Ilahi Rəhbəron-39

Ilahi Rəhbəron-39

Həzrəte Xədicə(s) cədd,Əsəd bin ƏbdulĞəri çı “Alicənobon Mığovilə”(Həlful-Fuzul) məşhurə uzvonku qıləyni be.ım mığovilə çı ədolət tələb kardə iyən yolə şəxsiyyəti soyb bıə idastə merdon peymon be ta bə sıtəm vində məzlumon koməkkon.Xıdo-Rəsul(s) həm bə qrupi anqıl qıniye ta çəvon kənoyədə de zılmkoron mıborizə bardedəbe ta çı məzlumon həxon çəvonku bıstəno.Həzrəte Xədicə(s) amuyəzo Vərəğə ibn Nofəl həm qıləy alim iyən ağılmandə şəxsonku be ki,Peyğombər(s)-I besəti bədiqə Məscidul-Həramədə bə ə həzrəti huzur şərəfyob be,rəse və çə həzrətiku tələbış karde ki,bəy çı firiştə və mələkon nozil bıə zəmonədə ıştə mışohidə kardə çiyon,boəy bəyonko.Peyğombər(s)-I çı vəhyi mələk Cəbrəyili omey iyən çəy risoləti rosney cərəyoni bəyon kardey bədiqə,Vərəğə ibzorış karde ki,bə Xıdo ğəssəm tı pəyğombəriş və həmonə mələk ki,bə Mosə(ə) və İsa(ə)-I nozil bıə,bətı həm nozil bıə.aqah bıbi ki,tıni təkzib iyən əziyyət bəkardeyn.tı ıştə vətəniku bekardey bəbeyş və əvon detı canq bəkardeyn.ehanə az həmonə rujonədə bəyji bıbum,bə Xıdo dini komək bəkardem.peşo əy çı həzrəti peyğombəri(s) mıborəkə səş maçə karde və de ə həzrəti Xıdohafizış karde…

Binobərin,Xıdo-Rəsul(s) de qıləy banu və xanımi izdivacış karde ki,qıləy əsil iyən əxloği fəzilətin soyb bıə xıyzonədə perəsəbe və ıştənış de insoni barzə xısləton dərostəşbe.de həzrəte Xədicə(s) haruj ziyod bıə barzə xısləton ,çı həzrəte peyğombər(s)-I bə ım banu bıə eşğ iyən məhəbbət rujbəruj ziyod beydəbe. islomi rəvoyətonədə çın buzurquvar iyən yolə xanımi barzə keyfiyyəton həxədə omə ki,”Cəbrəyil har zəmon bə peyğombəri nozil beydəbe,ərz kardedəbe:Xıdo səlomi bə Xədicə bıroson…”.

Nəhoyətən qıləy istisnoə ruji Cəbrəyil(ə) bə Xıdo-Rəsul(s)-I nozil be və ərzış karde:”Yolə Xıdovənd bətı səlom vığandedə və hamyedə:”çıl şəvı-ruj çı Xədicəku bə kəno bımand və de ibodət iyən bəşəvnəy razo-niyozi koy məşğul bıbi”.peyğombər(s) bə ilahi fərmoni itoətış karde və Xıdovəndi əmrış bə vırə rosne.çoko ki,çıl ruj jıləvoni bə oxo rəse,firiştə nozil be,vəhıştiku qıləy xorəkış varde və ərzış karde:ımşəv çın vəhışti xorəkiku meyl bıkə,bəhə.Xıdo-Rəsul(s) bə ın osmoniyə mayidə və sufrə şukrış karde və de nımoj iyən ibodəti koy məşğul be.Cəbrəyil ijən nozil be və voteşe:”bə Xədicə kəy səmt hərəkətkə!zira,Xıdovəndi irodəş kardə ki,ıştı sulbiku qıləy pokə fərzənd ofəyo və xəlğko”….

Həzrəte Xədicə(ə) ıştə dıconi iyən hamilə bıə zəmonədə,ilahi firiştə və mələk bo bə peyğombər(s) iyən Xədicə(ə) bəşorət və mıjdəvoni doey xoto,nozil be və voteşe:Ha Xıdo-Rəsul ha! Xədicə rəhmədə bıə fərzənd qıləy mehtərəmə kinəy ki,ıştı nəsl deçəy vositə dəvom pəydu bəkarde.əv çı dini rəhbər iyən imomon inəy ki,bətı vəhy orəxey bədiqə ıştı canişinon bəbeyn. peyğombər(s) çı pərvərdıqori bəşorət və mıjdəvoniş bə həzrəte Xədicəş rosne və de ım osmoniyə xəbə çə həzrəti dılış şo karde….