Ğıroni prizmaku jimoni məhorəton

Ğıroni prizmaku jimoni məhorəton

Əmə ıştə jimon kardə camiyədə de curbəcurə əxloği iyən farğ doə dərki soyb bıə fərdon dim bə dimimon. binobərin çəvon barədə rohətə formədə hukm doey nibəbe və jıqo insonon miyono bəbe de səbr iyən quzəşti jimonkəy. əmə veyımon vində ki,i dastə fərdon çı co kəson vədə məğrurəti kardedən.əmm hiç kəs jıqo yoləşəxti kardə kəsonku xoşışon omeydəni.həmmə kəsi çı sodə iyən təvozukorə şəxsonku xoşışon omeydə.ə şəxson ki,bəvonədə duyə ğururon nıbu.umumən təkəbbırəti çı insoni xudpərəstətiku bə əməl omə sıfəte.ikəsə ki,ıştəni bəsə cokəsonsə yol bızıno,bəy mutəkəbbir votedən.

Qıləy xudbin iyən eqositə inson ifrot dərəcədə ıştə nəfsış piyedə.ım məhəbbət boyis bedə ki,əv nəinki, ıştə aybon iyən yavə koon vindedəni,bəlkəm qahi vaxti çəy kardə yavə koon,çəy çəşədə çok cilvə pəydu kardedə və çəy çokə koon çəy çəşədə çand bərobər çiyedə ki,ım həm oxoyədə de cokəson qədə və hırd vindey orəxedə.

Kali şəxson çı təkəbbıri rişə,insoni bəştə həddiku ziyod etıdmod kardeyədə zıneydən.bın mənoədə ki,həmonə şəxs həddiku ziyodə bəştə bovəş heste və bə qıləy istiğna()holəti rəsə ki,umumən ım ruhi iyən botıni holəti mızəmmət kardedə.

Psixoloq doktor Rubabə Təbrizi bənə həğarət iyən ıştəni zəyif zıney həm çı məğrurəti co amilonku hisob kardedə və voteydə:”adətən ə şəxson ki,hırdənəti vaxtonədə ıştə pı,mo,mellim iyən co şəxson tərəfiku təhğır bıən, ıştənışon cokəsonku saru zınəşone iyən dınyoşon qıləy barzə məğamədə vindəşone,yolyəti vaxtonədə dıqlə nov şəxsiyyət yəni təhğırəkə ya təhğır bıə şəxsiyyətışon bəbe.təhğırəkə şəxsiyyətışon bıə kəson səy kardedən de məğrurəti iyən yoləşəxəti ıştə hırdənəti vaxti bıə təy bıə holəti jıləvoni purkən”.

Har dıqlə surətədə məğrurəti,insoni bə ali iyən insoniyə hədəfon rəsey koyku oqteydə.məxsusən bə zəmon ki,inson ıştəni bəsə cokəsonku bəpe bızıno və qıləy oroməti hissko.məğrurəti insoni dastiku de co kəson məşvərət kardey icozə seydə.çımisə əlovə qıləy təkəbbırə fərdi əməlon bə cokəson tars,təhdid və bəçəvon həx-huğuğon zay bıey boyis bedə.ım ko həmçinin bəçəy çok dərk kardey həm mane bedə.de Niççe təbiri:” təkəbbır bo ixtifaron təxribiro qıləy roye”.

Həlbəttə,ğurur fəğət mənfiyə məfhumədə xulosə bedəni.mısbətə ğururədə fərdon hejo ıştəku bıə ğabiliyyətiku xəbədon və deştə zərfiyyət iyən istedodi fəxr kardedən və etığodışon heste ki,çəvon ixtiyorədə bıə çiyon,çəvon jimon,təcrubə,xıyzoni iyən iştimayi fərhənqi məhsul zıneydən.mısbətə ğururədə fərd ıştə həyğətiku bə diyəro ni və çı cokəson roysə qılə maneə icod nıkardə holədə,bə ruhi, iştimayi iyən fərdi inkişofi bopyis bedə.

Kərimə-Ğıron xəbə doydə ki,İblis xılğəti ərsədə çı yoləşəxəti iyən təkəbbırəti simvol be.İblis çı cıni toyfəku be və təğrıbən 6 həzo sor Xıdovəndi mığobilədə de ibodəti məşğul be və çı məlayikon miyono qıləy məxsusə məğamış hestebe.əmmo çun bə ilahi fərmoni nıpemande,əbədi ilahi dərqoyku tojniye be.

Ğıron çı istikbar iyən təkəbbıri rişə,insoni ıştəni bəsə cokəsonsə bəpe bıey zıneydə və hamyedə ki,İblisi ıştə irğış bəpe zıne.binobərin ə şəxson ki,bə ın bovə bırəson de zılm iyən təkəbbırəti məşğul bedən və ğanuni pemandənin.

Ğıroni prizmaku məğrurəti ğərəz Xıdo co çiyonku sərçəşmə peqətey iyən çı səhfə hukmi,həxə roy gim kardey,bə şəytoni xətti anqıl qıniye, və curbəcurə qınoon aludə bıeye.bəçəyro Kərimə-Ğıron Loğmani mıborəkə surədə hamyedə:”Xıdovənd hiç qıləy məğrurə mıtəkəbbırə şəxsış piyedəni”.

Əmmo əmə çokonə ıştə vucudədə təkəbbırəti vəy bıqətəmon?çın sıvoli cəvobi İsra mıborəkə surə 37-ə ayədə pəydu kardey bəbe.Həx-Təala bın ayədə de ruşinə təbiri muminon çı təkəbbıriku nəhy kardedə və  hamyedə: ”zəmini səpe de təkəbbıri roy məpo.zəmini poə kardey nibəzıneş və hiçvaxti ıştı ğəd(bolu)bə bandi bılındi nibərəse”.

Kərimə-Ğıron təkəbbıri inkor kardə holədə,insononku tələb kardedə ki,ıştəni piyə holədə bə cokəson həm mərhəmətkən.Hicri mıborəkə surə 88-ə ayədə hamyedə:”və ıştə (məhəbbəti)kəşi bəsə muminonsə ojkə(oqət)”.