Rəməzon,Xıdo manq
Rəməzon,Xıdo manq
İlahi ziyofət və mehmonəti manq ome rəseyədə,həmmə mısılmınon bo rujə qətey səmt vanq jeydə.bın manqədə rujə qətey vocibe və dınyo qırd vıronədə bıə təmom mısılmınon bın əzizə manqədə sıbi əzoniku de tosə məğribi əzoni çı hardey iyən peşomeyku dast kəşeydən.mısılmınon bın manqədə de rujə qətey,ıştə pərvərdıqori ziyodə ibodət kardedən və de Kərimə-Ğıroni tilovəti,dıvo handey iyən mınocoti və de bə təşnəti iyən vəşyanəti tov vardey, ıştə rufi sof və pok kardedən.əmmo,rujə rufi sofəti iyən qınonku pok bıeyku əlovə,bo insoni cism iyən bədəmi həm ziyodə foydəonış heste.Xıdo-Rəsul(s) hamyedə:”rujə bıqətənən ta solim bıbənən”.
Isətnə zəmonədə və de bənə diyabet,M.S. və vəhmi və sayirə çandə qılə tojə noxəşətiyon ziyod bıən, inson bəpe bə bədəmi səlomətəti iyən xorəki dığğətko.ısət insonon ın muhimmə məsələ sərəsəyn ki,bə qıləy solim iyən foydəninə xorəki malik bıey və çəy kəno varzeşi bərnoməon bə vırə rosney,bə insoni səomətəti qıləy nığılə təsirış heste.fəstfudon,ğazdorə peşoməninə çiyon,nemekin iyən ruyəninə xorəkon və sayirə mıəyyən bıə və kali fərdon bə səlomətəti rəsey xoto,bə beməyon hardey iyən Vegetarianəti səmt dimış qətə və çı təbiiiyi iyən naturalə miyvəon ovonku oko doydə.bəzi qıləyniyon həm dıyo xorəkon hardedə,kamə nemek istifodə kardedə və boştə qıləy xorəki rejimi vıjniyedə. De ın tərtibi ısətnə insonon ki,dılışon heste çı dırozə umr iyən səlomətəti soyb bıbon,həmməysə çokə xorəkon pəydu kardey dumon.həlbəttə,bo insoni cismi foydənin bıə qıləy komilə proqrami təsiri inkor kardey nibəbe. əmmo,aya isnoni bədəm fəğət de çokə xorək hardey iyən peşomey səlomət iyən solim bəmande? insoni ləvəruyə sistem ki,har ruj dayimi formaədə xorəki həzm iyən cəzb kardə holədəy,aya çəy bə qıləy istirohəti ehtiyociş ni?.
Insoni mədə-ləvəruyə sistem çı qəvi sıftəku qətə de tosə xorəki ro iyən mə`də və insoni ruyəon har ruj xorəkon həzm iyən cəzb kardedə və zəhr iyən toksinon dəf kardedə.bın miyono cəğə,xun,rəğon, hormonon iyən insoni vəzon həm bəpe nəzədə qətey bıbu.qıləy rujə qətəkəs Rəməzonə manqədə 30 ruji mıddətədə bəştə ləvəruyə sistemi ın fırsəti doydə ki,ıştə 11 manq dəvominə surətədə fəoliyyəti bədiqə,tikəy istirohətko.çoko ki,bo insoni bədəmi mıxtəlifə co uzvon istirohət kardey lozım iyən zəruriye,isnoni ləvəruyə baxş həm ki,çı insoni dayima hərkət kardə orqane,bəpe istirohətko iyən ım ko həyoti və vocibe.ısət ım ko bəsə I manq çı qıləy sabitə proqramə çərçivədə bıə xorəki bərnomə bıbu, çəy bo insoni bıə foydəon inkor kardey nibəbe.Rəməzonə manqədə rujə qətey, bə ın ləvəruyə sisitemi məxsusən bə mə`də ın istirohəti fırsəti doydə.ımrujnə doktor və həkimon və həmçinin kanə tibbi koəvon və mutəxəssion həm jıqo hisob kardedən ki,mə`də soliməti bə insoni bədəmi səlomətəti həm ziyodə təsir noydə.çoko ki,Xıdo-Rəsul(s) hamyəşe:”Əlmi`dətu bəytu kulli daain vəl-həmiəti rasu kulii dəvain”-mə`də har qıləy dard iyən noxəşəti kəy və pərhiz iyən ictinob çı har qıləy damoni əsos və bınəy”.
