Osmoniyə surəon-21

Osmoniyə surəon-21

Ərafi mıborəkə surə 158-ə ayədə çı islomi cahanşumul bıeyku bəhs kardedə və bəyon kardedə ki,çı islomi pəyğombəri(s) risolət bo qırd dınyo millətiye.qıləy rəvoyətədə omə ki,çı yəhudiyonku idastə peyğombər(s)-i palu omin və voteşone:ha Muhəmməd ha! Tı qımon kardedəş ki,Xıdo tınış vığandə iyən bənə Mosə(ə)-i bətı vəhy bedə.islomi peyğombər(s) lıski tamış je,çən peşo hamyeşone:bəle!...mı çı pəyğombəron oxonə qılə və çı pərhizkoron rəhbərim iyən az çı aləmon pərvərdıqori tərəfiku vığandə bıəm.çən,əvon peşo peyğombəriku(s) dəparseşone:tı bə çıki tərəf vığandə bıəş?bə ərəbi ya bə əcəmi və ya bəçəmə tərəf? bın zəmon Ərafi mıborəkə surə 158-ə ayə nozil be və Xıdovənde-Aləm de ojə-oşkoə holəti peyğombər(s)-i risloəti bo qırd dınyo milləton şomil bıey elon kardedə.

“Vuji:ha məxloğa! Az çı Xıdo tərəfiyo boşmə həmməy vığandə bıə (rəsulim).qıləy (Xıdo) ki,çı ostmonon iyən zəmini hukumət çəy dastədəy.sovəy əv hiç qıləy məbud ni,bəyji kardeydə iyən kışteydə.çən,bə Xıdo iyən bəçəy peyğombəri(həmonə) dərsnıhandə peyğombər ki,bə Xıdo iyən bəçəy sıxani bovəş heste,-imon biyənən iyən bəy itoət bıkənən,ğasbu hidoyət bıbon”.

“Mı boşmə həmməy tərəf vığandə bıəm” iborə,bənə Kərimə-Ğıroni co ayon oşkoə holətədə bə  islomi peyğombəri(s) dəvəti cahanşumul bıey dəlolət kardedə və nışon doydə ki,ım dəvət bə qıləy məxsusə ğovm,millət iyən cəmoəti ayid ni.ayə çı qırd dınyo camaatiku tələb kardedə ki,bə Xıdo iyən bəçəy peyğombəri imon biyəyn. qıləy pəyğombər ki,nəinki,cokəson bə ın həyğəton tərəf dəvət kardedə,bəlkəm əv ıştən bəştə votə çiyon iyən bəy nozil bıə çiyon həmmə kəsisə bənav  bovəş heste.çə həzrəti bəştə vardə ayini bıə imon,bəçəy həxədə bıey qıləy ruşinə dəlile və çəy rostəvıjəti nışon doydə.hakəs ki,dılış heste hidoyəti nur bəçəy dıli dətıvo iyən hərəbaxtəti royədə hərəkətko,bəbe bə ın yolə pəyğombəri(s) vardə ayini ğanunon pemando.

Ərafi mıborəkə surə 201-ə ayədə çı pərhizkoron barədə bə qıləy cəlbəkə nuktə işorə kardedə və bəşorət doydə ki,təğvaninə şəxson Xıdovəndi lutfi şua jiyədə,bə bəsirəti dast pəydu kardedən və çı şəytoni vəsvəson toriku perəxedən.joqo ki,hamyedə:innələzinə....”Bərosti təğvaninə şəxson ha faxti şəytoni vəsvəsəon bəvon nez bıbu (bırəso) dığğətin bəbeyn(Xıdo bə yod dəbənon)bın zəmon çəvon çəşon oj bəbeyn”.

Tayif “təvaf”-i mənoədəy.quya şəytoniyə vəsvəson bənə təvofəkə çı insoni ruf iyən fiki kəno qardedə tainki,qıləy nufuzi roy pəyduko.

Pərhizkoron de şəytoniyə vəsvəson dimbədim beyədə,Xıdo iyən çəy benəhoyətə neməton bəştə yod dənoydən və ıştə koon həxədə fik-fam kardedən.bın zəmon Xidovəndi lutfi şua jiyədə,çı şəytoni vəsvəson tındə avəon çı insoni ğəlbi kənoku rədd bedən şedən.nəticədə həxə roy oşkoə surətədə mışohidə kardedən iyən bə bəsirət dast pəydu kardedən.cumlə insonon çəşon de Xıdo zikri vositə oj bedə iyən vindedən.ın ayə bə ın həyğti işorə kardedə ki,şəytoni vəsvəson çı insoni çəşon sape qıləy pardə şodedə.joqo ki,əv həni həxə roy çı kəcə royku co karde zınedəni.əmmo əgər əv de Xıdo zikri məşğul bıbu,bəvədə çı insoni oj bedə və həyğəton dərk kardedə ki,ım oxoyədə de çı şəytoni çənqaliku perəxey orəxedə.