Bə Əllamə Cəfəri bəfoti sorqardışi ruji məxsus bərnomə

Bə Əllamə Cəfəri bəfoti sorqardışi ruji məxsus bərnomə

Imruj Həşi sori Aban manqi 25- ruj ironi təğvimədə de islom iyən ironi dıjdə alim,Osta, Əllamə Məhmməd Təğı Cəfəri bəfoti sorqardımoni ruji nomi əloğədore.alim,filosof,məşhurə muhəğğiğ,bə Nəhcul-Bəlağə kitobi 27 cildədə şərh nıvıştə ostad Əllamə Məhəmməd Təğı Cəfəri rəhmətullah ələyh 1304-ə Şəmsi sori Mordad manqədə İroni Təbriz şəhrədə çı moəku bıə.çəy pı Hoci Kərim de nunpate ko məşğul bedəbe iyən qıləy pok və rostəvıjə merd be.

Əllamə Cəfəri ıştə ibtidoyi məktəbış çı Təbrizi məktəbonədə bino kardeşe.çun,əv sıftədə ıştə moə palu i mığdor de dərs handey məşğul bıəbe,əve əv hejo çı sıftəku bə çominə sinfi ovaşte.peşo 15 sinnədə əv boştə təhsili dəvom doero,bə Tehroni şəhr ezom be.çəyu bəpeştə həm ın yolə şəxsiyyət bə Ğomi elmiyyə hovzə şe və əyo çı Ğomi elmiyyə hovzə yolə çehrəonku dərsış umute.əv boştə hovzə elmon təkmil kardey xoto,bə Əmirəl-Munini Əli(ə)-i hərəmi şəhr yəni bə Nəcəfı-Əşrəfı tərəf bə ro dəqıniye.

Əllamə Nəcəfi elmiyyə hovzəonədə bənə Ayətullah Mirza Həsən Yəzdi,Ayətullah seyd Əbulğasım Xoyi,Ayətullah seyd Əbdulhadi Şirazi,Ayətullah şeyx Murtəza Talığani,Ayətullah seyd Muhsin Həkim iyən Ayətullah seyd Məhəmməd Hadi Milani bıə dıjdə alimonku elmi iyən mənəviyə bəhrəonış barde.Əllamə Cəfəri deştə ziyodə elmi cəhdon 24 sinnədə bə ictihod dərəcə rəse.əv Nəcəfı-Əşrəfədə yonzə sor təhsili bədiqə,bə İron oqarde.

Əllamə Cəfəri çun həm de universteti və həm de elmiyyə hovzə oşnoətiş hestebe,əve ın dıqlə mərkəzi bə iyande anqıl jıey fikədə be.əv fəlsəfə,fiğh,islomədə hınə iyən estetika və sayirə elmon sahədə bıə təhğığon nəticədə 100 qıləsə kitobış nıvıştə.Əllamə Cəfəri 27 cild Nəhcul-Bəlağə kitobi təfsir iyən Movlana məsnəvi həxədə 15 cildinə kitobış həm nıvıştə.