Osmoniyə surəon-38

Osmoniyə surəon-38

Hudi mıborəkə surə bəhson dəvomədə sıftədə bə çın surə haftminə ayə dığğət kardedəmon.

“Osmon iyən zəmini şəş ruji ərzədə(dovranədə) ofəyə kəs əve.və çəy(hukuməti) ərş ovi səpe ğərolış qətə ta şıməni imtovonkəy ki,şıməno kon qılə çokə koəkəy. (ha pəyğombər ha!) ehanə bıvotış ki,mardey bəpeştə bəyji bəbiyon,kofiron bəvoteyn:ım çı oşkoə sehriku co qıləy çi ni.”(7)

In ayə ki,çı Kərimə-Ğıroni ecazonku bə hisob omeydə,bə qıləy muhimmə həyğəti işorə kardedə iyən ımi bəyon kardedə ki,hestemoni aləmi iminə materiyal iyən maddə çı ov iyən bənə ovi maddə bıə və Xıdovənde-Xalığ hestemoni aləmış bəçəy əsos binaş kardə.mıfəssıron nəzəku xılğəti sıftədə hestemoni aləm çı ov bıə maddəonku(ya fovğəladə formədə ov bıə iyən maye holədə bıə ğaziku) iborət bıə.peşo bın cəm bıə ovonədə şiddətinə hərəkəton iyən dıjdə tıpemonon bə əməl omə və çəy səviyyəku i hissə dumo yənde bə xaric ğandey bıə.nəticədə çın dıjdə kutlə bə iyənde dəçıke planet iyən qalaktikəon co-co bə əməl omən.hestemoni aləm bəsə ım bənə ovi bıə dıjdə maddəsə ğərolış qətə.Ənbiya mıborəkə surə 30-ə ayədə həm bə ın məsələ işorə bıə.

Ayə vindedənin ki,osmonon iyən zəmin bastə bıəbe.çən,əmə ə dıqləmon iyəndeyku co(oj)kardemone iyən har qıləy coninə çi çı oviku bə əməl vardemone.ayə(de qırd ım nışonəon əvon)ijən imon vardedənin?

Həlbəttə,ın mərhələ iləzədə ne,bəlkəm şəş qılə dırozə devrədə bə əməl omə.

Çın ayə işorə kardə co nuktəonku qıləyni,çın xılğəti dınyo hədəfe.qıləy hədəf ki,çəy umdə ğısmət bə insoni oqardedə.joqo ki,hamyedə:ım xılğətış bəçəy xoto ğərolış doe ki,şıməni imtovonko ta bıvindo şıməku kon qıləyni çok əməl kardedə.

Kərimə-Ğıroni prizmaku dınyo iyən bəşəri xılğətiku hədəf,çəy ruşd iyən kəmole.inson bəbe çı təlim iyən tərbiyə royədə ğərol bıqəto iyən çı təkamuli roy bəsə bıjəno və ha ləzə bəbe bə Xıdo vey nez bıbu.fəğət çı imtovoni nizomi sayədə jıqo qıləy ko real bıey bəzıne.ilahi soxtemonədə hakəs çokə ko əncom bıdo,əv çı barzə məğami soyb bəbe.həlbəttə,ilahi imtovonon çı fərdon daxili iyən rufi vəzyəti zıneyro ni,bəlkəm insoni tərbiyə doey iyən əy perosney məğsədış heste.cəlbəkə çi ıme ki,ın ayə har qıləy insoni erj iyən ğıyməti deçəy kardə çokə əməli əloğədor zıneydə ,nəinki,deçəy əməli ziyod bıey.ım nışon doydə ki,dini islom bə keyfiyyəti təkid kardedə,nəinki,bə kəsrət iyən kəmiyyəti.

Vəynə bərnomədə bə Nuh(ə)-i risolət iyən bəçəy ğovmi ibrətamizə macəra işorə be.çəy bəpeştə Hudi mıborəkə surə ayəon bə həzrəte Hud(ə) iyən bəçəy  ğovmi macəra işorə kardedə.

Təğribən 700 sor İsa-Məsihi(ə) miladi bənav,Ad nomo qıləy ğovm Əhğafi(ımrujnə Yəməni) sərzəminədə jimon kardedəbin.çəvon barzo-bılındə ğamətışon hestebe iyən vey zumandə insonon bin.bə həmınə dəlili xoto,canqədə çokə məharətışon hestebe iyən qıləy şucoətinə canqavər bin.çəvon şəhron obod,havzə zəminon iyən tərovətinə boğonışon hestebe.ın ğovm i mıddət de nazo-neməti jimon kardedəbin,əmmo bənə co rifoh iyən asayişi dılədə jiyə ğovmon,bə məğrurəti iyən xudbinəti dıço bin iyən de zılmo-fəsodi məşğul bin.əvon zolımkor iyən təkəbbırinə şəxson boştə rəhbər ğərol doşone iyən de bıtpərəstəti məşğul bedəbin tainki, Xıdovəndi həzrəti Hud(ə)-ış vıjniye iyən bəçəvon tərəf vığandeşe.

Hud(ə)-i ğovmi macəra dəvomədə Kərimə-Ğıron hamyedə:ayə-50” Bə Ad ğovmi tərəf bıə çəvon bıvə(vığandemone) voteşe:ha çımı ğovma!(fəğət) Xıdo pərəstışkənən ki,bo şımə ğərəz əv hiç qıləy məbud ni və şımə çı iftiro iyən bohtani əhliyon”.

Əmmo həzrəte Hud(ə) dərəse ki,camaat çı həxı mığobilədə təslim bedənin.liza Hud(ə) əvoni bo tobə iyən istiğfor kardey dəvət kardedəbe ta çəvon çı mırdolətiyonku pok bıey zəminə hozzı bıbu və əvoni çı qınoonku bə diyəro kardey bədiqə,çı ilahi rəhməti bəon bəçəvon dimi oj bıey zəminə hozzıko.əv,çı Xıdovəndi bənə havzə zəmin iyən boğon,ruon iyən çeşməon bıə ziyodə neməton bəçəvon yod dənoydəbe iyən cəhd kardedəbe ki,əvon ğasbu oxoyədə rostə roy pəydukon.

Ayə- يَا قَوْمِ اسْتَغْفِرُواْ رَبَّكُمْ ثُمَّ تُوبُواْ إِلَيْهِ يُرْسِلِ السَّمَاء عَلَيْكُم مِّدْرَاراً وَيَزِدْكُمْ قُوَّةً إِلَى قُوَّتِكُمْ وَلاَ تَتَوَلَّوْاْ مُجْرِمِينَ (52) 

 Və (Hud bəştə sıxani dəvomış doe)ha çımı ğovm ha! Iştə pərvərdıqoriku istiğfor tələbkənən,peşo bəçəy tərəf oqardənən iyən tovbəkən ta əv çı osmoniku dumo yənde boşımə voş bıvğando,bə şımə zu əlovə zu baxşkəy və(həxə royku)bə qıno xoto dim məqordınən.

Qınonku tobə kardey iyən oqardey,ğəhəti iyən hışkəsori bərtərəf kardey amilonkuye iyən çı voşi voye,çı ruşd iyən inkişofi zəminə hozzı kardedə.bın ayəonədə Kərimə-Ğıron istiğfor iyən çı qınoku bə Xıdo tərəf oqardey,çı zəminon ovdonəti amil zıneydə və çı maddi iyən mənəvi məsələon miyono qıləy rabitə bərğərol kardedə.beşək,qıləy camiyə ki,bə canq,xəyonət,nifoğ,zılm iyən fəsodi mırtəkib bıbu iyən çəy camaat de mıxtəlifə cinoyəton məşğul bıbon,həmonə cəmyət bərpo nibəbe iyən ilahi və rəhmət bərəkət çəvonku bə diyəro bəbe.