Osmoniyə surəon-235
Osmoniyə surəon-235
Məarici mıborəkə surə Kərimə-Ğıroni haftominə surəy,Məkkədə nozil bıə və 44 qılə ayəku iborəte.
Peyğombər(s)-i oxonə Həcci zəmonədə və Ğədir-Xumədə Xıdo-Rəsul(s) Əli(ə)-ış bə xilofəti məğamış mənsub karde və çə həzrəti həxədə jıqo hamyeşe:”mən kuntu movlahu fə Əliyyun movlahu”.hakəs mı çəy mevlambu,Əli həm çəy mevlay.
In macəra vey rə bə qırd bilad və məmləkəti pevolo vıə mıntəşir be.Numan bin Haris Fəhri de ın xəbə məsey vey ğeyzin be.əv bə Xıdo-Rəsuli(s) xıdmət rəse və ərzış karde:”tı bəmə əmrı karde ki,bə Xıdo vohidəti iyən bəştı peyğombərəti imon biyəmon və şoydətikəmon.əmə həm şoydəti kardemone.peşo bə cihod,Həcc,rujə,nımoj və zəkoti əmrı karde,əmə həm əvonımon ğəbul karde.de ın holi tı rozi nıbiş tayin ki,ın cıvonə merd Əli(ə) boəmə peşt ıştə caninişin təyin karde? Aya ın sıxan ıştı tərəfikuye ya çı Xıdo tərəfiku?peyğombər(s) de oşkoə formə hamyeşe:”ğəssəm bə Xıdo ki,ğərəz Əv co məbud ni,ım əmr çı Xıdo tərəfikuye”.
Numan bovə nıkardə holədə dim qordıneşe,qıləy holədə ki,votedəbe:Xıdolim ha! ehanə ım sıxan həx və ıştı tərəfikuye,çı osmoniku bəçəmə qıləy sığ bıvğand(ta bə jıqo ruji əmə şoyd məbəmon).bın zəmon qıləy sığ osmoniku rube,qıniye bəçəy sə və əvış kışte.bın zəmonədə Məarici mıborəkə surə sıftənə şərifə ayəon nozil be.
“Vağe bıə əzobi tələbəkə qıləy əzobış tələb karde.(qıləy əzob ki)bə kofiron məxsuse(və)əy dəf kardə kəs ni”(1-2).
De ın bəyoni oşko kardedə ki,ilahi əzob vağe bıənine və fəğət bə kofiron məxsuse iyən hiç qıləy maneyə çəy omey vəy qətey əzıni.
Məarici mıborəkə surə 3-4-ə ayəonədə,bə ın əzob çəy tərəfiku bıə kəsi işorə kardedə və hamyedə:”(ın əzob) barzə dərəcon soyb bıə Xıdovəndi tərəfikuye.firiştə və Ruf çəy mığdor penco həzo sor ruji,bəçəy tərəf ,bəpe bəşeyn”.
Beşək,çı firiştəon oruc və bəpe şıeyku məğsəd,cismoni oruc ni,bəlkəm ruhaniye.yəni əvon bə ilahi ğurbi məğami səmt tadibəsə bedən və bə ruji ki,ğıyoməte,bo fərmonon sıey və boçəy icro xoto,hozzı bedən.
Ruf iyo Cəbrəyili mənoədəy və çəy ayədə bıə zikr,bə Cəbrəyil(ə)-i çı firiştə və mələkon miyono məxsusə vırə və məğami xotoye.bə ın ayə əsos,Ğıtoməti ruj penco həzo sor dəbəkəşe.de qıləy iborəti həmonə ruj bə dınyo soron hisobi əsos,penco həzo sori mığdorədəy.bəziyon həm ehtımolışon doə penco həzo sori ədəd bo təksir və dırozətiroye,nəyinki,ədədi xoto.yəni həmonə ruj vey dıroz dəbəkəşe.
Məarici mıborəkə surə 3-4-ə ayəonədə bə ğıyoməti ruji ayid bıə vəğayə və hodisəon işorə kardedə və hamyedə:”qıləy ruj ki,osmon bənə mısi sı kardey bəbe və bandon bənə paşmə (volo)bəbeyn”.
Osmon həmonə ruji bənə sı kardə bıə metali və filizi ov kardey bəbe və bandon vırto-volo iyən fəzoədə pevolo bəbeyn.jıqo bızın paşməy ki,vo və kulok əy bardə jıqo-jəqo.çın vironəti bədiqə, qıləy nuyə dınyo bə əməl bome və insonon qıləy nuyə jimon bino bəkardeyn.
Ayəon dəvomədə bəyon kardedə ki,axırəti dınyo bərpo bıə zəmonədə,bə hisob-kitobi rəsey proses jıqo saxt iyən şiddətin bəbe ki,hakəs ıştə nicot iyən perəxey fikədə bəbe.həmonə ruji hiç qıləy səmimi və nezə dust,bəştə dusti soyəx nibome və çəyku hiççi xəbə nibəstəne.jıqo ni ki, duston əyo iyande nızınon,bəlkəm əvoni bə iyənde nışonbədon,əmmo qınokor jıqo bəştə koon giriftore və fərdon vucud jıqo tarsi eqətəşe ki,hiçkəs çı co kəsi həxədə fik kardey zınedəni.
Həmonə dəhşətinə vəzyətədə qınokorə fərd osuzu bəkarde ki,ey kaş bo çın ruji əzobiku ozod bıeyro,ıştə fərzəndon,həmçinin jimoni həmnro və bıvon fidyə və ğıboni doey zınəşbe.dınyoədə bəy pənoh doə ğovm-ğəbilə və zəmini dimisə bıə qırd milləti əvəz əkəy ta əv ıştə coni peroxney bızıno.əmmo,həmonə ruji boəy hiç qıləy nicot və perəxey ro nibəmande.
