Ğərbədə insonə həxon
Ğərbədə insonə həxon
Çandə ruj şımi bənav dınyo informasiyə vositəon ın xəbəşon pevolo karde ki,harçənd visti iminə əsrədə de co məmləkətonədə jenon ozodəti vovcud bıə holədə,əmmo ım bə Səudiyyə rejimi jenon şoyvonəti iyən ın rejimi himoyə kardə ğərbi devləton ım ko dıjd nışon doey boyis be. ım həm nəhoyətən çandə soron mıborizə bəpeştə bə Ərəbıstoni jenon maşin romey həxı doey be və bın keşvərədə oxo ki,jenon maşin romey ğədəğən kardə ğanun ləğv be.ısət Səudiyyə Ərəbıstoni jenon kardey bəzıneyn roməvonəti vəsiğə bıstənon və Ərəbıstoni roonədə maşin bıromon.Səudiyyədə aktivə jenon çın ğəroliku vey rozin iyən şoyvonəti kardedən.
Bə çın hodisə pardə peştono bıə siyosəti nəzə kardeyədə,Səudiyyə rejimi ım rəftor oşko bedə. qıləy kişvər ki, Trampi jimoni həmro Melaniya Tramp əyo çı jenon həxədə leksiyə kardedəbe,ısət 2017-ə sori oxoyədə ijən vindedəmon ki,Ərəbıstonədə hələm çı jenon maşin romey həxədə sohbət şedə.həlbəttə,Ərəbıstonədə kali jenə fəalon votedən ki,çəvonku de təhdidi tələb bıə ki, çın mevzu barədə hiç qıləy sıxan nıkon.çoqlə fəalə jen ki,navko bə jenon maşin romey ğədəğəni ğanuni ələyh mitinqışon kardəbe,bə “Royterz“ aqentəti votəşone ki,bəvon de telelfoni vositə əmr kardə bıə ki,çı Ərəbıstoni hukuməti bekardə ın tojə ğanuni həxədə hiç qıləy nəzə nıdon.dıqlə jen votedən ki,bə 25 qılə fəalə jeni çın mevzu barədə zanq kardə bıə.
Həlbəttə,bə Ərəbıstoni ım demokratikə hərəkəti de nikbinəti diyə kardey lozım ni.zira bə veyə analitikon nəzə əsos,bə de Səudiyyə rejimi vositə çı jenon həxon himoyə kardey koy etımod kardey mumkin ni.
Bəzi analitikon etıoğodışon heste ki,bə jenon bənə maşin romey bıə kali tojə həxon doey, Yəmənədə çın rejimi cinoyəton puşniyeroe.Ərəbıston çandə sore ki,bə Yəməni istefo doə prezdenti himoyə kardey xoto,çın məmləkəti beqınoə məxloği bombardıman kardedə və çı Yəməni infrastrukturon məf kardedə.Yəməni canqədə nəinki,ğalib bıə tərəfə movcud ni, bəlkəm, Ali-Səudi rejim çın canqi batlağədə tasedə və ın rejimi ko fəğət çı Yəməni beqınoə jenon iyən hırdənon kışteyku iborəte.Ərəbıstoni bə Yəməni bıə hərbiyə təcavuz,bə çın kişvəri əhali bevəcə jimoni,bəçəvon vəşyənəti iyən bə epidemik holədə bıə noxəşətiyon pevolo bıey boyis bıə və ısət çın məmləkəti vəzyət qıləy faciyəvi şərayitədəy.
Bə Amerkə “Vaşinqton post” qəzeti məlumati əsos,Səudiyyə rəsmi şəxson çın ğanuni bekardeyku hədəf, Ərəbıstoni bə Yəməni ələyh bıə canq iyən bın məmləkədədə bıə bə insonə həxon rioyət nıkardey sape puşniyeye.ım rujnomə ıştə sər məğalədə nıvıştəşe ki,çı Səudiyyə Ərəbıstoni bo jenon maşin romero bıə ım ğərol, mumkine bo çın rejimi daxilədə bıə bə insonə həxon rioyət nıkardey iyən Yəmənədə canqi sape puşniye xoto,iştimayi fiki mınhərif kardey bıbu.
Avstriyə”Di Perse” qəzet həm ıştə məğalədə Ərəbıstonədə bə jenon maşin romey icozə doey ğanuni pardə peştono bıə çiyon işorə kardedə və nıvıştedə ki,Səudiyyə Ərəbıstoni podşoon dılışon heste de daxili islohoti roy,dınyo iştimaiyyəti bəştə tərəf cəlbkon iyən bə İron,Ğətər və Yəməni ələyh beynəlxalğ iyən regionial himoyə bə dast biyəy.
Im Avstryəvıjə rujnomə ıştə mətləbi co qılə baxşədə nıvıştedə:Sıudiyyə Ərəbıstoni podşoon har çanədə de daxili islohati roy,beynəlxalğ iştimaiyyəti bəştə tərəf cəlb kardedən,həmonə əndozədə həm bə İron,Ğətər,Yəmən iyən hətto bə Ərəbıstonədə bıə şiəyon ələyh radikalə siyosəton himoyədoron cəlb kardey dumoe.
Kali eksperton Ərriyadi tənğıd kardedən ki,Ərəbıston de jenon həxon himoyə kardey vositə,əvoni tənğıd kardə kəson etosney siyosəti sape bıpuşnon.hejo çın cari sori sentyabrə manqədə ın rejimi 20 qıləsə vey nufuzinə fəalon qətey və bə zindon şodey bıə.çımisə əlovə Ərəbıstoni məşhurə blogger Rauf Bədvi həm ısət həbsxonədəy.
