Ilahi Rəhbəron-37

Ilahi Rəhbəron-37

İslomi-Peyğombər(s) bə barzə əxloğ iyən insoni keyfiyyəton soyb be ki,umum məxloğ deəy oşno be.çə həzrəti təvazu,əfv iyən qızəşt,sədoğət və əmonotdorəti və bəfodorəti,səbr iyən hovsələ,namə xosyət, mehribonəti və co çandə da qılə əxloği xıslət və keyfiyyəton bə islomi-peyğombər(s)-I məxsus be. Xıdovənde-Aləm çə həzrəti vəsf iyən tevsifədə jıqo hamyedə:”həyğətən,tı yolə əxloği barzə məğamədə ğərolı qətə”.Ğələm-4.

Peyğombər(s) həm ıştə besəti fəlsəfə əxloği erjon təkmil elon kardedə və hamyedə:”bərosti mən bo əxloği kəroməton təkmiliro bə risolət vıjniyə bıəm”.

İştimoyi rəftoron zəminədə həm peyğombər(s) qıləy mislış nıbə usvə və ulqu be.ə həzrət bə sosyal ədoləti icro kardero ziyod məxsusə həssosiyyətış hestebe bın zəminədə bə həmmə kəson I səviyyədə nəzə kardedəbe və çı milləti miyono qıləy qədə tafut və farğ həm noydə nıbe. ə həzrət  bəçəvon ərbob iyən fəğıri I formaədə diyə kardedəbe və əvoni həmmə I səviyyədə qəteydəbe.peyğombər(s) ıştə ğudrət və hukuməti barzə zəmonədə de milləti zəyifə təbəğə bə ico nışteydəbe və de əvon bə ivrə xorək hardedəbe.ə həzrət bə həmmə kəsi məxsusən bə hırdənon sıftədə səlom dodyəbe.islomi-peyğombər(s) ıştə qırd fərdi iyən iştimoyi fəoliyyətonədə iştirok kardedəbe və hiçvaxti ıştə ehədədə bıə məsuliyyəti bə cokəson ehdə noydə nıbe və bocamiyə vəhdət iyən ibemoni xoto,çı harcurnə təfrığəamziə hərəkəton vəy qəteydəbe.Xıdo-Rəsul(s) bo insonon hidoyəti xoto vey norohət be və boşımi xoto iləzə həm orom beydə nıbe.ə həzrət qırd təhlukə boştə coni ğəbul kardedəbe və de ziyodə mehribonəti və dıləsutəti səy kardedəbe ta ıştə roy qim kardə cohilə milləti çı şrık iyən kufri nodonəti iyən cəholətiku ozodko və bə qıləy de elm iyən imoni pur bıə nuroniyə dınyo səmt hidoyətko.ə həzrət bın royədə bə ziyodə mığdorədə bıə məşəğğət və əziyyəton tovış varde ki,osmoniku vəhy de ın ayə nozil be:”quya bə (mışrikon) imon nıvardey xoto,dılı heste ıştə coni çı dasto bıdoş”.Şuəra-3…

Peyğombəri(s)  siyrə və şivəəd ixtisodi koon qıləy məxsusə xısusiyyətış hestbe.ə həzrət  de Kərimə-Ğıroniku ilham sıey,ixtisodi fəoliyyət iyən sərvəti istehsoli məğam iyən rolisə vey təkid kardedəbe və çə həzrəti de besəti devronədə nəxlıston iyən məzonədə toğ kaştey iyən kaştemoni məhsulon istehsoli icod kardey roy bə ixtisodi ərsəon daxil beydəbe.əmmo ixtisod iyən sərvəti istehsol hədəf zıneydəni, bəlkəmbənə qıləy vositə çəyku oko doydəbe və ıştə bəromə veyni bo camiyə ehtiyocinə şəxson və jinə təbəğə odəmon xoto sərf kardedəbe və de cihodi roy voistə de mol,infoğ iyən bə yətimon ğəyyuməti kardey və ıştə coniku dəvardey koyədə cokəson ıştəsə bənav zıneydəbe və jıləvoni əv nəyinki,boştə mol-əmvol cəm kardedə nıbe,bəlkəm insoniyyətiku bə diyəro bıə iyən fəğət de mol-devləti qırdə kardə kəson de şiddəti mıborizəş bardə.islomi əzizə peyğombər(s)  hiçvaxti hətto qıləy zərrə ğədərədə bə dınyo moli rəğbətış və meylış nışon nıdoe və nəhoyətədə  ə həzrət hejo qıləy  sodə jimonış bıə və çı harcurnə cəh-cəlol iyən qlamurnə jimoniku bə diyəro mandə……..

İslomi ali-ğədrə peyğombər(s) hərbi ərəsədə həm qıləy zumand iyən mudrikə mudir be.ə həzrət de dığğəti çı deşmıni mevğıyyəti təhğığ kardedəbe və de ğıvvə ezom kardey iyən vığandey,əvon de deşmınon ğıvvəku məlumoton cəm kardey koy məşğul beydəbin.cihod iyən mıborizə meydononədə həm de bə Xıdo təvəkkul kardey iyən de şucoəti və hiç qıləy qədə vohimə və tars nıbə holədə canq kardedəbe.joqo ki,Əli(ə) hamyedə:”əmə havaxti ki,canqədə xətər və təhlukə hiss kardedə bimon,bəvədə bə Xıdo-Rəsuli(s) pənoh bardedəbimon və dəviteydəbimon.Xıdo-Rəsul(s) vistı haft qılə ğəzvədə yəni bə yolə canqonədə ki,çı Ğureyşi yol və əyon-əşrafon bə mısılmınon təhmilış kardəbe,ə həzrət şəxsən iyən sərostə formədə çə canqon komandirəti bəştə ehdə peqətedəbe və de ilahi niyyət və həvəsi iyən de bə əxloği iyən humanistə usul və prinsipon rioyət kardə holədə bə canq iyən mıborizə dəvom doydəbe....