Ilahi Rəhbəron-34

Ilahi Rəhbəron-34

Kərimə-Ğıroni cozibə jıqo be ki,əbu sufyan iyən əbu cəhl və co mışrikə fərdon məxfiyonə və bəşəvnəy peyğombər(s)-I kəy ətrofədə niyon beydəbin və bə ə həzrəti Ğıroni tilovəti quş doydəbin.əvon çə həzrəti handə Ğıroni reçinə iborə və tilovətiku ləzzət bardedəbin,əmmo çəy mığobilədə de qıləy məxsusə təəssıbi mandedəbin və çəy mehtəvo iyən məzmuni ğəbul kardedənıbin.əvon nəyinki,əy ğəbul kardedə nıbin,bəlkəm bə cokəson çəy bə odəmi təsirəkə ayəon məsey koy mane beydəbin və bın koyədə ıştə dasto omə har koy əncom doydəbin.Ğıron deştə təsirinə təlimon bo mısılmınon fik və əndişə bəpe bardero qıləy təsisəkə rolış hestebe və ım osmoniyə kitob insonon bo təhğiğ,təfəkkur iyən fik-fam kardero  dəvət kardedə.Ğıroni ayəon bo kulliyə şikilədə vey çokə formədə fik-fam iyən omuteyro,milləti dumo yənde bə təfəkkur iyən ıştə ağliku oko doey səmt təşviğ iyən dəvət kardedə və nodonəti iyən cəholəti mızəmmət kardedə və millətiku tələb kardedə ki,ku,kor iyən lol nıbon və çı çolınqə heyvonon bə hisob nıvon.Ğıroni həmmə vıronədə elm,hikmət,mərıfət,bəsirət,şuur,ağl iyən tədbiri maddəku kəlməon vey omə.

Xıdovənde-Aləm çı qırd insononku tələbış kardə ki,Xıdo doə ağli nemətiku çok-çoki bəhrə bıbon və çı cəholət və kur-kuronə təğlidonku bə diyəro bımandon.Kərimə-Ğıron ilahi ayəon handəkəson,əmmo de nığılə formə fik-fam və təfəkkur nıkardə kəson,məzəmmət kardedə və hamyedə:”çıro Ğıroni nığılə məfhumonədə fik-fam kardedənin və aya bəçəvon(fame və dərki qədə bə)ğıfl jıey bıə?”.(Muhəmməd-24)……

Kərimə-Ğıroni nozil bıeyku təğribən 15 əsr dəvardedə və de tosə ısət hiç qıləy mutəfəkkir, filosof, ədib, fəğih iyən elmi və akademik mərkəzon kardeyışon zınəni bə Kərimə-Ğıroni elon və vanqi cəvob bıdon və bın mıborizədə səbarz və ğalibe.ım məsələ həm çı Ğıroni əsil və orijinaləti nışon doydə və həmən ımi bəyon kardedə ki,Ğıroni ayəon çı hiç qıləy insoni elm iyən fikiku sərçeşməş peqətəni.de islomi-peyğombər(s)-I təbiri:”Kərimə-Ğıron ğərəz ilahi vəhyi co qıləy çi ni”.(Nəcm-4).bə həmonə dəlili əsos,de ğətiyyati votey bəbe ki,Ğıroni həmməysə vey muhimmə xısusiyyət ıme ki,bəvədə hiç qıləy təhrif bə əməl oməni.zira,Xıdovəndi çəy muhafizə kardeyış təzmin kardə və hamyedə:”əmə Ğıronımon saru vığandemone və ğəti iyən yəğinən əy hifz bəkardemon”. …..

Xıdovənd Ğıronış çı hidoyəi kitobış elon kardə və çı Ğıroni ım sıfət və xılət,çəy həmməysə muhimmə xısusiyyəte.Xıdovənde-Aləm bo insonon hidoyətiro ziyodə peyğombəronış vığandə ki,çəvon kali qıləyni mecuzəşon bıə və bəzi qıləyni həm çı mecuzəsə əlovə kitobışon həm bıə.kitob soyb bıə peyğombəron qıləy ilahi ğanunonışon bıə və çəvon kitobon bo milləti hidoyətiro enovniyə bıə ta Xıdovəndi ğanunon bəyonko.əmmo,eyni holədə ım osmoniyə kitobon həni qıləy mecuzə cəhətışon bıəni.bın miyon Kərimə-Ğıron islomi sıftədə  Ğıroni rahnumayon bə umum milləti elm iyən təfəkkuri ziyod bıey boyis be və nəticədə camiyə həm bə elm iyən zıney səmt sovğış pəydu karde.həmməkəs dərəsin ki,Kərimə-Ğıron fəğət qıləy əxloği  iyən mənəvi mığəddəsə kitob ni,bəlkəm çı qıləy barzə jimoni bərnoməy….

Kulliyə formədə qırd insonon ıştə jimonədə bın fikədən ki,bə hərəbaxtəti və xoşbaxtəti dast pəydu kardeye.beşək bə qıləy kəmol və hərəbaxtəti rəsey,bə qıləy bərnomə və proqrami ehtiyociş heste.qıləy proqram ki,zumand,prinsipial və məntıği bıə və bə qıləy ağli peştıpurəti təkyəko.

Həmməysə prinsipial iyən usuli bərnomə ıme ki,keyfiyyət və struktur cəhəto həmməysə çokə ulquye və ğoyməti nəzəku həm həmməysə mehkəm və sabite.Ğıron bənə qıləy osmoniyə kitobi inson iyən dınyo bə islomi tohidi təfəkkuri əsos hədəfin zıneydən və və bo bəşəri camiyə həmməysə barzə hədəfi bə təsvir kəşeydə ta bə qıləy hərəbaxtəti bırəso.