Ilahi əsma

Ilahi əsma

Xıdovəndi coqlə nomonku qıləyni Ğəffare.Ğəffar vey əbaxş,puşniyəkəs  və vey baxşə kəsi mənoədəy.inson jıqo ofəyə bıə ki,ehanə çəy bədəmi əzo və cəvorihədə qıləy bəxoş nıomə tərkib bıbu,cəhd kardedə de har formə əy  puşniyedə.insoni botıni həm bəştə məxsus qıləy reçinətiş heste.Xıdovənd çoko ki,de Musəvviri nomi ki,çı insoni surətış çok dərostə və Təğabuni mıborəkə surə 3-ə şərifə ayədə :”və səvvərəkum.....və şımənış təsvir karde,de qıləy reçin və bə dılnıştə təsviri”,bəçəy daxilicəhəton həm işorəş kardə.əmmo çoko ki,ğəflət iyən cəholət əy bə yavə koon tərəf bışıkırno və bandə bə qıno mırtəkib bıbu,peşo ıştə qıno iyən məsiyəti sərəseydə və tobə kardedə.iyoe ki,Xıdovənde-Aləm ki,de Ğəffari nomi bəçəy komək omeydə ta çəy botın həm de veyçokə formə baği bımando. liza, Ğəffar yəni puşniyə və har qıləy yavə və bə xoşnıomə ko nəzədə nıqəte və ıştə çəşon çəy sape vi kardeye və insoni barədə yəni çəy qıno əfv kardedə iyən çəy zohir iyən zoti bevəc kardə har çi puşniyedə.Ğəffar  nəyinki,qınon baxşeydə,bəlkəm çı qınon təsiron çı insoni jimon,zehn iyən rufədə  pok kardedə ta çəy mırtəkib bıə xotırə bəy əziyyət nıdo......

Xıdovənde-Xalığ TaHa mıborəkə surə 82-ə şərifə ayədə ıştəni Ğəffar elon kardedə və hamyedə:”Və inni ləğffarun.....və mı harki ki,tobəko və imon biyo və salehə əməl bə vırə bırosno,peşo hidoyət bıbu, bəbaxşem”.

Xıdovənd bın ayədə ıştəni tobə kardə qınokorə kəson qınon puşniyəkəs elon kardedə.qıləy Nəsuhə tobə ki,çəy bədiqə ğəlbi imon və salehə əməl insoni rəftorədə pəydu beydə.har zəmon ki,inson ıştə imoni deştə salehə əməli təsdığ kardedə və votey bəbe ki,hidoyətış pəydu kardə.qıləy muminə inson ıştə ilahi seyrədə bə qıləy mərhələ rəseydə və mışohidə kardedə ki,qıno bəçəy kəmoli mane bıə və çəy Xıdovəndi palu bıə məğam və vırəş tənəzzul kardə.liza,bə Xıdovəndi səmt oqardedə və əy tobə ğəbuləkə iyən Ğəffar vindedə.binobərin Xııdovəndi Ğəffar bıey  yəni əv tobə ğəbul kardedə və bə bandə itoət nıkardey və bə məsiyəti mırtəkib bıey və bəçəy dıli  tiykiyəti boyis bıey bıə qınon təsiri pok kardedə....

Xıdovəndi Ğəffari nom bə rəhmət iyən bərəkəti cari bıey boyis beydə.Nuhi mıborəkə surə 10-12-ə ayəon çı həzrəte Nuh(ə)-i əhvoloti jıqo bəyon kardedə:”fəğultu.....bəvon votemone:ıştə pərvərdıqoriku məğfırət tələbkənən ki,əv vey əbaxşe.(və ehanə əvon jıqo bıkoyn,Xıdovənd)osmoniku de bərəkəti pur bıə voşon dumo yənde boşmə vığandedə...və havzə boğon iyən cariyə ruon şımə ixtiyorədə ğərol doydə”.hiç qıləy şək ni ki,rəhməti voşi kilid Xıdovənde-Mutəali dastədəy ta de həxı məşiyyət və irodə əv bə əməl omeydə və əv ıştə rəhməti nomi ım voşon saru vığandedə.əmmo,co tərəfiku həm bandə bə qıno mırtəkib bıbu,əv ıştə ilahi rəhməti bəon bəbaste.

Insonon ki,ıştəni zıneydənin və ıştə rufi erj və ğeymətiku vağif nin,de qıləy kamə ğəfləti bə qıno iyən məsiyəti dıço beydə.əvon iminə ğədəmədə ki,qıno kardedən,ıştəni çı ilahi oxoş nıbə  rəhmət və nemətonku məhrum kardedə ki,ım həm bəştə nəfsi zılm kardey nımunə hisob beydə.ısət əmə tələb kardedəmon ki,Xıdolimha əmə ğafil və nodon bıəmon və qıno zəmonədə harçimon viro bekardedə və tı deştə lutfi əməni bıbaxş və çəmə qıno və xətoonku dəvard!.boçi ki,tı vey əbaxş və tobə ğəbuləkəş. çən, Ğəffari nomi məsələdə muhimmə nuktə ıme ki,de har qıləy məsiyəti bə vırə rosney,qıləy zılmət bə insoni nəfs iyən ğəlbi hakim beydə və çəy kəmoli hərəkət mutəğğif beydə,mandedə və de peşmonəti iyən tobə Ğəffari nomi vanq jeydə və ım nom həm təcəlli pəydu kardedə.

Muaviyə bin Vəhəb İslomi məşhurə fəğih iyən muhəddisonku qıləyniye,votedə:İmom Sadığ(ə) hamyedə: ”çoko ki,bandə həyğiyə tobəko Xıdovənd əy bəpyişe və dınyo iyən axırətədə çəy qıno bəpuşne. Voteme: çokonə puşneydə? Hamyeşe:dıqlə mələki nıvıştə çiyon çəvon yodiku bəbarde və bəçəy cəvarihi əmr bəkarde ki,çəy qınon bıpuşno və bə zəmini hissəon vəhy bəkarde ki,çəy şımə sape kardə (qıno) bıpuşnənən. çən,bandə Xıdo qıləy holədə mıloğat bəkarde və bəvinde ki,bəçəy qıno hiç qıləy çi şoyd ni”.....