Bo islomi təxribiro təkfiri senari-3

Bo islomi təxribiro təkfiri senari-3

Imom Əli(ə) ıştə vəzifə zınə qıləy inson be ki,islomi hifz kardey bəsə həmmə çiysə bənav zıneydəbe və jıqo ki,ehanə ıştə vəzifə canq əzıni canq əkəy və əgər çəy vəzifə səbr kardey əbi, vey çokə şikilədə sukut əkəy.əv bə vəhdəti xoto qıləy zəmon ki,həzrəte Fatimə(ə) əy boştə həxı bə dumo sıeyro bə ğıyom iyən inğılobi tərəf dəvət kardeydəbe,çoko ki,muəzzin “Əşhədu ənnə Muhəmmədər-Rəsulullah” kəlmə de bılındə sədo vanq jedəbe,İmom(ə) bəştə jimoni həmro hamyeşe:”aya dılı heste ki,ın sədo zəmini dimisə həmuş bıbu,okuşo”?

İslomi pəyğombəri kinə Fatimə(s) voteşe:”hiçvaxti”.İmomi hamyeşe:”çən,ro həmonə roye ki,az qətəme”.həzrəte Əli(ə) 25 sor peyğombəri(s) rehləti bəpeştə iyən seminə xəlifə Osman kıştey bədiqə,millət və əshab bə ə həzrəti kə cəm bin ta deəy beyətkən.sıftədə ə həzrət ğəbul kardeyış piyedə nıbe və ıştə hukuməti idorə kardey metodış boəvon elonış karde,hamyeşe ki,şımə bəçəy adilonə hukuməti tov vardey nibəzıniyon.çən,şımə bə co qılə şəxsi soyəx bışən.deməkə ki,ə həzrət ğəbul kardeyış piyedənıbe,əmmo camaat çə həzrəti kəno volo-volo nıbin və veyə isror kardedəbin ki,ə həzrət xilofəti ko ğəbulkəy.bın zəmon həni huccət bə ə həzrəti təmom be və ıştə vəzifə hukuməti ğəbul kardeyədə vindeşe və hamyeşe:”ğəssəm bıbu bə Xıdo ki,donəş poə karde iyən insonış ofəyə ki,əgər cəmiyyət hozzı bıənəbe və huccətışon bəmı təmom kardəşon nıəbe iyən Xıdo çı alimonku əhdı-peymonış peqətə ki,çı dınyopərəstə zolımon iyən vəşyə luzə məzlumon mığobilədə sukut nıkəyn,mı çı xilofəti şaturi nıxtə bəçəy kul şoədəm iyən oxoyədə əy de cami sirab əkəm”.(yəni ğəbul nıəkəm).

Həzrəte Əli(ə) sirə deçəy fərzəndon iyən de şiyə alimon vositə dəvomış pəydu kardə və əvon hejo bə islomi vəhdəti təkid kardedən və islomi maarifon oqəteydən.

Pəyğombəri(s) rehləti bədiqiə Əli(ə) se qılə xəlifə devronədə iyən ıştə kırtə hukuməti zəmonədə bıə rəftor,bo qırd mısılmınon qılə ulqu bıey bəzıne.əv bo islomi hifz kardey xoto bə se qılə xəlifəon həmməy ro nışon doydəbe iyən ıştə tərəfdoronku de əvon həmkorəti kardey tələb kardedəbe.

Co imomon həm(s) jıləvoni bin.ə həzrəton həm boştə çandə həzo şoqirdon deştə nəzə iyən etığdo bəyon karde bə ico,hejo cəhd kardedəbin ki,mısılmınon miyono qıləy təfrığə nıeqıno və hejo çəvon miyono bıə ixtilofon həll kardey dumo bin.tarıx şoydəti kardedə ki,çəvon mıxolifon bə həzrəton dojmon iyən yavə sıxan voteyədə,əvon bə həmonə mıxolifon ələyh mehribonçətişon nışon doə və deəvon mehribon bıən.çəvon tərəfdoron bıə aqah iyən bə mısılmınon miyono vəhdəti etığodışon bıə alimon həm tarıxi dırozi,həmonə sirə iyən rəftorışon ıştəku nışon doə.əmmo de qırd ım hərkəton məələsəf telə həyğət ıme ki,bə cəhdon rəğmən mısılmonə camiyədə bənə vəhhabiyon təkfiriyə cərəyanon bə meydon beşə ki,co islomi məzhəbon kofir hisob kardedən və çı silomi umməti miyono ixtilof eğandedən.həlbəttə,bəbe əmə iyo ğərbi bənə İngiltərə devləti bıə islomofob iyən sıtəmkorə devləti çı yodo beməkəmon.joqo ki,əvon çı mısılmınon miyono bıə ixtilofon bə əməl vardedən və əvoni bə iyande co eğandedən.

Bənə DAEŞ,Əlğaidə iyən Cəbhətun-Nusrə bıə təkfiri iyən terroristə dastəon ıştəni bə əhli-sınnəti mənsub zıneydən və Əhməd ibn Hənbəli çı sələfiyon bani hisob kardedən.Əhməd ibn Hənbəl çı əhli-sınnəti dıjdə fuğəhaonku qıləyniye ki,deçəy nomi qıləy məzhəb həm movcude.əmmo Əhməd ibn Hənbəl kiye? Əhməd ibn Hənbəl ibn Hilal Şeybani Mərvi Hicri-Ğəməri164-ə sori Bəğdadi şəhrədə bə dınyo omə.çəy pı qıləy hərbi şəxs be və çəy bə dınyo omey bənav, Xorasani ətrofədə çı dınyoku şe və çəy moə qıləy holədə bəy hamilə be,bə Bəğdad şe.Əhmədi şonzə sinnış hestebe ki,şe de hədisi umutey məşğul be.çımi bəpeştə çı Əhmədi jimon de hədisi anqıl qıniye.əv sıftədə çə zəmoni elmi cəhəto tərəğği kardə şəhr bıə Bəğdadədə hədisi elmış umute,çən peşo bo hədis cəm kardero,bənə Bəsrə,Kufə,Hicaz,Yəmən iyən Şami bıə hədisi elmon mərkəzon səfəş karde və bənə Vəkii iyən İshoğ ibn Rahviyəku hədisonış məse.Əhməd ibn Hənbəl de tobə çıl sinni hədisış nəğl nıkarde və çəy bəpeşt binoş karde bo hədis nəğl karde.