Ğıroni bəşorəton-2
Ğıroni bəşorəton-2
Xıdovənde-Aləm həm dınyoədə və həmən axırətədə komək bəkarde.çoko ki,Ğafiri mıborkə surə 51-ə şərifə ayədə bə ın nuktə təkid kardedə və hamyedə:”əmə beşək ıştə rəsulon və əkəson ki,imonışon vardə,dınyo jimon iyən qıləy ruj ki,şoydon bəsəpoysə bəheşteyn(ğıyoməti ruji)komək bəkarde”.
In ayə qıləy komil və har tərəfinə cəhətış heste ki,həyğətədə qırd çokətiyon və barzə sıfəton ıştədə ehtivo kardedə.sıftədə bə Xıdo dıl dəvastey və bəy qıləy zumandə imon pəydu kardey.peşo ıştə qırd jimoni de imoni ranqi dərostey və çəy ətrofədə hərəkət kardey.veyə şəxson hestin ki,ıştə bə Xıdovəndi bıə eşğiku dəm jeydən,əmmo əmələdə qıləy istiğomət və mığovimətışon ni.əvon həmonə sısıt və ocizə fərdonin və çoko ki,ıştə nəfsi şəhvəton tufoni mığobilədə ğərol qəteytdən,bəvədə de imoni vido kardedən və əy vadoydən və əmələn mışrik beydən.əvon çoko ki,çəvon mənfəəton de xətər və təhlukə dimbədim omeydə,ıştə həmonə zəyif iyən mıxtəsərə imoni həm çı dasto doydən.həzrəte Əli(ə) Nəhcul-Bəlağə xutbəon qıləyniyədə ın de məno pur bıə ayə de qıləy co iborəti təfsir kardedə və əy tilovət kardey bədiqə hamyedə:”və ğəd ğultum “Rəbbunallah” fəstəğimu ……şımə voteyone:çəmə pərvərdıqor Allahe. ısət çın sıxanisə bımandənən.bəçəy kitobi təlimoton və çəy əmr doə roonədə əməl kardey və çəy ləyoğətinə pərəstışi royədə istiğomətkənən,çəy fərmoni dayrəku xaric məbənən,çəy ayinədə bidət mənənən və hiçvaxti deəy mıxolifət məkənən”…..
İslom imon,pərhizkorəti,sulh iyən əmniyyəti sayədə bə ruşinə vəomə qıləy umu baxş kardedə.Kərimə-Ğıroni nəzəku bə ayəndə və vəomə umudəvo bıey,de ilahi məşiyyət və piye əloğədore.bə ilahi sınnət və ğanuni əsos fəğət əkəson ki,ıştəni çı imon iyən əməli ro və məsirədə ğərol bıdo,bə həyğiyə perəxey və səbarzəti umu kardey bəzıne.Ğıronədə bə vəomə umu əsos,çokə fəziləton kəsb kardey və yavə çiyon tərk kardeye.dınyo jimon bo insonon çı imtovoni vırəy və boəy qıləy fırsəte ta əv bo axırəti jimoni tuşə və azuğə kəsbko.inson ıştə çokə əməlon mıkofoti ğəbul bəkarde və həmçinin ıştə yavə koon ağıbəti həm bəçaşte.co tərəfiku həm bə həyğəti imon ki,xılğəti dınyo bə ilahi ədoləti əsos bıeye,bə təğva və pərhizkorəti boyis beydə və pərhizkorəti həm bə nicot və perəxey boyis beydə.Kərimə-Ğıronədə çandə kərə bəşorət və mıjdəvoniş doə ki,çokə ağıbət bə təğvaninə şəxson və pərhizkoron məxsus bəbe.bə pərhizkoron həm mıjdəvoniş doə ki,əvon axırətədə de ziyodə neməton pur bıə vəhışti boğonədə bəbeyn və çəvon pərvərdıqori bəvon əto kardə çiyon xoto,əvon vey şo və məsrur bəbeyn.
Kərimə-Ğıronədə zikr bıə çı peyğombəron təbşir və inzari bəhsiiku iborət bıə 17 qılə vırədə,13 qılə vırədə bəşorət bəsə inzarisə bənav ğeyd bıə.kali şəxson ım təğəddum və bənav dənoey çəy nışonə zıneydən ki, Xıdovəndi əsliyə məğsəd,mıjdəvoni və bəşorət doeye.ha holədə mıəyyən bıə çi ıme ki,təbşir iyən inzari sınnət və adət,islomi yolə peyğombəri risoləti ğovhər bə hisob omeydə və bəçəy xoto ki,har dıqlə Məkki iyən Mədəni devrədə istimrar və dəvomış pəydu karde və əv de peyğombəri tərbiyəvi iyən alicənobə hədəfi nomi zikr bıə.
