Şiiə yolə alimon-70

Molla Muhsin Feyz Kaşani Hicri-Ğəməri 1007-ə sori torıxi iyən fərhənqi şəhr bıə Kaşan şəhrədə bə dınyo çəşış oj kardə.Feyz Kaşani xanedan de elm iyən təğva məşhur bin.çəy pı Rəziyyuddinşah Murtəza Kaşani şəhri məşhurə fəğih,mutəkəllim,təfsirəvon iyən ədibonku be və çəy  inə həm Zəhra-Xatun qıləy alimə iyən şayirə və çı reyşəhri yolə alimonku bıə Ziyaul-Urəfa kinə be.Muhəmməd Muhsin fəğət dı sor ıştə pı sayə jiyədə jiyə və çəy bədiqə ıştə fazilə day iyən ıştə alimə amu tərbiyə jiyədə dini elmon mığəddiməş omutə.çəy vist sinnış hestebe ki,deştə yolə bo boştə təhsili dəvom doeyro bə İsfəhan şəhri şin.İsfəhan bə rujonədə çı kişvəri poytəxt iyən İslomi mıxtəlifə elmon sahədə çı yolə alimon və mahirə ustodon cəm bıə mərkəz be.Şeyx Bəhayi,Molla Sədra və Mirdamadi İsfəhanışon bə İslomi dınyo elmi ğutbi təbdilışon kardəbe. Molla Muhsin çın mınosibə mevğıyyətiku vey çokə bəhrəş barde və çəvonku elmi istifodəş karde…..

Əllomə Feyz Kaşani deştə zəhmət və ciddiyyəti elmi barzə mərtəbəonış kəsb kardeyış zıne və çın mərtəbəonku həmmə dəvarde və çı Şeyx Bəhayiku hədisi nəğl kardey icozəş kəsb karde.ım icozə bın mənoədə be ki,qıləy elm omutəkəs bə hədisi zıney dast pəydu kardey bədiqə,həni icozəş heste ta hədisi nəğlko və çəy səhihəti barədə qıləy nəzəku bəhsko.əv peşo ıştə bə coqlə şəhron bıə səfəş bino karde ta çı co şəhron alimonku həm bəhrə bıbu.Feyz Kaşani cıvonəti zəmonədə bə iştihodi dərəcə rəse və ıştəni çı fiğhi qırd məsələonədə nəzə soyb zıneydəbe və dıjdə fəğih iyuən mıştəhidon çəy iştihodışon təyid və təsdığışon karde….

Feyz Kaşani ziyodə cəhd kardə qıləy alim və mıxtlifə elmonədə qıləy komilə şəxs be ki,ıştəku ziyodə təlifatonış bə yodiqor haştəşe.ım yolə alim ıştə kitob iyən risolə nıvıştey koş həjdə soriku binoş karde və əv 65 sinnədə beyədə bə sa çıl qılə unvoni nezi kitob iyən risloləonış nıvıştəbe ki,çəvonku har qıləyni İslomi camiyə elm iyən fərhənqi ozavziyedə veyə təsirış bıə.Feyz Kaşani əsəronku qıləyni “Təfsire-Safi” nomoş heste ki,Kərimə-Ğıroni təfsirədə metəbərə kitobonkuye. Feyz Kaşani boştə ım əsəri nıvışteyro,de tosə ə zəmoni bo Kərimə-Ğıroni nışvtə bıə qırd şiyə iyən sınni təfsironış de dığğəti mıtoliyəş karde və peşo ım təfsirış bə şiyə mustənəd və metəbərə rəvoyəton əsos nıvıştəşe.çın yolə alimi coqlə dıjdə kitobonku qıləyni nom “Əlvafi” nomış heste ki,ım kitob həm hədisi mevzuyədə nıvıştə bıə.Feyz Kaşani bo Vafi kitobi nıvışteyro  çı şiyə çoqlə metəbərə hədisi kitobonış yəni Kafi,Təhzib,İstibsar iyən Mən la yəhzəruhul fəğih kitobonış de dığğəti ıştə nəzəkuş dəvordıne və de tikror bıə hədison həzf kardey və şodey iyən de hədison şərhədə təkmili baxşon əlovə kardey,ıştəku qıləy foydəninə kolleksiyə və məcmuəş bə yodiqor haşteşe.Əlvafi kitob çandə cildədə çap bıə.Feyz Kaşani həmçinin kəlom,irfon,əxloği iyən ədəbi sahəonədə həmçinin çandə qılə əsəronış heste ki,bın kırtə fırsədə bo əvoni təğdım kardey məcol mevcud ni….