İmom Həsən(ə),diroyət və kəroməti məzhər

İmom Həsən(ə),diroyət və kəroməti məzhər

Rəməzonə manq,Xıdo mehmonəti manq ki,bə nimə rəse,ilahi məlayikon ıştə pəronışon bəsə Mədinə şəhrisə oj kardeşone.astovəon həm həmonə şəvi  vey dəvəşin ta çı Peyğombəre-Əkrəmi(s) nəvə mevludi ruji id və şoyvonətiyədə şərik bıbon.həzrəte Əli(ə)-I de Fatimeyi-Zəhra(s) peyvəndi sıftənə miyvə roysə be.Xıdo-Rəsul(s) iyən Əli(ə)-I lıv-lıputonsə vey barzə şoyvonəti naxşış bastəbe və qıləy reçinə zoə çı Zəhraye-Əzhər(s)-I dovnəku bə dınyo ome.Həsən ibn Əli(ə) deştə bə dınyo omey,zəmin iyən zəmonış bə viloyət iyən imoməti xanedani coqləyni həşi pemey təmşo kardero dəvət kardeşone.Əssəlamu.

Həsən çokəti iyən reçinəti mənoədəy və İmom Həsən(ə) həxədə qırd çokə sıfət və xısləton ehtivo kardedəbin.ə həzrət ıştə şərifə umri haft sorisə tikəy kam peyğombər(s)-I devronədə dəvordıneşe və bın devronədə de Xıdo-Rəsul(s)-I məhəbbəti dıyo dimbədim ome və hejo çə həzrəti məhəbbətinə ağuşədə be.peyğombər(s)-I bə İmom Həsən(ə)-I və bəçəy boə İmom Huseyn(ə)-I bıə ziyodə məhəbbəti ayid bıə məlumaton şiyə iyən əhli-sınnəti ziyodə mənbəonədə omə.Xıdo-Rəsul(s) Həsən(ə) iyən Huseyn(ə)-Iş vey piyedəbe və ıştə ın məhəbbəti bəvon nışon doydəbin.Xıdo-Rəsul(s) əvoni bəştə ağuş peqətedəbe və elon kardeəbe:”Həsən iyən Huseyn əhli-vəhışti cıvonon sərvər və rəyise”.jıqo bızın Peyğombəre-Əkrəm(s) vəhışti ətri Həsən(ə) iyən Huseyn(ə)-ku vəhışti bu istişmam kardedəbe iyən məsedəbe…

İbn Şəhr Aşub ıştə “Əlmənağib” kitobədə nıvıştedə:”Həsən ibn Əli(ə) haft sorədə peyğombər(s)-I məclisədə huzurış hestebe və bə peyğombər(s)-I vəhy bıə çi boştə mo votedəbe”.

Həzrəte İmom Həsən Muctəbo(ə) bənə ıştə pı İmom Əli(ə) iyən mo Fatiməye-Zəhro(s) boştə pərvərdıqori xolisə bandə be.Əv,deştə pərvərdıqori razo-niyoz kardey aşığ be.Həzrəte İmom Həsən Muctəbo(ə) çı milləti miyono həmməysə vey abid iyən zahidə şəxs be.İbn Şəhr Aşub ıştə “Əlmənağib” kitobədə nıvıştedə:”həzrəte İmom Həsən Muctəbo(ə) havaxti vuzu iyən dastnımoj qəteyədə,çəy qırd bədəm larzeydəbe və çə həzrəti mıborəkə ranz zard bedəbe.çımi səbəbi çə həzrətiku dəparseyədə, hamyeşone:loyığe ikəs ki,dılış heste rəbbul-ərşi palu bo bandəçəti bımando ranqış zard bəbe və bəlarze”. Həzrəte İmom Həsən Muctəbo(ə) bə məçit şeyədə çoko ki,bə məçiti bə rəseyədə,ıştə sə bə osmoni səmt rost kardedəbe və hamyedəbe:”Xıdolim ha! ım ıştı mehmone ki,ıştı dərqo vəyədə mandə.ha çokə ko soybə Xıdo ha! ıştı qınokorə bandə ıştı palu omə.çən,bəştə çokətiyon xoto, çımı yavə koonku dəvard,ha Kərim ha!....

İmom Həsən Muctəbo(ə) ıştə əzizə inə şəhodəti bəpeştə,ıştə buzurquvarə pı Əli(ə)-I kəno de zılmi pur bıə qıləy rujqorış dəvordıne.ə həzrət ıştə pı əziyyəton iyən milləti çı həxıku bə diyəro mandey iyən dınyotələbon ğudrəti bəştə dast sıey deştə çəşon vindedəbe və hejo ıştə pı kəno və çəy munis be. Əv, rəhbərəti iyən xilofəti ıştə pı həx zınedəbe.çıro ki,zıneydəbe ki,Xıdo-Rəsul(s) Ğədir-Xumi ruji Əli(ə)-I dastonış bəştə dast qətə,bəyış ıştə bo xitobış kardə və Əli(ə)-ış ıştə bədiqə canişinış,tohidi pərçəmdor  və milləti hidoyətəkə elonış karde və çandə həzo nəfər həm həmonə ruji de Əli(ə)-I beyətışon karde. Dod-əmon çı əhd-peymoni darıştə kəson dastiku!.

İmom Həsən Muctəbo(ə) həm ıştə umri dırozi və ıştə əzizə pı şəhodəti bədiqə,çı xəyonəton və əhd-peymoni darıştə kəson əzob-əziyyətış çaşte.əmmo,qırd ım saxtətiyonış nəyinki,de ğəzəb iyən kin-kudurəti,bəlkəm de səbr iyən istiğoməti bımon nəzəş karde.

Doktor Məhəmməd Huseyn Rəcəbi Dəvani islomi torıxi barzə mıhəğğiğ votedə:” İmom Həsən Muctəbo(ə) islomi torıxi,bəlkəm bəşəri torıxi  həmməysə tel iyən saxtə zəmonış dəvordıne.qıləy mevğıyyət ki,İmom Əli(ə)-I şəhodəti bəpeştə de Kufə camaati xəyonət və co ğusuron bə ico bə əməl ome və nəhoyətən İmom Əli(ə) de məzlumiyyəti pik nuxtə ğurbətədə bə şəhodət mığami rəse”. …

Əli(ə)-I şəhodəti bədiqə millət İmom Həsən Muctəbo(ə)-ışon bəsə Muviyəsə bəpe zıneşone və xəlifə vıjneşone.qıləy imom ki,ıştə zəmonə mınofiğə milləti çok-çoki zıneydəbe.əve sıftədə xilofəti ğəbul kardeyış piyedənıbe və bilaxır de milləti bə cuş omə seyli vositə əvış ğəbul karde.həlbəttə,de ın şərti ki,çı imomi votəyon yəni çı sulh bıbu ya canq,ğəbulkon.