Osmoniyə surəon-20
Osmoniyə surəon-20
Dəvardə proqramədə zınemone ki,Ərafi mıborəkə surə Kərimə-Ğıroni de surəon tərtibi haftminə və de nozil bıey tərtibi sivi nəvminə surəy.ım surə Məkki surəonkuye.çın surə co qılə nom(Əlif-Lam-Mim-Sad)-e.ın surə de muğəttə hərfon bino bıə.
Ya bəni Adəmə xuzu....” Ha çı Odəmi fərzəndona! Ha məçitədə(nımoji faxti ıştə libos və)ıştə zinəton deştə peqətən iyən bəhənən və peşomənən(əmmo)isrof məkənən.həyğətən,Xıdovənd isrofəkəyonış pieydəni. (Ha pəyğombəra!)Vuji:Xıdo boştə bandəon ofəyə zinəton və(ijən) pok iyən bə dıli xoşomə rızğo-ruziyon ki bəştə hərom kardəşe? bıvot:ın (neməton) dınyo jimonədə bo mominone.(harçənd ki,kofiron həm çəyku bəhrə bardən) qıləy holədə ki,ğıyoməti ruji bə (mominon)məxsuse.əmə jıləvoni bo zınə ğovmi ıştə ayəon mıfəssələn bəyon kardedəmon”. (31-32)
Kərimə-Ğıroni surəon har qıləyni məxsusə mesajış heste ki,çəy barədə təfəkkur kardey lozıme. məsələn,işorə bıə ayədə millətiku tələb kardedə ki,pok iyən təmizə oləton bə tankon iyən pok və ləzzətinə xorəkonku oko bıdən.ayədə bə ziynəti işorə mumkine həm bənə təmizə oləton bə tan karde və ətır jıey bıə cismoni ziynəton və həmən bənə pokə əxloği iyən insoniyə sıfəton bıə mənəviyə ziynəton həm şomil bıey bəzıne.əmmo çun insoni si nıbə təbyət,mumkine çın dıqlə dəsturiku suyi-istifodəko və məğul iyən mutədilə formədə çımonku istifodə kardey əvəzi, dəbdəbəninə jimon iyən isrofi roy bıvıjno,əve bilofosilə hamyedə:”...əmmo isrof məkənən ki,Xıdo isrofəkəyonış piyedəni”.isrofi kəlmə qıləy kulliyə kəlməy ki,bə harcurnə həddisə ziyod tələb kardey iyən tələf kardey şomil bedə.
Ğıroni şivə ıme ki,bəşəri bə xılğəti aləmədə ilahi nemətonku istifodə kardey iyən çın ziynətonku bəhrə bardey tərəf təşviğ kardey zəmonədə çı suyi-istifodə kardey zəminə vəy qətedə və bə etıdol iyən miyonə ro şıey tovsiyə kardedə.islomi prizmaku bə etıdoli rioyət kardey çın vırəonkuye.nə,bənə əvon ki,fik kardedən çın ziynət və dəbdəbəku oko doey harçənd etıdolə formədə həm bıbu-bə zohidəti iyən abidəti mıxolife və nə bənə qlamurinə jimon dəvordınə kəson ki,de cəh-cəlolinə ziynəton məşğulin və bın dəbdəbəninə jimoni royədə bə xilof iyən bə ağli əks bıə əməlon mırtəkib bedən.
Co prizmaku ehanə bə insoni cismi iyən rufi soxtemoni nəzəkəmon,bəvindemon ki,bın sahədə islomi təlimon de odəmi rufi iyən cismi həmahənqe.psixoloqon etığodışon heste ki,reçinəti piye hiss çı odəmi rufi cəhətonkuye.bəçəvon nəzə əsos,qırd ğəşənqə çiyon,ısət çı ədəbi,şeri iyən hınə cəhətiku bıbu,çı insoni vucudədə bıə ım hissiku bə əməl omə.islom həm bə insoni vucudədə bıə ım reçinətiku xoş omey hissi dığğət kardedə və əy deçəy fıtrəti mıtobiğ zıneydə. liza bo bəşəri ım hissi ğane kardey xoto,bənə mınosib iyən çokə liboson,çokə ətıron və sayirə bıə çı təbyəti ğəşənqə ziynətonku oko doeyış nəinki,cayiz zınə,bəlkəm çəvonku istifodə kardey sıfarışış həm kardə.
İmom Həsən Mujtəba (ə)-i jimoni siyrə və rəftoron baxşədə handedəmon ki,ə həzrət bo nımoji hozzı beyədə,ıştə vey çokə oləton bə tan əkardi.çə həzrətiku çımi illət və səbəbi xəbə seyədə, hamyeşone:Xıdovənd xos və reçine və əv reçınətiyonış piyedə.bə həmınə dəlil xoto,deştə pərvərdıqori razo-niyoz iyən mınocat kardeyədə ıştə vey çokə liboson bə tan kardedəm və əv əmrış kardə ki,bə məçit şıə vaxti ıştə vey çokə ziynətonku oko bıdənən.
