Osmoniyə surəon-19

Osmoniyə surəon-19

In ayəon ım mətləbi bəyon kardedə ki,çı şəytoni suğut bəçəy təkəbbırti iyən məğrurəti xoto be.çəy xudpərəstəti boyis be ki,ıştə vırə bəy loyığ nıbə məğamədə bızıno.liza nəinki,bə Odəm(ə)-i səjdəş nıkarde,bəlkəm Xıdovəndi elm iyən hikmətış həm inkor kardeşe və bəçəy əmri nıpemande iyən isyonış karde.oxoyədə əv həm ıştə məğam iyən vırəş çı dasto doe.

İblis Xıdovəndi piyeşe ki,de tosə ğıyoməti ruji bəy mohlət bıdoy ə Xıdovəndi həm çəy tələbış ğəbul karde.İblisi ğəsəmış harde ki,mı insonon çı həxə royku mınhərif bəkardem.de ın tərtibi ım fırsətış pəydu karde ki,bə insonon vəsvəsəko.muhimmə nuktə ıme ki,inson çı şəytoni mığobilədə be mıdofiyə ni.insoni ixtiyorədə im imkonaton heste ki,deçəvon koməki vositə kardey bəzıne çı şəytoni hiyləonku perəxo iyən bə hərəbaxtəti bırəso.har qıləy odəm deştə ağl iyən dərrokə kardey bəzıne çı şəytoni vəsvəson vədə qıləy ğoymə sədd bısıxto.insoni daxilədə bıə pokə fıtrət iyən bə kəmoli bıə eşğ həm,çə amilonkuye ki,insoni xoşbəxtətiyədə rolış heste. həmçinin pəyğombəron iyən bə insoni çokətiyon ilhom baxş kardə məlayikon,bə insoni komək omeydən ta bə insoni çı şəytoni vəsvəsəon mığobilədə komək bıbon.

19-ə ayəku jəqoşə,çı Odəm(ə)-i sərquzəştonku co qıləy fəsli bəyon kardedə.sıftədə voteydə: Xıdovənde-Xalığ bə Odəm(ə) iyən bəçəy jimoni həmro(Həvvo) əmr kardedə ki,vəhıştədə sakin bıbon.bın zəmon Xıdovəndi tərəfiku iminə vəzifə bə Odəm(ə) iyən Həvvo ohdə noey be.joqo ki, hamyedə:”Ha Odəm ha! Tı deştə jimoni həmro vəhıştədə sakin bıbən.çən,har co ki,dılon heste(vəhışti miyvəonku) bəhənən.əmmo bə ın(mıəyyənə)do nez məmandənən ki,çı sıtəmkoronku bəbiyon(19)”.

Iyo tojniyə bıə şəyton,bo Odəm(ə)-iku intiğom sıey və bəy iyən bəçəy jimoni həmro vəsvəsə kardero,bə hərəkət dəşe iyən mıxtəlifə hiyləonış karde.əv bə Odəm(ə) iyən Həvvo voteşe:şımə pərvərdıqori şımənış bəçəyro çın doyku nəhyış kardə ki,ehanə şımə əy bəhardon,firiştə bəbiyon və ya şımə (vəhıştədə)əbədiyə umron bəbe”.

Şəytoni boəvon ğəssəmış harde ki,mı şımə xeyrxahim və şımə məsləhətım piyedə.nəhoyətən çəy vəsvəsəon təsirış karde və Odəm(ə) iyən Həvvoş bəştə hiyləon torış eğande.əvon de həmonə ğədəğən bıə miyvəon hardey,çı itoət iyən bandəçəti olətiku xaric bin və çı ilahi vəhıştiku tojney bin.

Odəm(ə)-i daston bə bəşəri dınyoədə bıə jimoni həm işorə kardedə.insoni de ğovğa iyən problemon pur bıə dınyo həyotədə çəy ağl iyən nəfsaniyə meylon miyono  keşməkeşon nəticədə əv bə qıləy tərəf şıkırney bedə.duəvıjə iddio kardə kəson de dayimiyə hiylə və vəsvəson səy kardedən çəy ağli sape pardə eğandon və əy sərqərdonkon ki,oxoyədə həm əv çı rostə royku bımando.insoni çı şəytoni vəsəvəson mığobilədə təslim bıey nəticə ıme ki,təğva olət çəy taniku xaric bıbu iyən bə dınyo maddiyə jimoni problem iyən muşkilaton mıbtəlo bıbu.Xıdovənd Odəm(ə)-i sərnıvışt iyən tale bəyon kardey bəpeştə,çın ayəon bədiqə bo Odəmi(ə)-i fərzəndon çandə qılə təsirinə bərnomə bəyon kardedə və çəvonku tələb kardedə ki,şəyton əvoni bə dast nıdəno.bın surədə çandə kərə “ya bəni Adəm”kəlmə zikr bıə.min cumlə 26-ə ayədə hamyedə:”Ha Odəmi fərzəndon ha! bo şımə qıləy libos vığanemone ki,şımə əndomi puşneydə və təğva olət vey çoke.ımon (həmmə) Xidovəndi ayəonkuye ki,ğasbu şımə(çəy neməton)bə yod dənon”.(ayə-26).

Umum insonon bə ğəflət eğandə koonku çəvon bın dınyoədə bıə jimoni bə oxo rəsey iyən marqe.nəinki,har qıləy inson bəmarde,bəlkəm qırd umməton iyən mədəniyyəton həm bə fəno dıço bəbeyn.mumkine dınyo jimoni tarıxi dırozi ziyodə sivilizasiyəon zohir bıən,əmmo bə zılm iyən fəsodi xoto,məhf bıən.ğudrət iyən sərvəti soybon,vey vaxti fik kardedən ki,çəvon sərvət iyən ğudrət dayimiye.əmmo Xıdovənd bə yod dənoydə və hamyedə:” Və bo ha umməti qıləy əcəl iyən oxo heste.çən,hafaxti əcəlışon bırəsi,nə karde bəzınen əy i ləzə bə təxir eğandin iyən nə kardey bəzınen çəy vəy bıqətin”(34).