Təkfiri cərəyonon-12
Təkfiri cərəyonon-12
Metodşınosi iyən mərıfətşınosi miyono dı səviyyədə bıə rabitə mevcude.har qıləy metod qıləy məxsusə mərıfətış heste.
Sələfiyon metod ifrot dərəcədə bə nəğli təkyə kardeye.bəçəyro mərıfətşınosi zəminədə həm sələfi əndişə bə ifroti varid bıə.jıqo qıləy nəzə bə ın mənoy ki,dini məsələon sahəonədə zıney mənbə fəğət hədise,nəinki co qıləy çi.joqo ki,ehanə qıləy ko barədə dıqlə mıxtəlifə hədis mevcud bıbu,iqlə mevzu həxədə de dıqlə farğ kardə hukmi fətvo doey bəbe.bə Məhəmməd Omarə etığodi əsos,əgər səhobəon qıləy məsələdə de iyande ixtilofışon bıəbu,İbn Hənbəli çə həmonə mevzu barədə dıqlə hukmış hestebe.çıro ki,bə hədisədə dıqlə hədis mevcud be.bə İbn Ğəyyimi votey əsos,İbn Hənbəli tərəfdoron bəy “İmom” votedəbin.boəy vey saxt be ki,bə qıləy çi nisbtədə fətvo bıdəy ki,çı sələfiku omə hədis nıbu.İbn Hənbbəli zoə Əbdullah votedə:ıştə pıku məseme ki,votedəbe:zəyfə hədis bomı çı ictihodisə həm vey mahbube.Əhməd ibn Hənbəli bə ağli dəlilon hiç qıləy dığğət kardedənıbe.hətto çı ziddiyətinə hədison miyono qıləyni bəsə coqləynisə tərcih iyən bəpe qəteyro həm çı ağliku oko doydənıbe.
Sələfiyon ifrot dərəcədə bə hədisi meyl pəydu kardey,boyis bıə ki,əvon islomi ziyodə maarifi dərk kardey nızınon.jıqo bə hədisi ifrot dərəcədə meyl pəydu kardey nəticə boyis bıə ki,əvon hədisi bəsə Ğıronisə bənav bızınon.sələfiyon nəzəku ehanə çı Ğıroni de qıləy rəvoyəti miyono ziddiyyət mevcud bıbu,əvon sınnəti bəsə Ğıronisə bənav qəteydən.bə Əhli-sınnət iyən hədisi meylış bıə məşhurə alim Əşəri votey əsos,Ğıron sınnəti nəsx kardey nibəzıne,əmmo sınnət Ğıroni nəsx kardey bəzıne.
Bın miyono rəvoyəton mevcude ki,Ğıroni bəsə rəvoyətonsə bənav zıneydən.əmmo sələfiyon noçor bıən bə hədisi ziyodə dığğət kardə holədə,ın rəvoyəton cə`li iyən pesoxtə bıə hədis bızınon və ya elon kardedən ki,Ğıroni bə sınnəti bıə ehtiyoc,bəsə sınnəti bə Ğıroni bıə ehtiyocisə veye.əvon hətto tikihəm ifrotışon kardə və votəşone:”Ğıroni bəsə hədisonsə bənav zıney qıləy səhfe ki,”Zənadiğə”(bedinon) əvışon pesoxtə”.Zənadiğə Xıdo inkor kardə kəson bin ki,islomi sıftənə zuhir kardə əsronədə islomi sərzəminonədə jimon kardedəbin.Əhle-hədis ziyodə vırəonədə bo əvoni tənğıdəkəyon rədd kardero çəvon fik iyən ideoloqiyəon çı zənadiğə fiki məhsulon zıneydəbin.
Sələfiyon nəzə zıney mənbəonku qıləyni həm çı səhobə iyən tabeyini əməlonin.çın qrupi nəzəku səhobə iyən tabeyini əməl,təşriəkəy iyən şəryəti bəyon kardedə.bə ifrot dərəcədə sələfiyon meyl pəydu kardey boyis bedə ki,əvon dini sahəonədə bıə harcurnə çı ağliku oko doey ğədəğənkon iyən çı din və maarifi həddı-marzi sırfən fəğət çı səhobə çərçivədə xulosəkon.jıqo qıləy nəzə inov bə sələfon siyosi iyən elmi cəhəto mərcəiyyət doeye.
