Osmoniyə surəon-35

Osmoniyə surəon-35

Yunisi mıborəkə surə bə həzrəte Yunis(ə)-i macəra işorə kardedə və ımi bo vəoməyon qıləy ibrəti dərs zıneydə.joqo ki,hamyedə:

فَلَوْلاَ كَانَتْ قَرْيَةٌ آمَنَتْ فَنَفَعَهَا إِيمَانُهَا إِلاَّ قَوْمَ يُونُسَ لَمَّا آمَنُواْ كَشَفْنَا عَنْهُمْ عَذَابَ الخِزْيِ فِي الْحَيَاةَ الدُّنْيَا وَمَتَّعْنَاهُمْ إِلَى حِينٍ (98)

Çıro çı hiç qıləy şəhri əhli(çəy faxtədə) imon nıvardeşone ki,(çəy imoni)boəy qıləy foydəş bıbu.ğərəz Yunisi  ğovmi ki,(oxonə ləzədə imonış varde) əmə xarəkə əzobımon dınyo jimonədə  çəvonku bərtərəf kardemone ki, tosə qıləy mıddət boəvon foydəş bıbu.

Dəvardə ayəonədə çı fironıjon həxədə ım nuktə ğeyd be ki,əvon deştə ixtiyori imon nı vardeşone,əmmo bə ilahi tənbihi məruz mandeyədə iyən marqi astanədə beyədə,ıştə imon vardeyışon izhor karde.ım imon vardey həni di be və boəvon hiç qıləy foydəş nıbe.əmmo bın ayədə hamyedə:çıro dəvardə ğovmon çəy vaxtədə imon nıvardeşone ta boəvon qıləy foydəş bıbu? Peşo çı Yunisi ğovmi istisna kardedə və hamyedə:ğərəz  Yunisi ğovm ki,imonışon varde və bın dınyoədə xarəkə əzob çəvonku bə diyəro kardemone.

Həzrəte Yunis(ə) bə pəyğombərəti vıjniye be ta bıtpərəst bıə iyən bə Xıdo imon nıvardə çı Babil iyən Neynəva milləti bə tohid iyən yektapərəstəti tərəf dəvətko.Kərimə-Ğıron fəğət Yunis ğovmi jıqo zikr kardedə ki,oxoyədə əvon çı hidoyəti roşon pəydu karde və çı inhirofiku dastışon kəşe. həlbəttə,co ğovmonku həm ziyodə dastəon bə ilahi pəyğombəron ayinon imon vardəşone.əmmo Yunis(ə)-i ğovmi çı ğovmonku co kardə amil ım be ki,əvon həmməvoy iyən ilahi ğətiyə cəzo rəsey bənav,imon vardeşone.

Tarıxədə omə ki,Yunis(ə) peyğombər ıştə ğovmi imon vardeyku məyus be.əv bə çə devri abidonku qıləyni təklifi əsos,ıştə ğovmış nifin karde.əmmo çı milləti miyono qıləy alim bə Yunis(ə)-i voteşe ki,məyus nıbu,çəvon barədə ijən dıvoko və tiki həm ziyod deçəvon irşod iyən hidoyəti ko məşğul bıbu.ha holədə Yunis(ə)-i tov nıvardeşe və məxloği nifin kardey bəpeştə ıştə ğovmi miyoniku xaric be şe.qədə-qədə ilahi əzobi nışonə və əloməton oşko be,əmmo hələ ilahi əzobi ğətiyə hıkm sadir bıə nıbe.Yunis(ə)-i ğovm ki,çandə kərə çəy rostəvıjətişon mışohidə kardəbe,çə həmonə alimə şəxsi palu omin iyən çəyku ıştə koon oxo həxədə sıvol kardeşone. əvon bə həmonə alimi tovsiyə əsos,çı fırsətiku istifodə kardeşone iyən deçəy rəhbərəti çı şəhriku bə beşin.əvon ıştə dastışon bo dıvo iyən lovə kardero bə pe rost kardeşone iyən xolisonə formədə ıştə peşmonətişon izhor kardeşone və oxoyədə tobə kardeşone.peşo əvon bo Yunis(ə)-i pəydu kardero nəvin,əmmo əvışon nıvinde.

Kərimə-Ğıron bə yod dənoydə ki,tobə,bə Xıdovəndti tərəf oqarde iyən imon vardey,bəbe çəy vaxtədə iyən de aqahəti və ixlosi bə ico bıbu.bəçəvon dıvo iyən tobə təsiri xoto,çı əzobi nışonəon bərtərəf be və ijən oroməti bəçəvon tərəf oqarde.

Yunis(ə) həm bə dıjdə moy luzi eqıniye macəra giriftori bəpeştə,oxoyədə bəştə ğovmi tərəf oqarde və əvon həm əvışon deştə dıl iyən coni ğəbulış karde.ın sərquzəşt nışon doydə ki,çı qıləy aqah iyən dıləsutə rəhbəri ıştə milləti miyono bıə rol,çanədə təsirəkə iyən jimonbaxşe.çəy mığobilədə elm iyən aqahətiş nıbə abid mevcudbe ki,bın macərədə mənfiyə təsirış hestebe. Bəçəyro islom,qıləy Xıdozınə,aqah iyən məsuliyyətinə alimi bəsə noaqahə abidisə bəpe zınedə iyən bəy ğeymət doydə.