Ərəfə əzəmətinə ruj
Ərəfə əzəmətinə ruj
“Ərəfat”-i mığəddəsə sərzəmin Məkkə cənub-şərğədə “Cəbəlur-Rəhmə” bandi dovnədə ğərolış qətə.Xıdo kə zayiron ehromi sipiyə oləti bə tan kardey bədiqə,bo Təməttu Həcci bə vırə rosneyro əyo omən və Ərəfə ruji (Zilhiccə manqi 9) bın sərzəminədə bəmandeyn.əvon əyo de dıvo iyən razı-niyozi məşğulin ta Rəhmonə Xıdo bəvon de rəhməti çəşi nəzəko və ijən bəvon bə İlhai Əmnə Hərəmi daxil bıey icozə bıdo. həyğətədə,Həcc de sırron pur bıə qırd ibodəton miyono qıləy rabitəy ki,Xıdo ıştə deştə bandəon miyono ğərolış qətə.qıləy ibodət ki,çəy har qıləy əməli qıləy zohirış heste,qıləy həm botın.bın miyono Ərəfə qıləy məxsusə vırə və məğamış heste.
“Ərəfə” qıləy çi iyən çəy əsəron barədə de təfəkkuri bə ico idrak,fame iyən zıney mənoədəy.bə Ərəfati sərzəmini bəçəy xoto Ərəfat votedən ki,çı bandon miyono qıləy məlumə sərzəmine.Ərəfati sərzəmin ıştə tarıxçədə bənə Odəm(ə),İbreym Xəlilullah(ə),Peyğombəre-Əkrəm(ə) iyən İmom Huseyn(ə)-i ilahi yolə şəxsiyyəton xatırəonış heste.həzrət Odəm(ə) iyən Həvvo(ə) çı vəhıştiku hubuti və zəminisə omey iyən çəvon miyono qıləy dırozə coəti bəpeşt,həmonə bın sərzəminədə iyəndeşon vinde və həmınə dəlili xoto,bə ın məntəğə Ərəfat iyən bın ruji Ərəfə ruji votedən.i dastə həm votəşone ki,ım oşnoəti mənoədəy və həzrəte İbreym(ə) iyo de Cəbrəyil(ə) vositə deştə mənasik iyən mərosimon oşno be.İmom Sadığ(ə)-iku omə hədisədə nəğl bıə ki,Ərəfə ruji Cəbrəyil(ə) İbreym(ə)-i palu ome və bəy votışe:bəştə qınoon etırofkə və mənasik iyən mərosimon bızın.çun,əy etırofış karde,əve bəvrə Ərəfat votedən.vey cəlbəkə ıme ki, Pəyğombəre-Əkrəm(s) ıştə oxonə həcci zəmonədə Hicri-Ğəməri daminə sori ıştə tarıxiyə xutbə ki, İslomi Beynəlxalğə Nizomnoməku hikoyət kardedə iyən qırd cohiliytyəti devroni qırd erjon botıl hisob kardedə,Ərəfə ruji hociyon əzəmətinə ictimadə bəyonışon kardə.İmom Huseyn(ə) həm Ərəfə ruji peşt nımoji Məkkəku xaric beyədə və deştə əhli-beyt iyən səhobəon bə ico bə Kərbəlo sərzəmin şeyədə Ərəfati ruji ıştə xeyməonku bə bi omin və “Cəbəlur-Rəhmə” bandi dovnədə cəm bin iyən de Xıdovənde-Xalıği mınocat iyən razo-niyozi məşğul bin.qıləy mınocat ki,de vey ğəşənqə kəlomon bə ico deştə pərvərdıqori sıxan kardedə.kəlomon ki,de bə Xıdovəndi bıə eşği pure və bandəçəti eşğış əbədi bın sərzəminədə pevoloş kardə.
Dıqlə kəlmə Ərəfə iyən dıvo jıqo bəyənde anqıl qıniyə ki,qırd Ərəfə deçəy dıvo zıney bedə və bo dıvoro vey çokə zəmon Ərəfə rujiye.dıvo bə oj iyən hevuje ki,bə qırd hərəbaxtəti iyən çokətiyon bəon bərobəre. qırd səodəti bəon miyono,fəğət dıvo bəy ki,deəy kardey bəbe bə qırd cuzi iyən kulli,dini və dınyəviyə oruzon yə hədəfon rəsey bəbe.Ərəfə qıləy ruje ki,bə ruji dıvo ğəbul bıey ehtimol vey ziyode.rəvoyət bıə ki,həzrəte İmom Zeynulabidin(ə) Ərəfə ruji çı millətiku komək tələb kardə gəda sədoş məse və bəy hamyeşe:”vay bıbu bətı!aya ğərəz Xıdo bın rujədə cokəsiku qıləy çi tələb kardedəş? Və holın ki,umu heste bın ruji de Xıdo fəzl bəvon şomil bıə luz-ləvəonədə bıə hırdənon səid iyən xoşbəxt bıbon.” binobərin çı qıləy mumini bın rujədə bıə vəzifə ıme ki,bın mıborəkə rujədə ıştəni bə ilahi inoyəti şomil kardeysə əlovə,bəbe cokəson bə Xıdovədi rəhmət iyən məğfırəti şomilokyn və hejo dıvokoyn iyən ıştə hacəton Xıdovəndiku tələbkon.
