Osmoniyə surəon-13

Osmoniyə surəon-13

Maidə mıborəkə surə 27-ə ayəku de tobə 31-ə ayə bə Odəm(ə)-i fərzəndon dastoni iyən Habil deçəy bıvə vositə kıştey macəra işorə kardedə.joqo ki,hamyedə:” Odəm(ə)-i dıqlə fərzəndi dastoni həxədə boəvon bahand.bə zəmon ki,əvon(Xıdovəndi nəzdədə)ğıboni vardeşone iyən çəvonku qıləyniku ğəbul be və co qıləyni ne.çən,(ğıboniş ğəbul nıbə qılə bəştə bo)voteşe:tıni bəkıştem.əv cəvobədə voteşe:Xıdovənd fəğət pərhizkoronku ğəbul kardedə.(27-ə ayə).

Həzrət Odəm(ə) sıftədə  Habil iyən Ğabil nomədə dıqlə fərzəndış hestebe.Habil de moləvonəti məşğul bedəbe və Ğabil həm de kaştevonəti.çəvonku har qıləyni piyeşone bə Xıdo nez bıeyro qıləy ko bə vırə bırosnon.Habili ıştə vey çokə pəsış ğıboni kardeşe iyən Ğabil həm ıştə kaştemoni sahə vey bevəcə məhuslış vardeşe.liza çı Habili nəzr ğəbul be və çı Ğabili nəzr Xıdovəndi dərqoyədə ğəbul nıbe.həmonə mevzu boyis be ki,əməlış ğəbul nıbə bıvə,bəştə bə qılə bıvə pəxılətiş karde və əvış de ğətli təhdidış karde.

Əmmo Habil ki,qıləy pokədıl iyən fıtrətış təmizə inson be,ıştə bo cəvobədə voteşe:çəmə əməlon Xıdo tərəfiku ğəbul bıey ya nıbıey,deçəmə niyyət iyən əməlon əloğədore.tı bə hədərə bəmı pəxıləti məkə.Xıdovənd ə ko ğəbul kardedə ki,de xolis iyən pokə niyyəti əncom doey bıbu. Xıdovəndi nəzdədə ə çi ğəbul bedə ki,de pokə ruf iyən niyyəti bıbu.oxoyədə Ğabili tuğyonkorə nəfs əvış vodor kardeşe ta əv ıştə bo bə ğətl bırosno iyən jıləvoni be ki,zəmini kurə səpe iminə kərə ğətli hodisə bə əməl ome.

Çı bəşəri xilofkor iyən cinoyətkorə fərdon veyni niyyət həmonə həsodət iyən pəxılətiye. Xıdovənde-Aləm bın ayəonədə bə bəşəri quş rosneydə ki,həsəd oxoyədə çokonə tel iyən bə xoş nıomə çiye ki,hətto bəçəy xoto inson ıştə bıvə xuni həm ru kardedə.

Odəm(ə)-i fəzəndon dastoni zikr kardey bədiqə çın ayəku qıləy kulli iyən insoniyə nəticə bə dast omeydə:min əcli... bə ın cəhət bə Bəni-İsrayli nıvıştemone ki,hakəs qıləy inson bıkışto,(vəholımki)əv hiçkəsi nıkışto və ya zəminisə fəsod nıko ,bənə ımiye ki,qırd məxloğış kıştə və hakəs qıləy insoni bəyjiko,(marqiku ozodko)jıqo bızın həmmə millətış bəyji kardə.

Im ayə bə qıləy iştimayi iyən tərbiyəvi həyğəti işorə kardedə ki,insoniyə camiyə bənə qıləy bədəni mislədəy və çı cəmiyyəti fərdon çə həmonə bədəni uzvonin.hər qıləy zərəl ki,bə çın camiyə uzvon bırəso,çəy təsir co qılə uzvonədə həm oşko bəbe.de qıləy co iborəti qıləy kəs ki, ıştə dasti bə qıləy beqınoə insoni xuni aludə kardedə,həyğətədə hozzıe ki,co beqınoə insonon xuni həm rukəy.həmçinin ikəs ki,bəştə humanistəti iyən məhəbbəti xoto,qıləy insoni coni peroxno ın hozzıətiş heste ki,co çokə koon həm bə vırə bərosne.Ğıroni prizmaku i nəfəri marq iyən jimon harçənd de qıləy camiyə marq iyən həyoti mısovi iyən i ni,əmmo bənə iyanden.

Iyo çı Kərimə-Ğıroni ım təbir ehanə ikəsi nohəx kıştey bıbu,jıqo bızın qırd insononış kıştə,çı Ğıroni pik həddədə bə insonə həxon nışon doə nəzə ruşin bedə.ısət bəbe dəparsi ki,çı insonə həxon iddio kardə kəson kon qılə,insonə həxon məsələ barədə jıqo hevujə surətədə  bəhson ojko? ikəsi ğətl de həmmə insonon ğətli bərobəre!.