Osmoniyə surəon-43

Osmoniyə surəon-43

Yəğub(ə)-i donzə qılə fərzəndış hestebe ki,çəvonku dıqləyni yəni Yusif(ə) iyən Benyamin iqlə moəku bin.Yəğub(ə) bə ın dıqlə zoon ziyodə məhəbbət nışon doydəbe.zira əvvəla,əvon çəy həmməysə hırdə fərzəndon bə hsob omeydəbin və təbiiyə surətədə çəvon bə veyə himoyə ehtiyocişon hestebe.saniyən,məxsusən Yusif(ə)-ədə fovğəladə istedodi əsəron mışohidə bedəbe.ın amilon boyis be ki,Yəğub(ə) bəvon nisbətədə veyə məhəbbət nışon bıdo.

Yusif(ə)-i boon bə çəvon pı deəy jıqo nezə rabitə bıey xoto pəxıləti kardedəbin və votedəbin ki, əmə zumandə cıvononimon iyən ıştə pı jimoni çok-çoki idorə kardedəmon.əmmo Yusif iyən çəy bo çəmə pı palu vey mahbube.

Həsodət iyən pəxıləti hiss jıqo çəy boonış vodor karde ki,bəçəy ələyh qıləy məkrinə plan bıkəşon.əvon voteşone:əmə ya Yusifi bıkıştəmon və ya əy bə qıləy diyəroə sərzəmini tərəf bobəmon və əyo şodəmon ta idəfənin bıdə çəmə pı bəmə vey dığğətko.ha holədə həsədi otəş bəvon icozə doydə nıbe ki,ıştə nodırıstə ko ağıbəti həxədə fik-famkon.

Bın dastonədə de ojə oşkoə holəti çı həsədi bə insoni noə yavə əsəron işorə bıə.zira qahi vaxti həsəd bəşəri bə beməntığ iyən vironəkə hərəkəton marzi tərəf şovğ doydə.pəxılə inson boştə əxloği fəziləton kəsb kardey əvəzi,çı cokəson barədə təxribəkə cəhdon əncom doydə.....

قَالُواْ يَا أَبَانَا مَا لَكَ لاَ تَأْمَنَّا عَلَى يُوسُفَ وَإِنَّا لَهُ لَنَاصِحُونَ (11) 

Voteşone:ha çəmə pıə! Çiç bıə bətı.əmə bə Yusifi xeyrxah bıə holədə boçi əy bəmə etibo kardedəniş?

Yusif(ə)-i boon məxfiyonə de mehribonə boə hissi çəy ğətl və ya kəyku dərbədər kardey planışon kəşe iyən de həxə ğıyofə ıştə pı palu omin və voteşone:çəmə əzizə pı! Çıro Yusifi hiçvaxti ıştəku bə diyəro oqəteydəniş iyən bəmə aspardedəniş?boçi əməni bəçəmə boə nisbətədə əmin zınedəniş?qıləy holədə ki,əmə beşək çəy xeyrxahimon.maşki əy deəmə bə ico bıvğand ta bəşəhri xaric boy,ıştən-boştə bıqardo,çı doon miyvəonku bahardo iyən ıştə sə bətaspono hənəkko.ehanə tı çəy əslomətiku norohət məbi və əmə həmməy əy nığo bədomon və obəqətemon.

De ın tərtibi əvon mahironə surətədə qıləy planışon kəşe ta Yusif(ə)-i çəy pıku cokon.Yəğub(ə)-i voteşe ki,mı bəçəy çımıku bə diyəro mandey tov vardey nibəzınem iyən tarsış heste ki,neyçi əy bahrdo və şımə çəyku xəbəon nıbu.boon voteşone ki,joqo qıləy çi çokonə munkine? Qıləy holədə ki,əmə qıləy zumandə dastəmon iyən çəyku mığət bəbemon.jıqo qıləy çi mimkinış ni. nəhoyətən,Yusif(ə)-i boon ıştə pışon rozi karde ta Yusif(ə)-i deştə bobən.

Sıbhi vaxti əvon ıştə pı tonoku omin.Yəğub(ə) Yusif(ə)-ış bəçəy boon aspardeşe və əvon bəro dəqınin.Yəğub(ə) hejo jəqo de niqəronə çəşon ıştə fərzəndi dəvonedəbe və de tobə qıləy zəmoni əvonış ıştə nəzorəti jiyədə oqətebe,əvon bə Yusif(ə)-i məhəbbət nışon doydəbe.əmmo çoko ki,əvon xatırcəm bin çəvon pı həni əvoni vindedəni,bə Yusif(ə)-i bıə ıştə qırd kin-kudurətışon oşko karde və binoşon karde əv bo je-kuye.Yusif(ə) çəvonku pənohış piye,əmmo əvon hiç qılə bəy etino kardedə nıbin.oxoyədə əvışon bə qıləy çoli nezi bardeşone.rəvoyətədə omə ki,Yusif(ə)-i boon əy bə çol şodeyədə,əv naqahan binoş karde bo sıre.çəy boon vey heyrətin mandin ki,ım ısət boçi jıqo sıredə?Yusif(ə)-i voteşe:”çı yodo benıbəkardem ki,iruj de bənə şımə zumandə boon bıey xoto vey şo bim iyən ıştən-boştə votedəbim ki,ikəsi ki,jıqo qıləy zumandə peştış hestebu,çı rujiqori hodisəonku hiç qıləy ğəmış nibəbe.mı bəruji bəşmə peştıpur bim,əmmo ısət şımə çənqalədə əsirim.Xıdo şımənış bəmı mısəllətış karde ta mı ımi umutım iyən bızınım ki,bəbe ğərəz əv bə hiçkəsi təkyə nıkom.

Yusif(ə)-i dastoni dəvomədə jıqo omə.bın zəmon əmə bə Yusifi vəhy kardemone(dılvandi domone) ki,qıləy ruj bərəse tı əvoni çəvon ım yavə ğəsd iyən nəxşəku aqah bəkaş.qıləy holədə ki,əvon tıni nibəzıneyn.de qıləy co bəyoni qıləy ruj bərəse ki,çı ğudrəti taxtədə bənışteş və əvon ıştə ehtiyoci dasti bəştı tərəf dıroz bəkardeyn.əmmo ıştı jıqo barzə məğamı bəbe ki,əvon bovə nibəkardeyn ki,tı çəvon bıvəş.həmonə ruji tı bəvon bəvoteş ki,aya şımə nıbiyon deştə qədə bo Yusifi jıqo kardeyone ya jəqo kardeyone? Həmonə ruji əvon ıştə kardə koonku peşmon iyən xəcolətin bəbeyn.nəhoyətən,Yusif(ə)-i boon ıştə yavə planışon bə icro noşone iyən Əvışon bə çoli dılə şodoşone.

Şanqovə nezi Yusif(ə)-i boon ıştə pı palu omin.qıləy pı ki,besəbronə ıştə azizə fərzənd Yusif(ə)-i intizori kəşedəbe.çoko ki,erəxe Yusif çəy zoon miyono ni,saxt pelıve iyən Yusifi xəbəş se.əvon voteşone:əzizə pı! əmə şimon de mısobiğə iyən hənəki məşğul bimon.əmmo Yusifi zuş nıbe deəmə hənəkko,əvımon noe ıştə şey-şuyon palu.çən,peşo çəmə sə jıqo tasb be ki,həmmə çi, hətto ıştə bomon həm çı yodo bekarde.bın zəmon neyçi omə əvış hardə.əmmo zınedəmon ki, haqrçənd əmə rost həm bıvotəmon,tı hiçvaxti bəçəmə sıxanon bovə iyən əy ğəbul nibəkardeş.çıro ki,tı çımi bənav ımı vindedəbiş.