Ğıroni bəşorəton-10
Ğıroni bəşorəton-10
Kərimə-Ğıroni bə dılnıştə bəşorətonku qıləyni,pərhizkor və təğvoninə şəxson əbədiyə vəhıştədə sakin kardeye.vəhışt qıləy məfhume ki, məzhəbon veyniyədə bə maqi bədiqə bıə jimoni bovəşon heste.bə islomi təlimon əsos vəhışt çı çokə insonon ağıbəti vırəy və vəyo bəçəvon dınyoədə çokə koon mığdori əsos ilahi oxoş nıbə nemətonku əvon istifodə bəkardeyn.Kərimə-Ğıron vəhışti bo salehə şəxson hozzı kardə bıə əbədiyə ilahi neməton elon kardedə və vəhışti əhl ə kəsonin ki,bə Ğıroni oşkoə ayəon əsos, çəvon çokə əməlon bəsə çəvon bevəcə koonsə veye.Ğıroni çandə qılə ayəonədə vəhışti xısusiyyəton həxədə ruhaniyə ləzzəton və ziyodə nemətonku sehbət kardedə.ım osmoniyə dıjdə kitob ziyodə baxşonədə insoni bə vəhışt rosnə və həmonə barzə məğamədə ğərol doə,vositəon komilə surətədə mıəyyən kardedə.
Kərimə-Ğıroni Şura mıborəkə surə 22-23-ə şərifə ayəonədə hamyedə:”təra.....həmonə ruji sıtəmkoron bəvindeyş ki,ıştə əncom doə əməlonku de şiddəti tarsışon heste,əmmo əvoni dəbəqəte.əmmo əkəson ki, imonışon vardə və salehə əməlış əncom doə,vəhışti vey çokə boğonədəy və əyo harçi bıpyişone çəvon pərvərdıqori nəzədədə boəvon hozzıe.ıme yolə fəzl.ım həmonə çiye ki,Xıdovənd ıştə imon vardə iyən salehə əməl kardə bandəon deəy bəşorət doydə.”.(Şura -22-23)....
In ayəon bə ğıyoməti ruji əməlon təcəssımi qıləy ruşinə dəlile və həmonə ruji həmməkəs bəvinde ki, ğıyoməti ruji inkor kardə kəson bəştə kardə koon xoto,vey norohət və xofi dılədən və çəvon tarsə çiyon bəçəvon sə bome.qıləy holədə ki,əvon həni çəyo vitey və fərol kardey nibəzıneyn.çın ayə mesaj ıme ki,yavə insoni ko ğərəz cəhəndımi co qıləy ərməğonış nibəbe və ğıyoməti ruji çəvon çı əzobiku bıə tarsi həm boəvon hiç qıləy foydəş ni.əmmo ayə dəvomədə çı insoni nicot və perəxey roli imon iyən əməle saleh zikr kardedə.umumən çandə qılə ayəon ki,çı imoni barədə omə,de çokə əməlon bə icoye.çıro ki,Ğıroni məntığədə fəğət imon vardey kifoyət kardedəni.bəlkəm,imon bəpe de əməli bə ico bıbu.təbiiye qıləy əməl ki,bə Xıdo imon vardeyku bə əməl omeydə,salehə əməl bəbe.
