İLAHİ RƏHBƏRON -20

İLAHİ RƏHBƏRON -20

Hicri-Ğəməri daminə sori Zilğədə manqi,islomi əzizə peyğombər(s)-i bə muminon əmrış karde ta de barzə vanqi bə milləti elonkon ki,Xıdo-Rəsul(s) ımsor bə Həcc bəşe.Zilğədə manqi vistı penc ya şəşminə ruj be ki,Həcci dıjdə kərvon ki,kali şəxson çəvon ədədış sa həzo nəfər elonışon kardə,de islomi peyğombər(s)-i rəhbərəti çı Mədinəku xaric bin və Zilxəlifədə(Şəcərə məçitədə) ehromi libosış bə tan kardeşe və təlbihış vote.mısılmınon həm bə ə həzrəti tabe bıə holədə ehromi olətışon bə puşneşone və ləbbeyk voteşone. Xıdo-Rəsul(s) bın səfədə de milləti votemon kardero çı har qıləy fırsətiku oko doydəbe və ilahi hukmon boəvon bəyon kardəbe.peyğombər(s) Ərəfə ruji ki,bəy Həccu-Əkbər votedən,boştə əshobi xutbəş hande və bın xutbədə bə çandə qılə muhimmə nuktəon işorəş karde.joqo ki, hamyeşe:”ha məxloğ ha!bəçımı sıxanon quş bıdənən,mumkine çın sori bədiqə həni hiçvaxti şıməni mıloğat və deşmə vindemon nıkom.ha millət ha! şımə con və mol bə iyande hərome. çoko ki,şımə ın manq və ımruj həromə manq və ruje.şımə qıləy holədə ki,de Xıdo vindemon bəkardiyon ki,əv şımə kardə koonku şıməku sıvol-cəvob bəkarde.hakəsi dastədə çı cokəsiku qıləy əmonət heste,bəçəy soybi oqordıno.ha məxloğ ha! Şəyton bın sərzəminədə pərəstış bıeyku əbədi məyus bıə.demiyən ıştə dinədə çəyku bərhəzərkənən və bə diyəro bımandənən. ıştə jenon həx-huğuğonku mığət bıbənən.əvon şımə dastədə əmonətin.ha millət ha! Həmmə mısılmnon de iyande bıvə və boən və hiç qıləy mısılmon coqlə mısılmoni molədə,ğərəz çəy roziyəti hiç qıləy həxış ni”. Peyğombər(s) ıştə həcci bın səfədə seqlə muhimmə sıxanrani və moyizədə dayima bə vəhdət iyən mısılmınon bıvəti məsələ işorə kardedəbe.Xıdo-Rəsul(s)-i vey norohət kardə çi,islomi ummət və mısılmınon vəomə və ayəndə vəzyət be.çıro ki,ə həzrəti çı mınofiğon macəra dumo bıey və çəvon məkrinə planonış mışohidəş kardəbe.ə fərdon ki,çandə zəmon bənav Təbuki ğəzvədə ə həzrəti terror kardey məğsədışon hestebe və çəvon ım yavə hiylə vəy qətey bədiqə, əvon çın dini rəhbər və ə həzrəti rehləti çəş kardedəbin ta bəştə hədəfon bırəson.co tərəfiku həm Ərəbi cəzirə və ləpəki mıxtlifə noxtəonədə nıbuvvət və peyğombərəti iddio kardə duyəvıjə fərdon bə əməl oməbin.... Millət de peyğombər(s)-i omutə təlimon ıştə həccışon bə oxo rosne.Xıdo-Rəsul(s) Məkkəku dar sor bə diyəro mandey bəpeştə ijən bə ın şəhr oqardə be.bəçəy xoto,həmmə kəs çəş kardeəbe ki,Həcci mərosim bə oxo rəsey bədiqə,ə həzrət i mıddət Məkkədə bəmande.əmmo,ə həzrət Həcci mərosim bə oxo rəsey bədiqə,bilofosilə bəştə mınodi yəni bə Bilal Həbəşi əmrış karde ta bə milləti elonko ki,həmməkəs bo Məkkəku hərəkət kardey xoto hozzı bıbu.təğribən həmmə hociyon de peyğombər(s)-i bə ico hərəkətışon karde.hətto çəvon ro hərkət bə şimoli səmt bıə Yəmənıjon həm mandin və de peyğombər(s)-i bə ico bə ro dəqınin.çoko ki,bə “Kuraəl-Ğəmim” məntəğə ki,”Ğədiri-Xum” –i rəsin,peyğombər(s)-i hamyeşe:”Əyyuhənnas,Ucibu daiyəllah.Ənə rəsululullah...ha məxloğ ha! Xıdo dəvətəkə .... ğəbulkənən ki,mı Xıdo rəsulim”.çə həzrəti ım sıxanon muhimmə mətləbon nışon doydə.qıləy mətləb ki,Xıdovənde-Xalığ Mayidə mıborkə surə 67-ə şərifə ayədə bə peyğombər(s)-i jıqo nozilış karde:”ha pəyğombər ha! Iştı pərvərdıqori tərəfiku bətı nozil bıə çi,komilə surətədə bıroson və ehanə jıqo nıkoyş,çəy risolətı bə vırə rosnəni və Xıdovənd tıni çı milləti(xətəronku) hifz bəkarde”..... De ın ayə nozil bıey,peyğombər(s) de Xıdovəndi koməki ıştə canışini elon kardey barədə qıləy peştıpurətiş pəydu karde və boəy icro kardero cəhdış karde.çən,peşo Ğədiri-Xumi məntəğədə əmrış karde ki,munadi vanq bıjəno ta həmməkəs bımando və çəvon bənav şıə kəson həm bə dumo oqardon.qırd hociyon ıştə mərkəbiku piyodə bin və saru etatin və navədə şıəkəon həm oqardin omin və millət həmmə Ğədiri-Xumədə piyodə bin və muntəzir mandin.həşi vey sı və həvo jıqo vey qam və norohətəkə be ki,peyğombər(s) iyən millət çı həşi hərorətiku ıştəni oqəteyro ıştə olət və əboşon bəştə sə dəqətəşonbe və həmçinin ıştə lınqi jiyədə ğərolışon doəbe.peyğombər(s)-i əshob həm qıləy soğnə vırədə bo həzrəti qıləy vırə və inbər hozzı kardero,sığ iyən çı şatur və asbon zınq və yəhəronışon cəm karde və çəy sape qıləy parçəşon şode.peyğombər(s) bəsə şaturon cihozisə bıə minbərisə petate və Əli(ə) həm jiyədə çə həzrəti kəno mandəbe.Xıdo-Rəsul(s) ıştə sıxnonış bino karde və hamyeşe:”Ğıroni botın və çəy təfsiri bəyon kardedəni illa ım kəs ki,mı çəy dasti qətedəm və əy rost kardedəm.peşo ə həzrəti Əli(ə)-i dastış rost karde və hamyeşe:”Mən kuntu movlahu fəhaza Əliyyun movlahu.hakəs mı çəy mevla soybimmbu,ım Əli həm çəy mevla və yole”.... Cəmyət həmmə çı həyəconi dılədə ğərğ bıəbin.hakəs qıləy çi votedəbin və Əli(ə)-i deçəy çokə sıfətonku qıləyni tarif kardedəbin.çən,peyğombər(s)-i sıxanon orəxey bədiqə,millət bə Əli(ə)-i çə həzrəti canışin bıey xoto təbrik voteyro bə nav omin.Xıdo-Rəsul(s)-i hamyeşe:”şık bə Xıdo ki, əməş bəsə həmmə aləmisə bəpeş qəte”.peyğombər(s) məğlubiyyət və ğələbəonədə şehrə və sıfətəş kam əvəz əbi.əmmo,Ğədiri idə ruji de şo və sırə dimi və şinə təbəssımi hamyeşe:”bəmı təbrik bııvotənən,bəmı təhniyyət bıvotənən.zira,Xıdovənd mınış bə nıbuvvət və çımı Əhli-Beytış bə imoməti məğamış vıniyə”..... Peyğombər(s) bə Mədinə oqarde.Zilhiccə və Məhərrəmə manqonş Mədinədə dəvordınışe.qədə-qədə çə həzrəti noxəşəti əloməton oşko beydəbe.həmonə ğəmqinə rujon qıləyniyədə ki, peyğombər(s)-ış dəqətəbe və çə həzrəti hol çok nıbe,bə məçit ome və ıştə risoləti bə milləti rosney təsdıği xoto bəvə ome və bə milləti elonış karde ki,harkəsi həxədə ki,cəfom kardə,boy bəvə və ıştə həxı bıstəno və xısoskon.qıləy merd bə nez ome və voteşe:qıləy zəmon ki,şımə bə şaturi taziyonə jeyon piyedəbe,səhvən bəmı qıniye.ə həzrət anədə zəyif və lod bıəbe ki,bo həxğonnasi əhəmiyyət və milləti roziyəti sıyero,ıştə şəyış bəpe barde ta çə həzrətiku xısos və intiğom sıey bıbu.həmonə merd nez be və çı xısosi əvəzi Xıdo-Rəsul(s)-i bədəmış maçə və pusəş karde..... Nəhoyətən,həmonə dardnok və telə ruj ome rəse.peyğombər(s) noxəş yonquyədə ıştə çəşon bastəbe və çı huşiku şeydəbe və bə huş omə zəmonədə həm oxonə nuktəon bə milləti yod dənoydəbe və Əli(ə) həm çə həzrəti kənoyədə be.Həsən iyən Huseyn(ə)-mon həm bəmə holədə səpoysə mandəbin,bənav omin və ıştənışon bə Xıdo-Rəsul(s)-i dəçokneşone.Əli(ə)-i əvonış çə həzrətiku co kardyış piye,əmmo peyğombər(s)-i hamyeşe:Əlicon,icozə bıdə ta əvoni bukəm və əvon həm mıni.bıdə çəvonku tuşə bıstənım və əvon həm tuşə bıstənon.de tədrici rəhmətə peyğombər(s) hol vey bevəc beydəbe və bə məşhurə ğovli əsos,Hicri-Ğəməri Səfə manqi 28-ə ruji həmonə ruşinə ço,umməti əmin və bəşəri hidoyətəkə,çın fani dınyoku şe və rehlətış karde......