Həşi məhzərədə

Iştəni de barzə əxloği dərostey və bəçəy barzə dərəcə rəsey de rohti bə dast omeydəni.İlahi həmmə ənbiya və peyğombəron bə ın dəlili xoto məbus bin ta bə insoni bə barzə kəmolaton rəseyro roy omuto və əy heyvoni jimoniku bə mutəali iyən barzə həyoti səmt sevğ bıdo.İron İslom İnğılobi Yolə Rəhbər həzrət ayətullah Xameneyi təkid kardedə ki,bə əxloği kəmolaton dast pəydu kardey bə ikkərə və rohətə formədə bə dast omeydəni.bəlkəm bəpe nəfsi sape ziyodə mıroğibə bıbu və çəy tələbon vəy qətey lozıme.ə həzrət insonədə rufi təzkiyə və təmiz kardey bo əxloği fəziləton kəsb kardero qıləy mığəddimə və vəsə hisob kardedə.İnğılobi Yolə Rəhbər bə Ali-İmrani mıborəkə surə 164-ə şərifə ayə əsos jıqo nəticə seydə ki,Peyğombəre-Əkrəm(s) deştə dəvəti bə Xıdovəndi səmt və bə İslomi nuroniyə təlimon bəyoni tərəf,bo əxloği iyən rəhmoni təlimon ğəbul kardey xoto,dılon hozzı kardeye.Ali-İmrani mıborəkə surə 164-ə şərifə ayədə çı İslomi peyğombəri vəzifəon həxədə jıqo omə:”yuzəkkihim (əvoni pokko və bəvon kitob iyən hikməti omuto).Yolə Rəhbər çın ayə izohədə hamyedə:((bın ayədə)təzkiyə ki,həmonə əxloği ruşd və ozaviziyeye.çı təlimiku bənav omə.ım həmonə əxloği tərbiyəy.ımruj çəmə bə ın əxloği tərbiyə jıqo qıləy ehtiyocimon heste.həm əmə İroni millət islomi camiyə bın coğrafi məhdudədə və həmən islomi dınyo,İslomi dıjdə ummət.mısılmonə camiyə”... Həzrət ayətullah Xameneyi jıqo etığodış heste ki,İslomi ummət çoko ki,dinış çı hukumətiku və əxloğış çı idorətəçiku coş karde, bə qıləy benizoməti iyən beintizoməti dıço bin..... Bəle,əslə İslom ə dine ki,çəy nəhoyət əxloğinə insonone,nəyinki,bə tars iyən dəhşəti əsos.əslə İslomi təlimon bə fərdi iyən iştimoyi isloh bıey komək bəkarde,nəyinki,bənə DAİŞ terroristə qrupon ki,duyədə çı İslomi nomi hoziyə hərəkəton kardedən.qıləy zəmon ki,əmə çın rəhmoni dini təlimonku bə diyəro bımandəmon,qıləy beəxloğə camiyə bəmə nəsib bəbe.həzrət ayətullah Xameneyi bın barədə təkid kardedə:”əxloğ ki,nıbe və beəxloğəti hakim bıə zəmonədə ğəzəbon, həvaye-nəfson.nodonətiyon,dınyotələbəti.şəxsi ğərəzətiyon,həsodəton.pəxılətiyon və suyi-zənnon bə iaynde daxil be,qıləy zəmon ki,əxloği rəziləton bə miyon ome,bəvədə jimon saxt bəbe.fəzo tanq bəbe.insoniku solimə tənəfffusi ğudrət sıey bəbe..... Ə həzrət ıştə sıxanon dəvomədə ğərbi camiyə bənə qıləy beəxloğ camiyə nımunə elon kardedə. Yolə rəhbər hamyedə:ımruj şəhvətpərstəti məntığ ğərbi dınyoədə təmayule.votedəmon çıro həmcinsbazon və homoseksualiston koon tərvic kardedon?votedən ım qıləy bəşəri təmayul və meyle.ım çəvon məntığe.həmonə odəmon ki,şəhvətbozəti səhnədə və bə şəhvətbozəti babədə sıə xətti rioyət kardey və bəşəri hiç onıqnə mıxtəlifə şəhvətbozətiyədə bənav şeydən və oxoyədə novbət bə ğəsovət və sığədıləti rəseydə.insonon kışteydən,be qınə şəxson ğətl kardedən.hiç qıləy qıno nıkardə holədə milləton etosneydən.ım qıləy cohiliyyte ki,ımruj mevcude.modern və mıosirə nodonəti”..... İroni İslomi İnğılobi Yolə Rəhbər çı milləti qırd dastəonku tələb kardedə ki,ıştə nəfsi sape ko kardey koyədə ğoymə qəm və ğədəmon şodon.ə həzrət jıqo hisob kardedə ki,əmə həmonə xomə maddəmon ki,ehanə ıştə sape ko bıkəmon və ım xomə maddə bə qıləy barzə şikilon təbdil kardeyımon zıne,bəvədə ıştə jimonədə lozım bıə koonımon bə vırə rosnə.çun çı mənəviyyati zizə kardə cıvonəti fəsl çı odəmi ğəlbədə ,əve inğılobi Yolə Rəhbər cıvonon bə bın sinnədə ıştə nəfsi sape ko kardey əhəmiyyəti təşviğ kardedə və bə cıvonon hamyedə:”cıvonon ıştə nəfsi sape ko bıkon-həm elmi, həm əxloği,həm mənəvi və həm dini fəoliyyəton və həmən ıştə cismi sape koykon və ıştə ruhiyyə və umu bo ın kişvəri mıdofiyəro,hifzkon ki,ım qıləy vey dıjdə sərmoyəy”. Məsul şəxson və devləti mınosibə posti soybon əxloğmədorəti qıləy ziyodə əhəmiyyətış heste.boçi ki,çəvon feel və rəftoron çok-çoki çı milləti tərəfiku rəsəd beydə və bəvon qıləy nəzorət heste və inev çəvonku ulqu peqəteydən.təbiiye çoko ki,məsul şəxson barzə səviyyədə çı təğvo iyən əxloğiyyəti soyb bıbon,bəvədə qıləy vey çokə iştimo soxtey bəzıneyn.