Osmoniyə surəon-3

Osmoniyə surəon-3

Kərimə-Ğıroni nəzəku vəhy qıləy çiye ki,hejo bıə və bə ilahi peyğombəron har qıləyni i cur vəhy bıə.Nisa mıborəkə surə 163-ə ayə çı vəhyi hejo dəvominə surətədə movcud bıey joqo bəyon kardedə:”əmə bətı vəhy kardemone,çoko ki,bə Nuh iyən çəy bədiqə omə pəyğombəron vəhy vığandemone iyən(həm) bə İbreymi və İsmoyli və İshoği və Yəğubi və Əsbati(Bəni İsrayli) və İsa və Əyyubi və Haruni və Suleymoni vəhy kardemone və bə Davudi Zəbur domone”.

Ğıron de ın şivə təkid kardedə bə Muhəmməd(s)-i ğəlbi nozil bıə çiyon,həmonə vəhye ki,bə navnə pəyğombəron nozil bıə.Xıdovənde-Aləm peyğombəri təhğır kardə kəson mığobilədə ıştə rəsuli mıdofiyə kardedə və ə həzrəti təsdığ kardə holədə hamyedə:...hiçvəxti şımə dust (Muhəmməd) mınhərif bıəni  və ıştə məğsədış gim kardəş ni.və hiçvaxti ıştə həvayi-nəfsiku sıxan votedəni.çəy vardə çiyon ğərəz bəy vəhy bıə vəhyi co çi ni.(Nəcm,2-4).bə ın ayəon əsos,Xıdovənd ıştə rəsuli çı harcurnə inhirof iyən kəcətiku əmonədəş oqətə.

Məkkədə Kərimə-Ğıroni sıftənə ayəon nozil bıə zəmoniku,pəyğombəri(s) elonış karde ki,Ğıron çımı sıxan ni,bəlkəm Xıdovəndi kəlome və hiç qıləy bəşər ğadir ni ki,bənə əy qıləy sıxan biyəy.ehanə bovə kardəniyonbu,imtovonkənən və bın koyədə hakəsiku koməq həm tələb kardey bızniyon.

Çə həzrəti ilahi oxonə peyğombəri unvanədə bıə risolət ım bıə ki,insonon kitob iyən hikmət omuton.əve Ğıron iyən çəy ayəon hifz kardey koyədə tadibəsə bin və niqəron bin ki,məbodə qıləy kəlmə çı yodo beşo ya qıləy iborə əvəz bıbu.bın holədə Xıdovənd əvış xatıcəm karde və vədəş doe ki,Ğıroni çəy sinədə obəqəte iyən çəy ləfzi ğıroəti və çəy məno fami boəy hoston bəkarde.

Kərimə-Ğıron oxonə iyən həmməysə komilə osmoniyə kitobe.ım əbədiyə nizomnomə de təmizə həyğəton iyən ozodi baxş kardə mesajon pure və hiçcur botıl bəy ro pəydu kardey nibəzıne.Kərimə-Ğıron çı harcurnə təhrifiku əmonədə mandə.Ğıroni de co osmoniyə kitobon mığoyisədə məxsusə imtiyozonış heste və hiçkəsi bəçəy ayəon dast dırozış kardey zınəni iyən zəmoni dırozi çı təhrif və ziyononku hifz bıə.liza çəy ləfz iyən cumləon dəğiğə formədə həmonə çiye ki,Xıdo tərəfiku nozil bıə və bəy hiççi əlovə bıəni.

Çoko ki,navnə bərnomədə işorəmon karde,Kərimə-Ğıron 114 qılə surəku iborəte.har qıləy surə çandə qılə ayəku iborəte.pəyğombəri(s) zəmonədə vəhyi nozil bıeyku de tobə ısət,çı surəon iyən ayəon  çokonə nozil beıy həxədə ziyodə bəhson bıən.bənə bəçəvon nozil beıy zəmoni rəğmən bıə təğsım və ya bəçəvon ayəon kırt ya dırozəti ayid bıə təğsım və sayirə.

Ayə kəlmə məno əlomət iyən nışonə mənoədəy.ayə əslədə bə Xidovəndi vucudi və bəçəy mislış nıbə vəsfon dəlolət kardedə.Ğıronədə bənə şəvı-ruji ya həşi iyən ovşumi ,ya ruşinə zəmini və ya voşi voye, kuloki qıniye,avəon hərəkət iyən zıvonon ixtilof və çı çehrəon tafuti bıə təbiiyi çiyon,çı aləmon pərəvrdıqor bıə Xıdovəndi nışonə iyən ayəon nomi zikr bıə.həmçinin bənə Saleh(ə)-i nağə(şatur), Mosə(ə)-i əso,İsa(ə)-i təvəllud,Nuh(ə)-i kəşti(qəmi) iyən co mecuzəon ayə votey bıə ki,umumən bo milləti pand iyən nəsyət qəteyro bəy işorə bıə və ımon qırd çı Xıdovəndi ğudrəti ,mecuzə iyən hikmət nışonəy.