Osmoniyə surəon-23

Osmoniyə surəon-23

Bilaxirin vədə doə bıə ruj ome rəse və sehrbozon binoşon karde bo hozzı bıey.əvon i miğdor rismon iyən əso ki,çəy dılədə məxsusə maddəon hestebe,hozzışon karde.ım əso iyən rismonon çı həşi hərorət iyən şua jiyədə bə hərəkət omeydəbe.

Vey əcibə səhnə bə əməl oməbe.Mosə(ə) deştə bıvə çı sehrboz iyən ziyodə təmşoəkə insonon miyono mandəbe.Fironi sehrbozon məğruranə formədə bə Mosə(ə)-i voteşone:tı ıştə ko bino kardedəş ya əmə binokəmon?Mosə(ə)-i cəvobış doe ki,şımə sfıtədə binokənən.caduqəron ıştə dastədə bıə rismon iyən jiyonışon bə meydoni miyon ğandə vaxti,əyo bə ın macəra təmşoəkə camaati dıl tars dəşe və qıləy dıjdə sehr bə əməl oməbe.

Çən,peşo şoyvonəti fəryod har vırədə rost be.Firon iyən çəy ətrofədə bıə şəxson dim sıre və bəçəvon lıv-luputon təbəssım nışte.bgın zəmon ilahi vəhy bə Mosə(ə)-i soyəx ome.joqo ki, hamyedə:bə Mosə vəhy kardemone ki,ıştə əso bığando.ğəflətən (əso bənə mori dıroz be və)çəvon duyədə pesoxtə çiyonış rəyrə ebordıne.(bın zəmon)həx oşko be və çəvon pesoxtə çiyon botıl(117-118).

Çın dıjdə mecuzə bəpeştə,vəzyət  naqahan əvəz be.millətiku i dastə binoşon karde bo vitey  və i qrup həm dılışon şe bihuş bin.Firon iyən çəy ətrof de ın səhnə vindey bə dəhşət oməbin və çı iztirobi dılədə bin və əvon ıştə zılmətin iyən toykiyə vəomə barədə fik kardedəbin.əvon jıqo qıləy səhnə çəş kardedənıbin.ım bə zolmkorə Fironi ğudrəti qıniyə iminə zərbə be.

Əmmo muhimmə zərbə bəzəmon varid be ki,çı sehrbozon de Mosə(ə)-i bıə mıborizə sima kulliyə formədə əvəz be.Sehrbozon çı Mosə(ə)-i mecuzəon mışohidə kardey bədiqə,bəsə zəminisə eqınin və çı İbıə Xıdovəndi əzəməti mığobilədə səjdə kardeşone.əvon sədoşon je ki, əmə bə aləmon pərvərdıqori imon vardemone.həmonə çı Mosə iyən Haruni pərvərdıqorFiron iyən çəy ətrofədə bıə kəson çı sehrbozon ım hərəkəti çəş kardedənıbin.sehrbozon de Mosə(ə)-i mıborizə bardey xoto,bə fironi bəvon doə ənami ehtiyocişon hestebe.əmmo bəçəvon intizori əks sehrbozon çı muminonku bin.çımi səbəb həm ın be ki,sehrbozon dərəsin ki,çı həzrəte Mosə(ə)-i ko sehr ni və çəy ko çı bəşəri fovğədə bıə qıləy çi be.liza əvon bə fironi təhdidon etino nıkardə iyən ıştə vəoməku nıtarsə holədə,ıştə imonışon oşko karde və deştə zıvoni iğrorışon karde.

Çın ayəon dəvomədə,Xıdovənde-Aləm de fironıjon dıyoədə ğərğ bıey tale zikr kardey,nışon doydə ki,sıtəmkor iyən deştə ğudrəti məst bıə hukuməton,çanəndə həm zumand həm bıbon, oxoyədə məhvo-nobud bəbeyn.

Və əmə de Mosə si şəv(Turi bandədə Tovrati nozil beyro)vədəmon noe və əyro de da şəvi ziyod karde komil kardemone.çən,çəy deştə pərvərdıqori çıl şəvnə vədə komil be iyən Mosə(bə vədə doə bıə vırə şıey bənav)bəştə boə Haruni voteşe:çımı umməti miyono çımı canişin bıbi(və çı milləti koy) islohkə iyən bə fəsod əhli şıə ro tabe məbi(142-ə ayə).

In ayə iyən peşonə çandə qılə ayəon bə həzrəte Mosə(ə)-i de Xıdovəndi çı in mevzuonku iborət bıə macəra işorə kardedə.148-ə ayəku çandə qılə peşonə ayəonədə,bə Bəni-İsrayli poynə pərəstəti ayid bıə sərquzəşton işorə kardedə və hamyedə:

Və Mosə ğovm çəy(bə Turi bandi şıey)bəpeşt ıştə zər-zibəonku(tel-nığəonku) zandəğo sədo bekardə qıləy poynə mıcəssəmə(heykəl)(soxteşone iyən pərəstış kardeşone.aya nıvindeone ki, həmonə(poynə)de əvon qəp jeydəni iyən əvoni hidoyət kardedəni? əvışon sitoyış karde iyən zolımonku bin(148).

Bəni-İsrayil çandə dırozə soron mıddətədə Misrədə çəvrə əhali poynə pərəstətişon mışohidə kardəşon be.co tərəfiku həm əvon çoko ki,çı Nili ruyku dəvardin,ruy bə tərəfədə bıə ğovm de poynəpərəstəti məşğul bin,çəvon dığğətış cəlb karde.əvon çı həzrəte Mosə(ə)-iku tələb kardeşone ki,bənə çəvon bıton qıləy xıdo bısoxto.həzrəte Mosə(ə) bəçəvon bın tələbi xoto, əvonış de şiddəti mızəmmət kardeşe.əmmo Mosə bə de Xıdo vindemon kardə vırə şeyədə,ə həzrət əyo da ruj həm əlovə mande.bın zəmon Samiri nomo bıə qıləy şəxs,de hiylə məşğul be. əv çı Bəni-İsrayli imoni zəyfətiku suyi-istifodə kardeşe və de jenon zər-zivəron cəm kardey, telıədə qıləy heykəlışon soxte və millətışon bəy pərəstış kardey dəvətışon karde.Samiri de qıləy hiylə vositə jıqoş kardə be ki,çə həmonə heykəliku sədo beşedəbe və jıqo votedəbe:az şımə iyən çı Mosə xıdom. Bəni-İsrayil həm əvışon ğəbul karde iyən əy ıştə məbud zınedəbin.

Kərimə-Ğıron iyo insoni şuuri bə mıhokimə dəvət kardedə və hamyedə:aya nıvindeyone ki,ım heyvon de əvon sıxan votedydəni iyən milləti irşod və hidoyət kardey ğudrətış ni?.