Osmoniyə surəon-25
Osmoniyə surəon-25
Çı deşmıni mığdor bəsə mısılmonon ədədisə se kərə ziyod be və əvon bə mısılmonon nisbətədə de veyə silohon təchiz bıəbin.
Peyğombər(s) de 313 nəfər mısılmonə canqəvəri bə ico bə çı Məkkə de Mədinə miyono bıə Bədri sərzəmini nezi rəsin və peyğombər(s) şəxsən çı canqi əməliyyot iyən ləşkəri komanirətiş bəştə ohdəş peqəte.Ğureyşi ləşkər həm bə Bədri sərzəmini varid bin.qıləy vey tarsnokə şərayit icod bıəbe.Ğureyşi ləşkər deştə ziyodə mığdori və kifoyət ğədərədə bıə hardı-həşi canqi meydonədə fəxr kardedəbin iyən de raxs və saz jıey məşğul bin.əvon sıftədə təsəvvır kardedəbin ki,əvon bo canq kardeyro lozım bıə ğıvvə iyən zərfiyyətışon nıbə de qıləy rəğibi dimbədimin.
Peyğombər(s) vindeşe ki,mumkine çəy yare-yavəron şəv rohət nıhıton və maşki de qıləy oqoniyə ruf iyən cismi çı deşmoni mığobilədə bəmandeyn,bə ilahi vədə əsos bəvon hamyeşe: ehanə şımə mığdor kamebu,ğəmqin məbənən.çı məlayikonku qıləy yolə dastə bəşmə koməq bome.peyğombər(s) bəvon dılvandi doydəbe iyən çəvon oxoyədə səbarz bıey barədə bıə xatırcəmə vədəon doydəbe.jıləvoni mısılmınon bəşəvnəy de oroməti hıtedəbin. canqəvərə mısılmınon norohətəkə məsələonku co qıləyni ım be ki,çı canqi meydoni fiziki vəzyət be. Bədri sərzəmin həmmə de namə huşi pur be,əve çı canqəvəron lınq eşedəbe və bo canq kardero bəvon lozım bıə təhərruki çəvon dastiku seydəbe.əmmo həmonə şəvi voş voye.mısılmınon de voşi ovi vositə dastnımojışon qəte iyən dənıştin.çımisə əlovə çəvon lınqi jiyədə bıə zəmin həm ğoym və mohkəm be.
Maşkinə ruji sıbi vaxti,islomi qədə ləşkər de barzə əhvol-ruhiyyə çı deşmoni sərbozon mığobilədə mandin.sıftədə peyğombər(s) sulhi təklifiş doe.çı Ğureyşi kali yolon meylışon hestebe ım təklifi ğəbulkon.əmmo Əbu-Cəhl bə ın ko mane be və oxoyədə canqi otəş şuləvər be.
Canqi əvvələdə peyğombəri(s) amu Həmzə iyən Əli(ə) və islomi ləşkəri co şucoətinə canqəvəronku idastə bo çə zəmoni adətonku bıə təkbətəkə canq kardero,bə meydoni miyon omin və bə deşmıni ləşkəri şiddətinə zərbəonışon je iyən çı deşmınon səfışon vırto-volo kardeşone. Əbu Cəhli umumi surətədə həmlə kardey əmrış sadir karde.Peyğombər(s) həm bə mısılmınon əmrış karde ki,bə deşmıni ziyodə nəfəron əhəmiyət nıdon və de deşmıni canqkon iyən fəğət Xıdovəndiku koməq tələbkon.ha holədə çı mısılımon istiğomət iyən şucoət, oxoyədə çı Ğureyşi kofiron cərqəş byənde je.nəticədə çı deşmıni ləşkəriku 70 nəfər de kamə ədədışon bıə mısılmınon dasti kıştey bin.de ın tərtibi çı mısılmınon de deşmınon bıə iminə canq de mısılmınon səbarzəti bə oxo rəse iyən ilahi lutf bəvon şomil be.
Ənfali mıborəkə surə 9-ə ayəku de tosə 14-ə ayə bə Bədri canqi həssosə anon iyən Xıdovəndi bə mısılmınon əto kardə mıxtəlifə neməton işorə kardedə ta bəvonədə şık kardey hiss bəyji bımando iyən bo peşonə ğələbəon xoto roy ojko.
Ayəon sıftədə bə firiştəon koməqi işorə kardedə və hamyedə:”Bəştə yod biyənən ə zəmoni ki,bə deşmıni nəfəron iyən çəvon təchizaton vey bıey şiddətinə tarsi xoto,bə Xıdo pənoh bardeyone və ıştə ehtiyoci daston bəçəy tərəf dıroz kardeyone.bın zəmon Xıdovəndi şımə tələbonış ğəbul karde və hamyeşe:mı bəşmə de i həzo qılə firştə ki,dumo yənde (zəmini dimisə)evoydən,komək bəkardem”.peşo hamyedə:”Xıdovəndi ım ko fəğət boşımə bəşorət iyən ğəlbi xatırcəməti xoto, əncom doşe iyən ğələbə fəğt Xıdovəndi tərəfikuye.(zira) həyğətən, Xıdovənd məğub bıənin ni, hikməti soybe”.
Peşo Xıdovənde-Aləm ıştə co qılə lutfi bəçəvon yod dənoydə və hamyedə:”bə yod biyən ə zəmoni ki , (Xıdovənd)ıştə tərəfiku bə şımə qıləy sıvıkə hanış mısəllət kardeşe iyən çı osmoniku boşımə voş vığandeşe ta şıməni deəy pokko və çı şəytoni mırdolə(vəsvəsonku) təmizko. (Xıdovəndi dılış heste deçəy vositə )şımə dılon ğoymko iyən şımə ğədəmon sabitko”.
Xıdovəndi bə Bədri mıhoribə canqəvəron koməqonku qıləyni həm,bə deşmınon dılon tars iyən vəhşət eğande be ki,ım həm oxoyədə bəçəvon ruhiyyə zəyif bıey boyis be.nəticədə islomi qədə ləşkər bə Ğureyşi ruhiyyəş sıst bıə zumandə ğoşuni ğalib ome.
