İnğılobi yolə hədəfon

İnğılobi yolə hədəfon

Ğərbi Asiyə məntəğədə oxonə hodisəon veyni inev de Amerkə məntəğədə bıə mıdoxiləon rabitəş heste. bə Amerkə rəftoron məxsusən bəçəy Ğərbi Asiyə məntəğədə bıə sultə tələb və mıdoxiləkə rəftoron nəzə kardeyədə,nışon doydə ki,Amerkə siyosəton hiçvaxti bə beynəlxalğ norma,usul və prinsipon tabe bıəni. ım ğeyri-normativon və benəzmiyon Trampi zəmonədə de bə beynəlxalğ həxon iyən usulon əyani surətədə dığğət nıkardey,bə veyə səviyyə rəsə.

Bın prosesədə Amerkə de şiddəti kişvəron bəçəy itərəfinə hərəkət iyən siyosəton tabe bıey vodor kardeydə.de təəssıfi kali məmləkəton bın royədə bə rədəvardə mənfəəton əsir bıən və de Amerkə həmcəhət bıə holədə reqiyonədə  bə vəkolətiyə canqon,behronon iyən bənə DAİŞ və əlğaydə bıə terroristə qrupon bə əməl ome boyis bıən.nəticədə ım nodırıstə rəftoron çı məntəğə veyə behron iyən  problemonış tiki həm mırəkkəb kardəşe.

In hodisəon reqiyoni səviyyədə sərostə formadə bə Amerkə,seonist rejim iyən Səudiyyə Ərəbıstoni  himoyə jiyədə bıə siyosi iyən hərbi bloki himoyə jiyədə ğərolış qətə.

Isətnə tojə vəzyətədə Səudiyyə Ərəbıston səy kardedə ıştəni reqiyoni hodisəon əsliyə mehvər və mərkəz hisob kardedə və de tınd iyən aqressivə siyosətonku oko doey,məntəğədə ziyodə problem və norohət çiyonış icod kardə ki,çın siyosətonku qıləyni bə Yəməni məzlumə milləti ələyh canq və muhoribə bə ro dəğandeye.

Amerkə reqiyonədə ıştə reqiyonal mıttəfiğon roliku oko doey və mıdoxilə kardeyku hədəf,ıştə hərbi ğudrəti təhmil iyən məcbur kardeye.ım siyosət qıləy holədə təğib bedəki,Amerkə prezdent Donald Tramp i sor bənav 2018-ə sori Minesotta əyolət və ştatədə ıştə ehandımoni vaxti voteşe:”bə dəhşətinə ğərolon xoto,əmə Miyonə Şərğədə 7 triliyyon dollar xarc kardemone.əmmo hiç qıləy nəticəmon nıqəte”.

Əmmo,Tramp ıştən həm bə həmonə səhf və xəto mırtəkib be və de bənə DAİŞ terroristə qrupon himoyə kardey və xaos və hərcı-mərcəti icod kardey,bə həmonə strateqiyə əsos,Səudiyyə Ərəbıston məntəğədə de canqtələb və əsliyə aktyorə kişvəri nomi ıştə mənfiyə roli ifo kardedə.

Bə siyosi mışohidəçiyon nəzə əsos,Amerkə-seonist rejim iyən Səudiyyə Ərəbıstoniku iborət dayirə,bə mığoviməti mehvər və dayirə ziyodə təzyiğ nışon doey dumon və bə həmonə dəlili xoto,Ərəbıston bo İroni veyə problem icod kardey xoto,çandə mərhəlinə strateqiyə tərtibış kardə ki,de Amerkə iyən seonist rejimi rəftori ulqu mıtobiğ və mıvofiğe.

Səudiyyə Ərəbıstoni bənə bo İroni nati alternativəti ,de seonist rejimi ıştə siyosi iyən ixtisodi rabitəon çok kardey və məntəğədə de seonist rejimi ıştə stratejikə hədəfon təğib kardey bıə koon bın cəhətədəy.

Amerkə-seonist rejim iyən Səudiyyə Ərəbıstoniku iborət dayirə de İroni izolasiyə və təcrid kardey hədəfi bıə cəhdon,çı Trampi məntəğədə strateqiyə muhimmə baxşonku qıləyni hisob kardey bəbe.

İron İslom Respublikə deşmınon məğsədışon heste İroni reqiyonədə bıə xətər və təhdidi,de namə ğudərti əbzoron oşkokon.bə həmonə əsos,nəticə sıey bəbe ki,ım dayirə və mehvər reqinonal səviyyədə cəhd kardedə,çı İroni de məntəğə məmləkəton miyono təfrığə icodko.əmmo,əmniyyəti çokonə muhofizə kardey bəbe?.