Osmoniyə surəon-44

Osmoniyə surəon-44

Həzrəte Yusif(ə)-i boon əvışon bə çol eğandey bəpeştə,çəy şəyışon solimə surətədə çəy tanədə bekardeşone,de xuni aludə kardeşone  və peqətışone vardeşone çəy pı palu.həni çı yodo bekardeşone ki,ehanə neyçi bə Yusif(ə)-i həmləş kardəbe,çəy şəy çand vırədə poə-poə əbi.çəvon pı çoko ki,çəşış eqıniye bə şəy,həmmə çi dərəse və voteşe:şımə du votedon,bəlkəm şımə nəfsaniyə həvaye-həvəson boşmə ın koş dərostəşe.deməkə ki,əv ıştə zoə firoğədə sutudəbe iyən ıştə çəşi arsi rukardedəbe, voteşe: mı səbr bəkardem.qıələy reçin iyən ğəşənqə səbr.

Yusif(ə) çı çoli dəhşətin iyən vəhşətnokə zılmətədə coyli mandəbe və ıştə telə vaxton de saxti dəvordınedəbe.əmmo çəy bə Xıdo bıə imon,səkinə və oroməti,bəçəy dıli umu eğandedəbe.çandə ruj bədiqə,qıləy kərvon royku ome rəse və çoli nezi qıləy mənzılədə bo istirohətiro mande.ovi məmur iyən ov vardəkəs qıləy dəlv iyən vedrəş bə çol ğande.Yusif(ə) çoli nığılə vırəku dərəse ki,çoli səpe sər-sədo omeydə və peşo vindeşe ki,qıləy vedrə  pentoniku erəxə.rəyrə ıştənış bə həmonə jiyə dəçoknışe.ovi məmur hissış karde ki,həmonə vedrə həddiku ziyodə  qone.ovi vardəkəs dezzu əvış pekırneşe bə pe və naqahən çəy çəşon bə qıləy reçinə surətış bıə zoə eqıniye və voteşe:mıjdəvoni bıbu.ım ovi əvəzi qıləy hırdəne.kərvoni əhl Yusif(ə)-ışon deştə Misr bardeşone və əvışon Misri vıjorədə de kamə ğeyməti həvateşone.Misri Əziz ki,çı Fironi iminə vəzir be,Yusif(ə)-ış hırye.de ın tərtibi de Yusif(ə)-i bə Misr şıey,çə həzrəti jimonədə qıləy tojə fəsl bino be.

Çun çı Misri Əzizi hırdənış nıbe,əve əvış bəştə jeni Zəlixa doşe iyən aspardşe ki,bəy çok diyəko.Yusif(ə) çı Misri Əzizi kədə ruşdış  karde,ozavziye iyən qıləy bə həddi-buluği rəsə və çı elm iyən hikməti soyb bıə dıjdə zoə be.Yusif(ə) çun qıləy reçin iyən məlkə sıfətış hestebe,Misri Əzizi çəy xoş omeydəbe iyən çəy jimoni həmro həm bəy dılış dəvastəbe.joqo ki,çəy eşğ bəçəy coni nığılə vırə nıştəbe və ım eşğ qədə-qədə çəy coni sutuneydəbe.Zəlixə bəştə məğsədi rəseyro mıxtəlifə tələon çı Yusif(ə)-i rosyə noşe,əmmo pok iyən pərhizkorə Yusif(ə) bəçəy ın ğeyri-ğanuniyə əmron nıpemande.