Osmoniyə surəon-26

Osmoniyə surəon-26

Ənfali mıborəkə surə çı Kərimə-Ğıroni həştminə surəy iyən hicrəti dıminə sori Mədinədə nozil bıə və 75 qıləy ayəş heste.çun çın surə əvvələdə umumi sərvəton iyən məsrəfi hukmon həxədə bəhs bıey xoto,bəy Ənfal nomışon noə.çın Surə co qılə nomonku qıləyni Bədre.zira ın surə Bədri canqi bədiqə nozil bıə.

Deşmınon dayimiyə həmləon mığobilədə çı mısılmınon vəzifə,xomsi hukm, bo cihodiro ictimayi iyən siyosi və canqi cəhəto hozzı bıey lozıməti,canqi əsiron məsələon,mısılmınon canqi sıftədə sıstəti və de islomi şua əvoni zumand kardey,mevzuonin ki,bın surədə bəy işorə bıə.çımisə əlovə,Xıdo royədə çı mıhociron iyən hicrətəkəyon məsələ bın surədə çəvonku bəhs bıə.

Ha imon vardəkəsona! Bə Xıdo iyən bəçəy rəsuli xəyonət məkənən iyən zıne-zıne bəştə əmonəton xəyonətkor məbənən ayə-27.

Kərimə-Ğıroni fərhənqədə əmonətdorəti qıləy her-hovujə vırəş heste iyən  bə jimoni qırd sosyal, siyosi iyən əxloği cəhəton şomil bedə.bə əmonəti xəyonət,qıləy bə xoş nıomə koye iyən ğəbul bıənin ni.hakəs həm bıbu,bəbe bəçəy əmonəti xəynət kardey nıbu və mumkine həmonə odəm mısılmon həm nıbu.ım çı mısılmınon dini iyən əxloği vəzifəonkuye.

Tarıxədə omə ki,Bəni-Ğureyzə yəhudiyon bə əhd-peymoni bəfo nıkardeşone,pojənəti kardeşone iyən de mısılmınon deşmınon həmdast bin.liza islomi ləşkər əvonışon mıhoirə kardeşe.bın zəmon bə ım ğərol omin ki,Səd ibn Məaz çı mısılmınon nımoyəndə unvanədə bışo deəvon mızokirəko.yəhudiyon təğaza iyən tələb kardeşone ki, Əbu-Lubabə nomədə bıə mısılmon çəvon palu boy.çunki,əv həm navko de yəhudiyon dustətiş bıəbe,həmən çəy xıyzon, fərzəndon iyən mol-əmvol çəvon tonoku be.peyğombər(s) çəvon ın tələbış ğəbul karde. yəhudiyon de Əbu-Lubabə məşvərət kardeşone aya məsləhəte çı Səd ibn Məazi həkəmiyyət iyən vositəvonəti ğəbulkəmon? Əbu-Lubabə bəştə xırtə işorə kardeşe.yəni əgər əvon əy ğəbul bıkon,əv əvoni həmməy bəkışte.çən,deçəy təklifi rozi məbənən.bın zəmon vəhyi firiştə Cəbrəyil-Əmin nozil be və pəyğombər(s)-ış çın macəraku xəbədoş karde iyən Ənfali mıborəkə surə 27-28-ə ayəon nozil be.

Əbu-Lubabə dərəse ki,bə Xıdo iyən bəçəy pəyğombəri xəyonətış kardə,əve vey peşmon be və ıştənış de qıləy jiyə vositə bə peyğombəri məçiti sutunon qıləyni dəbasteşe.əv ğəssəmış harde ki,əv nə xorək bəharde və nə ov pebəşome tayin ki,çəy mardey bırəso yaan ki,Xıdovənd çəy tobə ğəbulko.çandə şəv və ruj çın macəraku dəvarde və oxoyədə əv çı huşiku şe.bın zəmon mehribonə Xıdo çəy tobəş ğəbul karde.de mısılmınon vositə ın xəbə bəy rəse,əmmo əy ğəssəmış harde ki,ta peyğombər nıvoy əy oj nıko,əv ıştən ıştəni çı sutuniku oj nibəkay. peyğombər(s) həm jıqoş karde.

Həyğət ıme ki,bə mol,fərzənd iyən şəxsi mənafeyon bıə məhəbbət,isnoni çəş iyən quşisə pardə şodedə.nəticədə əv bə xəto iyən xəyonəton mırtəkib bedə ki,ım həm bə camiyə qonə ziyonon rosneydə. əmmo muhim ıme ki,bənə Əbu-Lubabə bıə qıləy inson rəy ıştə səhfi bəsə dəşedə və boştə ın ko əvəzi beşey iyən cubran kardero cəhd kardedə.