Osmoniyə surəon-41

Osmoniyə surəon-41

وَلَمَّا جَاءتْ رُسُلُنَا لُوطاً سِيءَ بِهِمْ وَضَاقَ بِهِمْ ذَرْعاً وَقَالَ هَـذَا يَوْمٌ عَصِيبٌ77)

Çəmə ezom kardə kəson bə Lut ğovmi soyəx omeyədə,əv çəvon omeyku ğəmqin be və dılış bəçəvon xoto norohət be və(deştəş)vote:ımruj vey saxtə (çətinə) ruje.

Bilaxirin ilahi firiştəon İbreym(ə)-i paluku bə Lut(ə)-i tərəf rəvonə bin şin.Lut(ə) bə zəmon ıştə məzədə ko kardedəbe.naqahan çandə qılə reçinə zoəş vinde ki,bəçəy təfə omeydən və dılışon heste çəy mehmon bıbon.əv çəy dılış hestebe əvoni mehmonko iyən itərəfiku həm çun əv çı qıləy cinsi inhirofiyə muhitədə jimon kardə ğovmi dılədəbe,əve jıqo cıvon iyən ğəşənqə insonon bə ın ğovmi miyon omeyku vey norohət be.çəy bədəm çı həyəconi dılədə be iyən ahəstə-ahəstə ıştən-boştə voteşe ki,ımruj vey saxt iyən vəhşətnokə ruj bəbe.

Əmmo Lut(ə)-i ğovm çı fəsod iyən qıno batləğədə bıə qıləy millət be iyən bə homoseksualizmi noxoşəti aludə bıəbin və bə jen iyən kinon meylışon nıbe.Lut(ə) əvoni bə Xıdoku tarsey,ın dljdə qıno tərk kardey iyən bəştə pokə fıtrəti tərəf oqardey dəvət kardedəbe.əv hejo bəvon çəşnavi doydbe iyən əvoni çın yavə koy ağıbətiku torsıneydəbe.əmmo çəy pand və nəsyəton nəinki,bə ın qınokorə ğovmi təsir kardedənıbe,bəlkəm əvon tiki həm bəştə ım tuğyongərəti zu doydəbin.

Lut(ə) zınedəbe ki,həmonə ğovm bəçəy mehmonon təcavuz bəkardeyn iyən hiç curə çəvonku dast əkəşnin.Lut(ə)-i jimoni həmro ki,qıləy beimonə jen be,çoko ki,çı mehmonon varid bıeyku aqah be,bəsə kəy kumisə pedete və de dastəqə jıey iyən de otəşi sənıey,çə ğovmi mınhərifə fərdonış xəbədo karde.

Kərimə-Ğıron bın barədə hamyedəki,həmonə ğovm de surəti,de taməkorəti iyən bəştə məğsədi rəseyro bə Lut(ə)-i tərəf omin.həmonə ğovm iyən dastə ki,çəy bənav həm de yavə koon məşğul bedəbin.

Lut(ə) çı kəyku bə bi beşe və de nəsyətamizə formə ziyodə cəhdış karde və voteşe:ha məxloğ ha! Çımı kinon şımə ixtiyorədəy və əvon bo şımə pok və təmizin.çən,Xıdoku bıtarsənən iyən mıni çımı mehmonon palu rısvo məkənən.peşo voteşe:ayə şımə miyono qıləy ağılmand, ləyoğətin iyən rəşidə inson mevcud ni ki,şıməni çın xəcolətin iyən bevəcə əməlonku oqəto?.

Lut(ə)  de ın mislış nıbə fədokorəti dılış hestebe çə ğovmi hıtə vijdoni bəyjiko ta ğasbu əvon bə həxə roy boon.əmmo həmonə millət çə həzrəti tələbışon rədd kardeşone və voteşone:çəmə bəştı kinon hiç qıləy meylımon ni və əmə de hiç qıləy bəhonə ıştı mehmononku dast ni bəkəşemon.bın zəmon həmonə yolə peyğombər xeyli peşmon iyən norohət be.”ayə-80-81

قَالَ لَوْ أَنَّ لِي بِكُمْ قُوَّةً أَوْ آوِي إِلَى رُكْنٍ شَدِيدٍ ) 

(Lut)Voteşe:eykaş şımə vədə çımı qıləy zum bıəbe ya qıləy ğoymə peştı-puri pənohım bardəbe. (Ko bə ın vırə rəseyədə firiştəon)Voteşone:ha Lut ha! əmə ıştı pərvərdıqori vığandə kəsonimon (çəməku norohət məbi)zira,əvon hiç faxti bətı dast pəydu kardey nibəzıneyn.çən,şəvi niməku cınqıri dəvarde,deştə xıyzoni (çın sərzəminədə) bə bi beşi və(mığət bıbi)şıməku hiçkəs(bəştə dumo həm)diyə nıkəyn.əmmo,ıştə jimonim həmro(deştə məbə,zira)bə həmməy rəsə bəlo (bəy) həm bərəse.həyğətən,çəvon(məhv bıey)faxt sıbi faxte.ayə sıb nez ni?

Oxoyədə əzobi ləzə ome rəse və çəvon şəhr pevuşkiney be iyən osmoniku sığ və tul bəsə çəvon səpe rube və çəvon şəhrış bo vəomə nəslon ibrəti moyəş karde ta cokəson cokəson de xərobəon iyən əsəron vindey pand bıqəton.

Lut(ə)-i daston bə bəşəriyyəti qıləy şiddətinə çəşnavi doydə ki,həmcinbozəti iyən homoseksualizm qıləy yavə ,nomınosib iyən həxı royku inhirofə əməle.islomədə homoseksualizm qıləy djdə qınonku bə hisob omeydə iyəb islomi rəvoyətonədə de şiddəti mızəmmət bıə.umumən bənə zina ya həmcinsbozəti bıə harcurnə cinsi inhirofəti,bə insoni ruf iyən vucudi bina ziyodə yavə təsir noydə iyən çəy tarəzəti bəyənde jeydə.zira inson solim iyən təbiiyə surətədə bəştə mıxolif cinsi meylış bedə və ım meyl çı bəşəri rişəş bıə ğərizəonkuye iyən çı insoni nəsli baği mandey zamine.əmmo harcurnə hərəkət ki,ın meyli çəy həyğiyə royku xaricko,insonədə inov psixoloji noxəşəti icod bəkarde.

Həmcinsbozəti iyən homoseksualizm qıləy təzahure ki,məələsəf kali ğərbi məmləkətonədə rəvocış pəydu kardə iyən bəzi vırəonədə həm ğanuni surətədə ğəbul bıə.beşək jıqo ğeyri-ğanuniyə iyən nomınosibə rəftoron pevolo bıey,çəvon qınonku izərrə həm bəkam kardedəni iyən əxloğ, insoniyyət və solimə sosyal rabitəon məhf kardedə.

Ha holədə ım qıləy kulliyə ğanune ki,har qıləy ğovm iyən millət bə zılm iyən sıtəmi aludə bıbu,ıştə lınqo bəsə ilahi əmron marzisə bənav dırozko iyən ilahi vığandə peyğombəron ro nışon doey dığğət nıkon,Xıdovənde-Aləm əvoni bə saxtə əzobon giriftor bəkarde.Kərimə-Ğıroni ayəon həyğətədə bə təmom dınyo milləton qıləy xəbərdorətiye iyən şımə jıqo qımon kardedon ki,çın ğanuniku mustəsnon və ın hıkm fəğət bə navkonə ğovmon ayid bıə.

لِكَ مِنْ أَنبَاء الْقُرَى نَقُصُّهُ عَلَيْكَ مِنْهَا قَآئِمٌ وَحَصِيدٌ (100) 

( Ha peyğombər ha!) In(mətləb)çı ovdonəti iyən şəhron xəbəonin ki,əmə əy botı nəğl kardedəmon.çəvon kali qılə ısətən mandə iyən bəzi qılə viron bıən.

Əmə bəvon zılm nıkardemone,bəlkəm,əvon ıştən bəştə sıtəmışon rəvo zıne və çı pərvərdıqori ğəzəb omə faxti,çən çəvon(çı)Xıdo əvəzi vanq kardə xıdoon bəçəvon holi hiç qıləy foydəş nıbe və çəvon zərəlo-ziyonış ziyod karde.101