Şiyə torıxi yolə alimon-2

Şeyx Kuleyni ki,millət əy de rostə sıxan iyən əməli zıneydəbe,hədis iyən rəvoyəton zıney koyədə qıləy məhorətış hestebe ki,şiyə iyən sınni əy ıştə dini təhğiğaton mərcə və ovard kardə kəs hisob kardedəbe. bə həmonə dəlili xoto,bəy “siğətul-islom” yəni islomi bəy etımod kardə kəsi ləğəbışon noəbe.əv çı şiyə məzhəbi çoqlə muhimmə hədisə kitobonku (kutubə ərbə`ə)qıləyni yəni “usuli-kafi” kitobi mıəllife.

Şeyx Əbucəfər Muhəmməd bin Yəğub bin İshoğ Razi de Şeyx Kuleyni nomi məşhur bıə və Kafi kitobi soyb və Hicri-Ğəməri seminə sərədə çı şiyə məzhəbi həmməysə məşhurə alim,fəğih iyən muhəddis bıə.Şeyx Kuleyni bə mevcud bıə məlumaton əsos,Hicri-Ğəməri 258-ə sori  yəni de İmom Həsən Əskəri(ə)-I imoməti zəmoni bə ico,İroni həmməysə kanə sərzəminonku qıləyni Rey şəhri ətorof bıə Kuleynədə  və qıləy dindor və elminə xıyzonədə bə dınyo çəşış oj karde.çəy pı və day ıştə zəmonə məşhurə alim iyən mıhəddisonku bin.ım yolə alim de həzrəte Məhdi(ə) ğeybəte-suğra yəni qədə ğeybəti zəmoni bə oxo rəsey yəni Hicri-Ğəməri 329-ə sori çı dınyoku şe.Şeyx Kuleyni elmi təhğiağaton iyən fəoliyyəton çı həzrəte Məhdi(ə)-I ğeybəte-suğra zəmonədə be.binobərin,həzrəte Məhdi(ə)-I çoqlə xass və məxsusə nayibon ki,çı imomi de milləti miyono bin,əvonış dərk kardə və çəy de məsumə imomi(ə) hiç nıbu de ə həzrəti nayibon vositə qıləy rabitə bərğərol kardey mumkin be.

Şeyx Kuleyni sıftədə islomi elmonış ıştə pı iyən day palu ki,ıştə rujiqori nominə alimonku bin,omuteşe.çəy bədiqə əv boştə dini təhsili dəvom doeyro,bə Rey şəhr şe.bə devronədə Rey şəhri əhali veyni Şafeyi iyən Hənəfi məslək bin.əmmo diyon Əhli-Beyt(ə) aşığon iyən şiəyonku iborət be ki,çəvon çokə əxloğ iyən rəftor  cokəson vodor kardedəbe ki,bəvon ehtırom bınon.bəçəy xoto Rey şəhr de şiəyon şəhri məşhur be. həmonə xıslət boyis be Rey ki,bə devronədə çı bənə İsmailiyyə,Hənəfi,Şafeyi iyən şiyə əndişə və təfəkkuri bəyənde qıniyə mərkəz bıbu.Kuleyni çı ƏbulHəsən Muhəmməd bin Əsədi Kufi məhzərədə hədisi elmonış omute.bə zəmonədə Ğərmətiyon deştə iltiğati iyən umuj qıniyə əğedəon ki,çı Zərtuşti,Manuyi iyən İslomi əğedəonku iborət be,de mısılmınon əğayed iyən mığəddəsaton mıborizə ko məşğul be.Şeyx Kuleyni çın ıştə roy qim kardə fırğə  rəddiyyədə “Ərrəddu ələlğəramətə” kitobış nıvışte və çı şiyə dast rəsədəş ğərol doe ta de ın tərtibi əvoni çın inhirofə əğedəonku hifzko,oqəto.