mınosibə fırsətış zıne.əv bın iclosədə voteşe:Əmə qıləy şərayitədə iyo oməmon ki,çəmə kişvər çı iraği milləti tərəfiku nıbə BƏƏS-i hukuməti tərəfiku bıə otəşi xoto vəşış qətə suteydə.əmə çın tribunaku bə qırd dınyo milləti elon kardeedəmon ki,çı iraği devləti bəçəmə məmləkəti bıə hərbiyə təcavuz,de Amerkə rəhbərəti bıə çı dınyo istemarə ğıvvon bəçəmə inğılobi ələyh məkrinə planonkuye.

Əmmo fəğət canq çı kişvəri çə rujnə məsələonku nıbe.inğılobi sıftənə soronədə qıləy ojə fəzo hestebe ki, mıxtəlifə dastəon har qıləy kınc və quşədə de xun rukarde iyən terrori məşğul bedəbin.Turkmən səhroku qətə de tobə Kavus,Sistan,Kırdostoni bıə problemon.itərəfiku mınofiğon həm cəhd kardedəbin ki,bə devləti təşkiloton nufuzkəyn ta hukuməti koon bəyənde bıqıno.Şəhid Rəcayi çı mınofiğon mığobilədə mığovimətış nışon doe və de əvon mıborizəş barde.

Hicri-Şəmsi 60-ə sor bino bıə be ki,prezdent Bəni Sədri kəno de mınofiğon pur bıəbe və əvon əməli surətədə çı inğılobi royku beşəbin.Məclis bın ko mıdoxiləş karde və xordad manqi 31-ədə məclisi Bəni Sədrış çı vəzifəku beğandeşe.

Həşi sori 1360-ə sori Mordad manqi 6-ədə ironədə dıminə prezdenti vıjnemon bərpo be.Məhəmməd Əli Rəcayi  de 87 fayizi milləti rizoyətış bə dast varde və ironidıminə prezdent be.tojə devləti kabinet həm mıəyyən be və Bahunər iminə nazir be.1360-ə sori bo ın zumandə kollektivi həmməysə muhimmə məsələ budcə be.prezdent Rəcayi bın barədə de milləti sıxani vaxti voteşe:çəmə qırd budcə umumən 330  milyard tumane.çəy 100 milyard bo canqi co bedə.

De İslomi Respublikə partiyədə bombə tıpıney iyən doktor Şəhid Behişti şəhiod bıey,məlum be ki, mınofiğon bo har qıləy cinoyəti hozzın.bə proqrami əsos qıləy tənzim  bıə hərkət bino bıəbe ta İslomi Republikə sədə bıə yolon həmmə terror bıbon.hələ çı tojə devləti təşkil bıeyku dı manq dəvardə nıbe ki,çı Rəcayi İyən Bahunəri terror kardey plan kəşey be.1360-ə Həşi sori şəhrivərə manqi 8-ədə çı iminə vəziri de prezdenti vindemon kardə binadə bombə noey be.