Kərimə-Ğıronədə imomət iyən viloyət (2)
Kərimə-Ğıronədə imomət iyən viloyət (2)
Pəyğombəre-Əkrəm(s) nəbəvi hukuməti bərpo kardey iyən islomi umməti təşkil doey bədiqə,bo Nəcrani məshiyon bə islomi dəvətiro qıləy noməş nıvışte.Nəcran Ərəbi sərzəmini ğərbədə,ısətnə Yəmənı marzi kəno be.Nəcrani xristiyanon de Bizans iyən Həbəşıstonədə bıə kilsəon yolon vey nezə rabitəşon hestebe. əvon bə həzrəte İsa-Məsih(ə)-i uluhiyyəti etığodışon hestebe.pəyğombər(s) ıştə nomədə bə məshiyon jıqoş nıvıştəbe.:de İbreym(ə),İshoğ(ə) iyən Yəğub(ə)-i Xıdo nomi və bəy həmd iyən əy sıtoyiş votedəm və şıməni çı Xıdo bandəon itoətiku bə Xıdo pərəstış kardey tərəf dəvət kardedəm.şıməni səlo jeydəm ki, Xıdo viloyət iyən hukuməti tərəf dəvət kardedəm və ehanə şımə çımı dəvəti ğəbul nıkoyn,jəqoədə bəbe islomi hukuməti maliyyat iyən cizyə bıdoyn.Nəcrani xristiyanon ım məktubi ğəbul kardey bəpeşt,qıləy şurəşon təşkil doe və bə ğərol omin ki,idastə insoni çı Nəcrani nımoyəndəon formədə bə Mədinə şəhri bıvğandon ta çı neziku de Muhəmməd(s)-i mızokirə bıbu və çəy pəyğombərəti barədə təhğığkon.de ın tərtibi çı məshiyon yolon iyən nəzə soybonku çandə nəfər ki,çəvon həm se xonəxo xristiyanə məzhəbi rəhbəronku iyən reyasət heyətiku be,bə Mədinə varid bin ta çı neziku de Peyğombəre-Əkrəm(s) mıloğatkon və qıləy mınosibə həlli roy pəydukon.
Çoko ki,Kərimə-Ğıronədə omə,Nəcrani xristiyanə nımoyndəon çə həzrəti palu omin və qıləy pış nıbə holədə bə dınyo omə insoni uluhiyyəti və Xıdo zoə bıey iddioşon karde,Ali-İmrani mıborəkə surə 59-ə ayə çəvon iddio rəd kardə holədə nozil be ki,həzrəte İsa(ə) ıştə bakirə iyən şuş nıbə mo Məryəm(ə)-iku bə dınyo omə,ımon de ilahi irodə bə əməl omə və bo dınyo camaati qıləy mecuzə formədə zohir be.həzrəte Odəm(ə) həm de Xıdovəndi irodə pı iyən moş nıbə holədə ofəyə bıə və Xıdovənd irodəko ki,qıləy çi mecud bıbu,əv dərhol bə əməl bome.
Məsihiyon ki,bə həzrəte İsa-Məsih(ə)-i uluhiyyəti ğayil bin və çı Xido fərzənd zıneydəbin,bə ın istidloli cəvob doey nızneşone və binoşon karde boəy inkor kardey.tosə əvrə ki,pəyğombər(s) çəvon rəftoronku bezo bıəbe.peşo de Xıdovəndi fərmoni Ali-İmrani mıborəkə surə 61-ə ayədə əvon bo mubahilə dəvət bin.joqo ki, hamyedə:”havaxti (İsa-Məsihi həxədə) bətı rəsə qıləy elmi bədiqə (ijən)bə detı mıbohisə kardə kəson vuji:boənən əmə ıştə fərzəndon və şımə həm ıştə fərzəndon dəvətkəmon,şımə ıştə jenon iyən əmə ıştə jenon,əmə ıştə nəfsi iyən şımə həm ıştə nəfsi dəvətkənən.bın zəmon mubahilə(nifin) bıkəmon və Xıdo nəhləti bə duyəvıjon ğərol bıdəmon”.
Maşki be dı tərəf Mədinə ətrofədə cəm bin.Pəyğombəre-Əkrəm(s) de Əli ibn Əbi Talıb(ə),Həsən(ə), Huseyn(ə) iyən Fatimə(ə)-i bə ico ome.həzrəte Pəyğombər(s) çı Əli(ə)-i dastiku qətəşbe.məsihiyon heyət həm deştə yolə yepiskop iyən keşişon bə ico omin. çoko ki,əvon vindeşone islomi-peyğombər(s) de çandə nəfəri omə,çəvon həxədə sıvolışon karde.bəyışon vote ki,ım cıvonə zoə çəy amuyəzoe və zımoye və çı milləti miyono həmməysə mahbubə şəxse və ım dıqlə həm çı pəyğombəri(s) kinə Fatimə(s)zoonin və həmonə xanım həm çəy kinəy ki,milləti miyono həm həmməysə bə peyğombəri(s) vey nez və azize. bın holədə Nəcrani xristiyanon yolon çun vindeşone ki,çı islomi pəyğombəri(s) vey aziz və mahbubə şəxson de əy bə ico omən,bə yande voteşone:əmə iyo surət və dimon vindedəmon ki,ehanə əvon Xıdoku çı bandiku ıştə vırəku beşey tələbkoyn,ım jəqo həm bəbe.hiçvaxti de əvon mubahilə məkən ki,ğəssəm bıbu bə Xıdo əv bənə peyğombəron bə mubahilə omə.əgər əvon mubahilə bıkon,əmə həlok bəbemon və de tobə ğıyoməti ruji,iqlə məsihi zəmini dimisə nibəmanden.
